ଭୁବନେଶ୍ୱର : ମେଡିକାଲ ଟର୍ମିନେସନ୍‌‌ ଅଫ୍‌‌ ପ୍ରେଗନାନ୍ସି (ଏମ୍‌‌ଟିପି) ଆଇନ୍‌‌ କାର୍ୟ୍ୟାନ୍ୱୟନରେ ଉଲ୍ଲେଖନୀୟ ସଫଳତା ପାଇଁ ଜାତୀୟ ସ୍ତରରେ ସମ୍ମାନିତ ହୋଇଛି ଓଡ଼ିଶା। ଆଜି ନୂଆଦିଲ୍ଲୀଠାରେ ବିଶ୍ୱ ସ୍ୱାସ୍ଥ୍ୟ ସଂଗଠନ ଏବଂ ଜାତୀୟ ସ୍ୱାସ୍ଥ୍ୟ ମିଶନ୍‌‌ ଆନୁକୂଲ୍ୟରେ ଆୟୋଜିତ ସମନ୍ୱିତ ଗର୍ଭପାତ ସେବା ଜାତୀୟ ସମ୍ମିଳନୀରେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗକୁ ସମ୍ମାନିତ କରାଯାଇଛି।
୨୦୨୧ ବର୍ଷରେ ଉଲ୍ଲେଖନୀୟ ପ୍ରଦର୍ଶନ ପାଇଁ ଓଡ଼ିଶା ପୁରସ୍କୃତ ହୋଇଛି। ସୂଚନାଯୋଗ୍ୟ ଯେ କୌଣସି କାରଣରୁ ଗର୍ଭବତୀ ମହିଳାଙ୍କର ଗର୍ଭପାତ କରିବା ପାଇଁ ଜରୁରୀ ଥିଲେ ସରକାରଙ୍କଠାରୁ ଅନୁମତି ନେବା ପ୍ରକ୍ରିୟାକୁ ସରଳ କରାଯାଇଛି। ଏଥିପାଇଁ ସରକାର ଆଉ ୧୦ଟି ମେଡିକାଲ ବୋର୍ଡ ସ୍ଥାପନ କରିବା ପାଇଁ ପଦକ୍ଷେପ ନେଇଛନ୍ତି। ପୂର୍ବରୁ କେବଳ କଟକ ସ୍ଥିତ ଏସ୍‌‌ସିବି ମେଡିକାଲ କଲେଜରେ ଗୋଟିଏ ମାତ୍ର ମେଡିକାଲ ବୋର୍ଡ ରହିଥିବାରୁ ଏହା ଉପରେ ଚାପ ରହୁଥିଲା ଏବଂ ନିଷ୍ପତ୍ତି ନେବାରେ ବିଳମ୍ବ ହେଉଥିଲା। ଗର୍ଭ ଧାରଣ କରିବାର ୨୪ ସପ୍ତାହ ଅବା ୬ ମାସ ପରେ ଗର୍ଭପାତ କରିବା ଲାଗି ସରକାରଙ୍କ ଅନୁମତି ନେବା ଜରୁରୀ। ସମ୍ବେଦନଶୀଳ ଅବା ଜରୁରୀ ପରିସ୍ଥିତିରେ ଗର୍ଭପାତ କରିବାକୁ ହୋଇଥାଏ।
ଏହି ପରିପ୍ରେକ୍ଷୀରେ ତୁରନ୍ତ ନିଷ୍ପତ୍ତି ପାଇଁ ସରକାର ଆଉ ୧୦ଟି ମେଡିକାଲ କଲେଜ ଏବଂ ଏମ୍‌‌ସ୍‌‌ ଭୁବନେଶ୍ୱରରେ ଗୋଟିଏ ଲେଖାଏଁ ବୋର୍ଡ ପ୍ରତିଷ୍ଠା କରିଛନ୍ତି। ବ୍ରହ୍ମପୁର ଏମ୍‌‌କେସଜି ମେଡିକାଲ କଲେଜ, ବୁର୍ଲାର ଭିଏସ୍‌‌ଏସ୍‌‌ ମେଡିକାଲ କଲେଜ, ବାଲେଶ୍ୱରର ଏଫ୍‌‌ଏମ୍‌‌ ମେଡିକାଲ କଲେଜ, ମୟୂରଭଞ୍ଜର ପିଆରଏମ୍‌‌ ମେଡିକାଲ କଲେଜ, ବଲାଙ୍ଗିରର ବିବି ମେଡିକାଲ କଲେଜ, କୋରାପୁଟର ଏସ୍‌‌ଏଲ୍‌‌ଏନ୍‌‌ ମେଡିକାଲ କଲେଜ, ପୁରୀର ଶ୍ରୀ ଜଗନ୍ନାଥ ମେଡିକାଲ କଲେଜ, କେନ୍ଦୁଝର ସରକାରୀ ମେଡିକାଲ କଲେଜ, ସୁନ୍ଦରଗଡ଼ ମେଡିକାଲ କଲେଜ, ଏମ୍‌‌ସ୍‌‌ ଭୁବନେଶ୍ୱର ଏବଂ ଭୁବନେଶ୍ୱର ସ୍ଥିତ ପିଜି ଇନଷ୍ଟିଚ୍ୟୁଟ୍‌‌ ଅଫ୍‌‌ ମେଡିକାଲ ଏଜୁକେସନ୍‌‌ ଆଣ୍ଡ ରିସର୍ଚ୍ଚରେ ବୋର୍ଡ ଗଠନ କରାଯାଇଛି।

Powered by Froala Editor