ଭଲ ଖବର: ଊତକ୍ଷେପଣର ପ୍ରାୟ ୧ ଘଣ୍ଟା ପରେ ନିର୍ଦ୍ଧାରିତ କକ୍ଷପଥରେ ସ୍ଥାପିତ ହୋଇଛି ଆଦିତ୍ୟ-ଏଲୱାନ୍
![ଭଲ ଖବର: ଊତକ୍ଷେପଣର ପ୍ରାୟ ୧ ଘଣ୍ଟା ପରେ ନିର୍ଦ୍ଧାରିତ କକ୍ଷପଥରେ ସ୍ଥାପିତ ହୋଇଛି ଆଦିତ୍ୟ-ଏଲୱାନ୍](https://odishanewslens.com/news_gallery/24060_1693647558.jpg)
ନୂଆଦିଲ୍ଲୀ: ଭାରତର ‘ସୂର୍ଯ୍ୟ ମିଶନ’ ପ୍ରସଙ୍ଗରେ ଏକ ଭଲ ଖବର ସାମନାକୁ ଆସିଛି । ତାହା ହେଲା ଆଦିତ୍ୟ ଏଲ-୧ ନିର୍ଦ୍ଧାରିତ କକ୍ଷପଥରେ ପହଞ୍ଚିଛି । ଊତକ୍ଷେପଣର ପ୍ରାୟ ୧ ଘଣ୍ଟା ପରେ ଏଲ-୧ ନିର୍ଦ୍ଧାରିତ କକ୍ଷପଥରେ ସ୍ଥାପିତ ହୋଇଛି । ଏଲ-୧ ନିର୍ଦ୍ଧାରିତ କକ୍ଷପଥରେ ପହଞ୍ଚିଥିବା ଇସ୍ରୋ ଅଧ୍ୟକ୍ଷ ସୋମନାଥ କହିଛନ୍ତି । ଶନିବାର ଦିନ ୧୧ଟା ୫୦ରେ ଶ୍ରୀହରିକୋଟା ସ୍ପେସ ସେଣ୍ଟରରୁ ପିଏସଏଲଭି-ସି୫୭ରେ ଆଦିତ୍ୟ ଏଲ-୧ ଉତକ୍ଷେପଣ କରାଯାଇଥିଲା ।
ପ୍ରକାଶ ଯେ ସୂର୍ୟ୍ୟଙ୍କ ଉପରେ ଅନୁଧ୍ୟାନ କ୍ଷେତ୍ରରେ ଆଉ ପାଦେ ଆଗେଇଛି ଇସ୍ରୋ। ଶ୍ରୀହରିକୋଟା ସତୀଶ ଧାବନ ଲଞ୍ଚ୍ ପ୍ୟାଡରୁ ସଫଳତା ପୂର୍ବକ ଉତକ୍ଷେପଣ ହୋଇଛି ଆଦିତ୍ୟ-ଏଲୱାନ୍। ରକେଟ ପିଏସଏଲଭି-ସି୫୭ ମାଧ୍ୟମରେ ମହାକାଶକୁ ଯାଇଛି ଏହି ମହାକାଶଯାନ। ପୂର୍ବ ନିର୍ଦ୍ଧାରିତ ସମୟ ଅନୁସାରେ ଆଜି ପୂର୍ବାହ୍ନ ୧୧ଟା ୫୦ ମିନିଟରେ ଆଦିତ୍ୟ-ଏଲୱାନ୍ ଉତକ୍ଷେପଣ କରାଯାଇଛି।
ଏହି ମିଶନ୍ ମାଧ୍ୟମରେ ଅନେକ ଲକ୍ଷ୍ୟ ରଖିଛି ଇସ୍ରୋ। ଚନ୍ଦ୍ରଯାନର ସଫଳ ଯାତ୍ରା ପରେ କିପରି ସୌର ମିଶନ ସଫଳ ହେବ ସେଥିପାଇଁ ବୈଜ୍ଞାନିକଙ୍କ ସମେତ ପୂରା ଦେଶବାସୀ ଆଶାବାଦୀ ଅଛନ୍ତି। ଉତକ୍ଷେପଣର ୧୨୭ ଦିନ ପରେ ଲକ୍ଷ୍ୟପଥରେ ପହଞ୍ଚିବ ଆଦିତ୍ୟ-ଏଲୱାନ୍। ଅର୍ଥାତ୍ ବୈଜ୍ଞାନିକମାନେ ଯେଉଁ ରହସ୍ୟ ଜାଣିବାକୁ ଆଶା ରଖିଛନ୍ତି ତାହା ଆଗାମୀ ୪ ମାସ ପରେ ଅର୍ଥାତ୍ ଜାନୁଆରୀରେ ପୂରା ହୋଇପାରିବ।
କାରଣ, ବର୍ତ୍ତମାନ ଆଦିତ୍ୟ-ଏଲୱାନ୍ କକ୍ଷପଥରେ ଅବସ୍ଥାପିତ ହେବ। ସେଠାରୁ ପୃଥିବୀକୁ ଚାରି ଥର ପରିକ୍ରମା କରି ଲକ୍ଷ୍ୟ ସ୍ଥଳ ଲାଗ୍ରାଞ୍ଜ ପଏଣ୍ଟ ଦିଗରେ ଅଗ୍ରସର ହେବ। ଏହା ପରେ ହାଲୋ ଅର୍ବିଟରେ ରହି ସୂର୍ୟ୍ୟଙ୍କ ଉପରେ ଅନୁଧ୍ୟାନ କରିବ। ଲାଗ୍ରାଞ୍ଜ ପଏଣ୍ଟର ଚତୁର୍ପାଶ୍ୱକୁ ହାଲୋ ଅର୍ବିଟ ବୋଲି କୁହାଯାଏ। ଆଦିତ୍ୟା-ଏଲୱାନ ସମ୍ପୂର୍ଣ୍ଣ ରୂପେ ସୂର୍ୟ୍ୟଙ୍କ ନିକଟକୁ ଯିବ ନାହିଁ। ଏହା ପ୍ରଥମ ଲାଗ୍ରାଞ୍ଜ ପଏଣ୍ଟରେ ରହି ଅନୁଧ୍ୟାନ କରିବ।
ପୃଥିବୀଠୁ ସୂର୍ୟ୍ୟଙ୍କ ଦୂରତା ୧୫ କୋଟି କିଲୋମିଟର ହୋଇଥିବା ବେଳେ ଏହା ୧୫ ଲକ୍ଷ କିଲୋମିଟର ଦୂରରୁ ରହି ଅନୁସନ୍ଧାନ କରିବ। ଏହି ପଏଣ୍ଟକୁ ଲାଗ୍ରାଞ୍ଜ ପଏଣ୍ଟ ବୋଲି କୁହାଯାଏ। ପୃଥିବୀ ଓ ସୂର୍ୟ୍ୟ ମଧ୍ୟରେ ପାଞ୍ଚଟି ଲାଗ୍ରାଞ୍ଜ ପଏଣ୍ଟ ରହିଛି। ପ୍ରଥମ ଲାଗ୍ରାଞ୍ଜ ପଏଣ୍ଟର ଦୂରତା ୧୫ ଲକ୍ଷ କିଲୋମିଟର।
ଲାଗ୍ରାଞ୍ଜ ପଏଣ୍ଟ ହିଁ ପୃଥିବୀ ଓ ସୂର୍ୟ୍ୟ ମଧ୍ୟରେ ଥିବା ଏକ ସ୍ଥାନ, ଯେଉଁଠାରେ ଦୁଇ ବସ୍ତୁ ମଧ୍ୟରେ ମାଧ୍ୟାକର୍ଷଣ ଶକ୍ତି କାମ କରିଥାଏ। ଫଳରେ କୌଣସି ବସ୍ତୁ ଦୀର୍ଘ ସମୟ ପର୍ୟ୍ୟନ୍ତ ସେହିଠାରେ ସନ୍ତୁଳିତ ଅବସ୍ଥାରେ ରହି କାର୍ୟ୍ୟ କରିପାରିବ। ଏହିଠାରୁ ହିଁ ଆଦିତ୍ୟ-ଏଲୱାନ୍ ସୂର୍ୟ୍ୟଙ୍କ ରହସ୍ୟ ଭେଦିବ ଏବଂ ଇସ୍ରୋକି ଗୋଟିଏ ପରେ ଗୋଟିଏ ସୂଚନା ଦେବ।
Powered by Froala Editor