ନୂଆଦିଲ୍ଲୀ: ରାଜଧାନୀ ଦିଲ୍ଲୀରେ ଦୁଇ ଦିନିଆଇ ଜି-୨୦ ସମ୍ମିଳନୀ ଆରମ୍ଭ ହୋଇଛି ।  ଏନେଇ ଭାରତ ମଣ୍ଡପରେ ବିଶ୍ୱର ବଡ଼ ବଡ଼ ନେତା ଓ ରାଷ୍ଟ୍ରଦୂତ ଏକାଠି ହୋଇଛନ୍ତି ।  ସମ୍ମିଳନୀରେ ପ୍ରଧାନମନନ୍ତ୍ରୀ ନରେନ୍ଦ୍ର ମୋଦି ସ୍ୱାଗତ ଭାଷଣ ଦେଇଛନ୍ତି । ଏହି ଅବସରରେ ମୋଦି ଏକ ବଡ଼ ଘୋଷଣା କରିଛନ୍ତି । ତାହା ହେଲେ ଜି-୨୦ର ନୂଆ ସ୍ଥାୟୀ ସଦସ୍ୟତା ସମ୍ପର୍କରେ । 

ଆଫି୍ରକୀୟ ୟୁନିୟନ ଜି-୨୦ର ନୂଆ ସ୍ଥାୟୀ ସଦସ୍ୟ ହୋଇଛି । ଆଫି୍ରକୀୟ ୟୁନିୟନର ସଦସ୍ୟତା  ନେଇ ମୋଦି ଘୋଷଣା କରିଛନ୍ତି । ସେ କହିଛନ୍ତି ଯେ ଆଫି୍ରକୀୟ ୟୁନିୟନର ସଦସ୍ୟତା  ନେଇ ସମସ୍ତଙ୍କର ସହମତି ରହିଛି ।  

ଅନ୍ୟପକ୍ଷରେ ନିଜର ସ୍ୱାଗତ  ଅଭିଭାଷଣ ରଖି ମୋଦି କହିଛନ୍ତି ଯେ  ବିଶ୍ୱରେ ଏବେ ବିଶ୍ୱାସର ନୂଆ ସଂକଟ ଦେଖାଦେଇଛି ।  ବିଶ୍ୱାସର ଏହି ସଂକଟକୁ ମିଳିମିଶି ଦୂର କରିବାକୁ ମୋଦି ସମସ୍ତଙ୍କୁ ଆହ୍ୱାନ ଦେଇଛନ୍ତି ।  ଏକାଠି ହେଲେ ସବୁ ସଂକଟ ଦୂର ହୋଇପାରିବ । ଏକବିଂଶ ଶତାବ୍ଦୀ ବିଶ୍ୱକୁ ନୂଆଦିଶା ଦେବାର ସମୟ । ଏବେ ସମସ୍ତଙ୍କୁ ସାଥୀରେ ନେଇ ଚାଲିବାର ସମୟ ଉପନୀତ ।  ସବକା ସାଥ, ସବକା ବିକାଶ, ସବକା ପ୍ରୟାସ ପଥପ୍ରଦଶକର ମନ୍ତ୍ର ବୋଲି ମୋଦି କହିଛନ୍ତି । 

ସମ୍ମିଳନୀ ଆରମ୍ଭ ପୂର୍ବରୁ ପ୍ରଧାନମନ୍ତ୍ରୀ ମୋଦି ମରକ୍କୋ ଭୂମିକମ୍ପ ଅଘଟଣରେ ଗଭୀର ଦୁଃଖ ପ୍ରକାଶ କରିଛନ୍ତି । ଭୂମିକମ୍ପ ଜନିତ ମୃତାହତ ନେଇ ସମବେଦନା ଜଣାଇବା ସହ ଆହତଙ୍କ ଆଶୁ ଆରୋଗ୍ୟ କାମନା କରିଛନ୍ତି । ଭୂକମ୍ପ କ୍ଷତିଗ୍ରସ୍ତ ମରକ୍କୋ ସହ ପୁରା ବିଶ୍ବ ଅଛି । ଏହି ଦୁଃଖଦ ସମୟରେ ମରକ୍କୋକୁ ସମସ୍ତ ସମ୍ଭାବ୍ୟ ସହାୟତା ଯୋଗାଇ ଦେବାକୁ ଭାରତ ପ୍ରସ୍ତୁତ ବୋଲି ପ୍ରଧାନମନ୍ତ୍ରୀ କହିଛନ୍ତି ।

ଜି-୨୦ ସମ୍ମିଳନୀ ସ୍ଥଳକୁ ବିଶ୍ବ ନେତୃବୃନ୍ଦମାନଙ୍କୁ ସ୍ବାଗତ କରିବାକୁ ପ୍ରଧାନମନ୍ତ୍ରୀ ମୋଦି ସକାଳେ ଭାରତ ମଣ୍ଡପମ ଠାରେ ପହଞ୍ଚିଥିଲେ । ଏହାପରେ ଜଣକ ପରେ ଜଣେ ଜି-୨୦ ଅତିଥିମାନେ ସେଠାରେ ପହଞ୍ଚିଥିଲେ । ପ୍ରଧାନମନ୍ତ୍ରୀ ନିଜେ ବ୍ୟକ୍ତିଗତ ଭାବେ ଉପସ୍ଥିତ ରହି ସମସ୍ତ ଅତିଥିମାନଙ୍କ ସହ ହାତ ମିଳାଇ ଭିତରକୁ ସ୍ବାଗତ କରିଥିଲେ । ପ୍ରଥମେ ଜାତିସଂଘର ମହାସଚିବ ଆଣ୍ଟୋନିଓ ଗୁଟେରସ, ଆନ୍ତର୍ଜାତିକ ମୁଦ୍ରାପାଣ୍ଠିର ପରିଚାଳନା ନିର୍ଦ୍ଦେଶିକା ସମ୍ମିଳନୀ ସ୍ଥଳରେ ପହଞ୍ଚିଥିଲେ । ଏହାପଛକୁ ବାଂଲାଦେଶ ପ୍ରଧାନମନ୍ତ୍ରୀ ଶେଖ୍ ହସିନା ପ୍ରଗତି ମୈଦାନକୁ ଆସିଥିଲେ । ପରେ ଆମେରିକା ରାଷ୍ଟ୍ରପତି ଜୋ ବାଇଡେନ, ବ୍ରିଟେନ ପ୍ରଧାନମନ୍ତ୍ରୀ ଋଷ ସୁନକ, ତୁର୍କୀ ରାଷ୍ଟ୍ରପତି ତଇପ୍ ଏର୍ଡୋଗାନ, ବ୍ରାଜିଲ ରାଷ୍ଟ୍ରପତି ପ୍ରମୁଖ ପହଞ୍ଚିଥିଲେ । ତେବେ ଋଷି ସୁନକଙ୍କୁ ପ୍ରଧାନମନ୍ତ୍ରୀ ମୋଦି କରମର୍ଦ୍ଧନ କରି ସ୍ବାଗତ କରିଥିଲେ ।

Powered by Froala Editor