ଭୁବନେଶ୍ୱର:  ୨୦୧୭ରୁ ୨୦୨୩ ଭିତରେ ଓଡ଼ିଶାରେ ମୁଣ୍ଡପିଛା ଆୟ ବଢିଛି। ପଛରେ ପଡିଛନ୍ତି ଉତ୍ତରପ୍ରଦେଶ ଓ ଗୁଜରାଟ। ଏହି ୬ବର୍ଷ ଭିତରେ ଓଡ଼ିଶାରେ ମୁଣ୍ଡପିଛା ଆୟ ୭୩ପ୍ରତିଶତକୁ ବଢିଛି। ହେଲେ ବିଜେପି ଶାସିତ ଉତ୍ତରପ୍ରଦେଶ ଏହି ତାଲିକାର ସବୁଠାରୁ ତଳେ ରହିଛି। ଲଗାତର ଦୁଇ ଦୁଇ ଥର ୟୁପିରେ ଯୋଗୀ ସରକାର ଥାଇ ମଧ୍ୟ ମୁଣ୍ଡ ପିଛା ଆୟ ମାତ୍ର ୪୦ପ୍ରତିଶତରେ ସୀମିତ ରହିଛି। ସେହିପରି କେନ୍ଦ୍ର ଓ ରାଜ୍ୟ ବିଜେପି ବିକାଶର ଯେଉଁ ଗୁଜରାଟ ମଡେଲକୁ ନେଇ ବାହସ୍ଫୋଟ ମାରୁଛନ୍ତି, ସେହି ଗୁଜରାଟର ମୁଣ୍ଡପିଛା ଆୟ ୟୁପିଠାରୁ ମାତ୍ର ଏକ ପ୍ରତିଶତ ଉପରେ ରହିଛି।

ବିଜେପି ବିକାଶର ମଡେଲ ଷ୍ଟେଟ ଭାବେ ଜଣାଶୁଣା ଗୁଜରାଟରେ ଗତ ୬ବର୍ଷ ଭିତରେ ମାତ୍ର ୪୧ପ୍ରତିଶତରେ ପହଞ୍ଚିଛି ମୁଣ୍ଡ ପିଛା ଆୟ। ଛତିଶଗଡ଼, ରାଜସ୍ଥାନ, କର୍ଣ୍ଣାଟକ, ମଧ୍ୟପ୍ରଦେଶ ଓ ତେଲେଙ୍ଗାନା ବି ମୁଣ୍ଡପିଛା ଆୟ ବୃଦ୍ଧିରେ ଓଡ଼ିଶାର ସମକକ୍ଷ ହୋଇନଥିବା କେନ୍ଦ୍ର ପରିସଂଖ୍ୟାନ ନିର୍ଦ୍ଦେଶାଳୟ ସର୍ଭେ ରିପୋର୍ଟରୁ ଜଣାପଡିଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସରକାରର ପ୍ରଥମ ପାଳି ପୂର୍ବରୁ ରାଜ୍ୟରେ ଅତି ନୈରାଶ୍ୟଜନକ ସ୍ଥିତିରେ ଥିଲା ମୁଣ୍ଡପିଛା ଆୟ। ୧୯୯୯ ମହାବାତ୍ୟା ରାଜ୍ୟର ଅର୍ଥନୀତିକୁ ଦୋହଲାଇ ଦେଇଥିଲା। ସେ ସମୟରେ ମୁଣ୍ଡପିଛା ଆୟ ମାତ୍ର ୧୩,୦୧୨ ଥିଲା। ନବୀନ ସରକାର ଆସିବା ପରେ ଆରମ୍ଭ ହୋଇଥିଲା ଆର୍ଥିକ ସଂସ୍କାର। ଠିକ୍ ସମୟରେ ଦରମା ପାଉ ନଥିବା ସରକାରୀ କର୍ମଚାରୀ ବି ମାସ ଶେଷକୁ ଦରମା ପାଇଲେ। ୨୦୧୭-୧୮ରେ ରାଜ୍ୟରେ ମୁଣ୍ଡ ପିଛା ଆୟ ୮୭,୦୫୫ ଟଙ୍କା ଥିଲା। ୩୧ ମାର୍ଚ୍ଚ ୨୦୨୨ ସୁଦ୍ଧା ଏହା ୧ଲକ୍ଷ ୨୮ ହଜାର ୮୭୩ ଟଙ୍କା ପହଞ୍ଚିଥିଲା।୨୦୨୨-୨୩ ଆର୍ଥିକ ବର୍ଷ ଶେଷ ସୁଦ୍ଧା ଏହା ୧ଲକ୍ଷ ୫୦ ହଜାର ୬୭୬ରେ ପହଞ୍ଚିଛି। ୧୯୯୯-୨୦୦୦ରେ ରାଜ୍ୟର ମୁଣ୍ଡପିଛା ଆୟ ତୁଳନାରେ ମୁଣ୍ଡ ପିଛା ଋଣ ୨.୬୫ ଗୁଣ ଥିଲା। ବର୍ତ୍ତମାନ ମୁଣ୍ଡ ପିଛା ଆୟ ବୃଦ୍ଧି ପାଇ ମୁଣ୍ଡ ପିଛା ଋଣର ୫.୮ ଗୁଣାରେ ପହଞ୍ଚିଛି। ଏପରି ସ୍ଥିତିରେ ଏଫଆରବିଏମ୍ ନିୟମ ଅନୁସାରେ, ଯେକୌଣସି ରାଜ୍ୟ ୨୫ ପ୍ରତିଶତ ଋଣ କରିପାରିବ। ମହାରାଷ୍ଟ୍ର ପରି ବିକାଶିତ ରାଜ୍ୟ ୨୫ପ୍ରତିଶତ ଋଣ ଅତିକ୍ରମ କରିଥିବା ବେଳେ ଓଡ଼ିଶାର ଋଣ ପରିମାଣ ୧୭ରୁ ୧୯ ପ୍ରତିଶତରେ ସୀମିତ ରହିଛି। ରାଜ୍ୟରେ ଋଣ ଭାର ହ୍ରାସ କରିବା ପାଇଁ ଅନେକ ସଂସ୍କାରମୂଳକ ପଦକ୍ଷେପ ନେଇଛନ୍ତି ରାଜ୍ୟ ସରକାର। ରାଜସ୍ବ ବଳକା ସୃଷ୍ଟି କରି ଋଣ ଉପରେ ଥିବା ନିର୍ଭରଶୀଳତା କମ୍ କରାଯାଇଛି। ୨୦୦୬-୦୭ରୁ ୨୦୧୩-୧୪ ଓ ୨୦୨୧-୨୨ରୁ ଏଯାଏ ଖୋଲା ବଜାରରୁ ଋଣ ନିଆଯାଇନି। ସେହିପରି ଉଚ୍ଚ ସୁଦ୍ଧହାର ବିଶିଷ୍ଟ ଋଣକୁ ଆଗୁଆ ପଇଠ କରାଯାଇଥିବା ବେଳେ ଜାତୀୟ ସ୍ବଳ୍ପ ସଞ୍ଚୟ ପାଣ୍ଠିରୁ ମଧ୍ୟ ୨୦୧୬-୧୭ରୁ ଏଯାବତ୍ କୌଣସି ଋଣ ନିଆଯାଇନାହିଁ।

Powered by Froala Editor