ଭୁବନେଶ୍ୱର: ନ୍ୟାଶନାଲ କାଉନ୍‌ସିଲ ଅଫ୍‌ ଏଜୁକେଶନାଲ ରିସର୍ଚ୍ଚ ଆଣ୍ଡ୍‌ ଟ୍ରେନିଂ(ଏନ୍‌ସିଇଆର୍‌ଟି)ର ସପ୍ତମ ଶ୍ରେଣୀ ଇଂଲିଶ ବହି ‘ହନିକମ୍ବ’ରେ ଜାତୀୟ ଯୁଦ୍ଧ ରକୀ(ନ୍ୟାଶନାଲ ଓ୍ବାର୍‌ ମେମୋରିଆଲ) ସମ୍ପର୍କିତ ବିଷୟବସ୍ତୁ ସାମିଲ ହୋଇଛି। ବିଷୟର ନାଁ ରହିଛି ‘ଏ ହୋମେଜ୍‌ ଟୁ ଆୱାର ବ୍ରେଭ୍‌ ସୋଲଜର୍ସ’। ଉକ୍ତ ବହିର ଶେଷ ବିଷୟ ଭାବେ ଛାତ୍ରୀଛାତ୍ର ଏହାକୁ ପଢ଼ିବେ। ଏବେ ଏହି ବହିର ଇ-ସଂସ୍କରଣ କାଉନ୍‌ସିଲର ୱେବ୍‌ସାଇଟ୍‌ରେ ଉପଲବ୍ଧ ହେଉଛି। ସ୍କୁଲ ଛାତ୍ରୀଛାତ୍ରଙ୍କ ଭିତରେ ଦେଶପ୍ରେମ, ଦେଶଭକ୍ତି ଓ ସାହସ ଜଗାଇବା

ଉଦ୍ଦେଶ୍ୟରେ ଜାତୀୟ ଯୁଦ୍ଧ ସ୍ମାରକୀକୁ ପାଠ୍ୟକ୍ରମରେ ସାମିଲ କରାଯାଇଥିବା ପ୍ରତିରକ୍ଷା ମନ୍ତ୍ରାଳୟ ପକ୍ଷରୁ କୁହାଯାଇଛି। ଦେଶ ନିର୍ମାଣ କ୍ଷେତ୍ରରେ ଯୁବପିଢ଼ିଙ୍କୁ ଉଦ୍‌ବୁଧ କରିବା ଲାଗି ଶିକ୍ଷା ମନ୍ତ୍ରଣାଳୟ ସହ ମିଳିତ ଭାବେ ଏହି ନିଷ୍ପତ୍ତି ନେଇଥିଲା ପ୍ରତିରକ୍ଷା ମନ୍ତ୍ରଣାଳୟ। ଏହି ବିଷୟରେ ଯୁଦ୍ଧ ସ୍ମାରକୀର ଇତିହାସ, ତାତ୍ପର୍ଯ୍ୟ ଏବଂ ଅବଧାରଣା ସମ୍ପର୍କରେ ଉଲ୍ଲେଖ କରାଯାଇଛି, ଯେଉଁଥିରୁ ସ୍ବାଧୀନତା ପରେ ଭାରତୀୟ ସେନା ବୀର ଓ ସାହସୀ ଯୋଦ୍ଧାଙ୍କ ବଳିଦାନ ସମ୍ପର୍କରେ ପିଲାଏ ଅବଗତ ହୋଇପାରିବେ। ସୂଚନାଯୋଗ୍ୟ, ନୂଆଦିଲ୍ଲୀରେ ୨୦୧୯ ଫେବୃୟାରୀ ୨୫ରେ ଏହି ନ୍ୟାଶନାଲ ଓ୍ବାର୍‌ ମେମୋରିଆଲକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉଦ୍‌ଘାଟନ କରିଥିଲେ।

Powered by Froala Editor