ମୟୂରକୁ ନିର୍ଯାତନା, ପର ଛିଣ୍ଡାଇ ରିଲ୍ କଲେ ଯୁବକଯୁବତୀ
ସୋସିଆଲ ମିଡିଆରେ କିଛି ଅଲଗା କରି ଦେଖାଇବାର ନିଶା ସମସ୍ତଙ୍କୁ ଘାରିଛି । ହେଲେ ପଶୁପକ୍ଷୀଙ୍କୁ ନିର୍ଯାତନା ଦେଇ ଭାଇରାଲ ହେବାକୁ ଯାଇ ଦୁଇ ଜଣ ଯୁବକଯୁବତୀ ଅତି ଘୃଣ୍ୟ କାମ କରିଛନ୍ତି । ଏକ ମୟୂରକୁ ନିର୍ଯାତନା ଦେବା ସହ ତାର ସବୁ ପର ଛିଣ୍ଡାଇ ଦେଇଛନ୍ତି । ତେବେ ଏହି ଭିଡିଓ ଭାଇରାଲ ହେବା ପରେ ପୁଲିସ ସେମାନଙ୍କୁ ଧରିବାକୁ ଖୋଜୁଛି । ଏ ଘଟଣା ମଧ୍ୟପ୍ରଦେଶର କଟନୀ ଜିଲ୍ଲାରେ ଘଟିଛି।
ରିଲ୍ କରିବା ନିଶାରେ ଚୁର୍ ଯୁବକଯୁବତୀ ମୟୂରକୁ ଅକଥନୀୟ ନିର୍ଯାତନା ଦେବାକୁ ପଛାଇଲେ ନାହିଁ। ସେମାନେ ମୟୂରଟିକୁ ଅତି ନିର୍ଦ୍ଦୟ ଭାବେ ତା’ର ପର ଗୋଟି ଗୋଟି କରି ଛିଣ୍ଡାଇବାକୁ ଲାଗିଲେ । ଭିଡିଓ ଭାଇରାଲ ହେବା ପରେ ପୁଲିସ୍ ଓ ବନ ବିଭାଗ ଉଭୟଙ୍କ ସନ୍ଧାନ ଆରମ୍ଭ କରି ଦେଇଛନ୍ତି। ଭିଡିଓରେ ଯୁବକଙ୍କ ବାଇକ୍ ନମ୍ବର ଦେଖାଯାଉଥିବା ବେଳେ ତାହାକୁ ଆଧାର କରି ପୁଲିସ୍ ତଦନ୍ତ ଆରମ୍ଭ କରିଛି । ତଦନ୍ତରୁ ଯୁବକଙ୍କ ନାମ ଅତୁଳ ଓ ସେ ରିଠି ଅଞ୍ଚଳର ବାସିନ୍ଦା ବୋଲି ଜଣାଯାଇଛି।
ଏହି ଭିଡିଓ ଭାଇରାଲ ହେବା ପରେ ପରିବେଶବିତମାନେ ଉଦବେଗ ପ୍ରକାଶ କରିଥିବା ବେଳେ ସୋଶାଲ ମିଡିଆରେ ବି ଖୁବ୍ ଅସନ୍ତୋଷ ପ୍ରକାଶ ପାଇଛି।
Powered by Froala Editor
