ଜି-୨୦ ବୈଠକ, ଦିଲ୍ଲୀରେ ହାଇ ଆଲର୍ଟ ଜାରି
![ଜି-୨୦ ବୈଠକ, ଦିଲ୍ଲୀରେ ହାଇ ଆଲର୍ଟ ଜାରି](https://odishanewslens.com/news_gallery/24050_1693631229.jpg)
ନୂଆଦିଲ୍ଲୀ: ଚଳିତ ସେପ୍ଟେମ୍ବର ୯ ଓ ୧୦ ତାରିଖ ଦୁଇଦିନ ଧରି ଦିଲ୍ଲୀରେ ଆୟୋଜିତ ହେବାକୁ ଯାଉଛି ଜି-୨୦ ଆନ୍ତର୍ଜାତିକ ସମ୍ମିଳନୀ। ଜି-୨୦ ରାଷ୍ଟ୍ରଗୋଷ୍ଠୀର ଅଧ୍ୟକ୍ଷ ଭାବେ ଭାରତ ଏହି ସମ୍ମିଳନୀର ଆୟୋଜନ କରୁଛି। ବୈଠକରେ ୪୩ଟି ରାଷ୍ଟ୍ରର ପ୍ରମୁଖ ନେତା ଓ ପ୍ରତିନିଧିମାନେ ଯୋଗ ଦେବେ। ବୈଠକକୁ ଆସୁଥିବା ବିଶ୍ବ ନେତାଙ୍କୁ ଉତ୍ତମ ଆତିଥେୟତା ସହିତ ସେମାନଙ୍କ ସୁରକ୍ଷା ବ୍ୟବସ୍ଥା ଲାଗି ଦିଲ୍ଲୀରେ ବ୍ୟାପକ ବ୍ୟବସ୍ଥା ଚାଲିଛି। ତେବେ ଏହି ବୈଠକକୁ ନେଇ ଦିଲ୍ଲୀବାସୀ ଏକ ପ୍ରକାର ତାଲାବନ୍ଦ ସମସ୍ୟାର ସମ୍ମୁଖୀନ ହେବାକୁ ଯାଉଛନ୍ତି। ବୈଠକ ପାଇଁ ଦିଲ୍ଲୀ ସହରକୁ ସେପ୍ଟେମ୍ବର ୮ରୁ ୧୦ ତାରିଖ ପର୍ଯ୍ୟନ୍ତ ଛୁଟି ଘୋଷଣା କରାଯାଇଛି। ଏହି ତିନିଦିନ ଦିଲ୍ଲୀର ସମସ୍ତ ବିଦ୍ୟାଳୟ, ମହାବିଦ୍ୟାଳୟ, ସରକାରୀ କାର୍ଯ୍ୟାଳୟ, ବ୍ୟାଙ୍କ ଓ ବାଣିଜ୍ୟିକ ପ୍ରତିଷ୍ଠାନକୁ ଛୁଟି ଘୋଷଣା କରାଯାଇଛି। ସହରବାସୀଙ୍କ ଯିବା ଆସିବା ଉପରେ ବିଭିନ୍ନ ପ୍ରକାର କଟକଣା ଲାଗୁ କରାଯାଇଛି। ଏଥିପାଇଁ ସ୍ବତନ୍ତ୍ର ଟ୍ରାଫିକ ବ୍ୟବସ୍ଥା କରାଯାଇଛି। ଅନେକ ରାସ୍ତାକୁ ସାଧାରଣ ଲୋକଙ୍କ ଯିବା ଆସିବା ପାଇଁ ବନ୍ଦ କରାଯାଇଛି। ଏପରିସ୍ଥିତିରେ ଦିଲ୍ଲୀବାସୀଙ୍କୁ କ୍ଷୀର, ଖାଦ୍ୟ, ପନିପରିବା, ଔଷଧ ଓ ଅନ୍ୟାନ୍ୟ ଅତ୍ୟାବଶ୍ୟକ ସାମଗ୍ରୀ ଓ ସେବା ଯୋଗାଇ ଦେବା ଲାଗି ସରକାରଙ୍କ ପକ୍ଷରୁ ବ୍ୟବସ୍ଥା କରାଯାଇଛି। ସ୍ଥାନୀୟ ଅଞ୍ଚଳରେ ରେସନ, ଔଷଧ, ପନିପରିବା ଓ କ୍ଷୀର ଦୋକାନଗୁଡିକ ଅସ୍ଥାୟୀ କଟକଣା ମଧ୍ୟରେ ଖୋଲା ରଖିବାକୁ ଅନୁମତି ଦିଆଯାଇଛି। ଏହିସବୁ ଦୋକାନରୁ ଲୋକେ ନିଜର ଆବଶ୍ୟକ ଜିନିଷ କିଣିପାରିବେ। ଜି-୨୦ ବୈଠକକୁ ନେଇ ଦିଲ୍ଲୀବାସୀ ଯେଉଁ ଅସୁବିଧାର ସମ୍ମୁଖୀନ ହେବାକୁ ଯାଉଛନ୍ତି ସେଥିପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପୂର୍ବରୁ କ୍ଷମା ମାଗିବା ସହିତ ସହଯୋଗ ପାଇଁ ନିବେଦନ କରିସାରିଛନ୍ତି। ଜି-୨୦ ବୈଠକ ପାଇଁ ସେପ୍ଟେମ୍ବର ୭ରେ ପୂର୍ବାଭ୍ୟାସ କରାଯିବ। ଏହି ସମୟରେ ମଧ୍ୟ ଦିଲ୍ଲୀର ଅନେକ ରାସ୍ତାକୁ ସାମୟିକ ବନ୍ଦ କରାଯିବ।
ଅନ୍ୟପଟେ ଜି-୨୦ ବୈଠକ ପାଇଁ ଦିଲ୍ଲୀ ସହରରେ ହାଇ ଆଲର୍ଟ ଜାରି କରାଯାଇଛି। ସାରା ସହରରେ ସୁରକ୍ଷା ବ୍ୟବସ୍ଥା ପାଇଁ ୧ଲକ୍ଷ ୩୦ହଜାର ସୁରକ୍ଷାକର୍ମୀ ମୁତୟନ କରାଯାଇଛି। ସୁରକ୍ଷାବାହିନୀଙ୍କ ମଧ୍ୟରେ ଅଛନ୍ତି କେନ୍ଦ୍ରୀୟ ସଶସ୍ତ୍ର ପୁଲିସ ବାହିନୀ (ସିଏପିଏଫ) ଓ ଜାତୀୟ ସୁରକ୍ଷା ଗାର୍ଡ (ଏନଏସଜି)। ଏମାନଙ୍କୁ ସହାୟତା କରିବେ ଦିଲ୍ଲୀ ପୁଲିସ। ସୁରକ୍ଷା ଦାୟିତ୍ବରେ ଅଛନ୍ତି ଦିଲ୍ଲୀ ପୁଲିସର ସ୍ବତନ୍ତ୍ର କମିସନର ଦୀପେନ୍ଦ୍ର ପାଠକ। ପାଠକ କହିଛନ୍ତି ଯେ ଏହା ଆମ ପାଇଁ ଏକ ଐତିହାସିକ ମୁହୂର୍ତ୍ତ। ଆକାଶ ମାର୍ଗର ସୁରକ୍ଷା ନିମନ୍ତେ ବାୟୁସେନାକୁ ମୁତୟନ କରାଯାଇଛି। ଏହା ସହିତ ୪୦୦ ଅଗ୍ନି ନିରାପତ୍ତା କର୍ମଚାରୀ ମୁତୟନ ହୋଇଛନ୍ତି। ବୈଠକକୁ ଆସୁଥିବା ଅତିଥିଙ୍କ ନିମନ୍ତେ ସରକାର ୨୦ଟି ବୁଲେଟ ପ୍ରୁଫ୍ ଲିମୋସିନ କାର ଭଡାରେ ଆଣିଛନ୍ତି। ଏହି ବର୍ଗର ଗୋଟିଏ କାର୍ର ଦାମ ୧୮ କୋଟି ଟଙ୍କା। ଗାଡି ଚଳାଇବା ପାଇଁ ସିଆରପିଏଫ୍ର ୪୫୦ ଚାଳକ ନିୟୋଜିତ ହୋଇଛନ୍ତି। ବୈଠକକୁ ଆସୁଥିବା ବିଶ୍ବ ନେତାଙ୍କ ପତ୍ନୀମାନଙ୍କ ସୁରକ୍ଷା ନିମନ୍ତେ ବିଭିନ୍ନ ଅର୍ଦ୍ଧସାମରିକ ବାହିନୀର ମହିଳା କମାଣ୍ଡୋମାନଙ୍କୁ ନିୟୋଜନ କରାଯାଇଛି।
Powered by Froala Editor