ପାକିସ୍ତାନ ବିରୋଧରେ ଭାରତୀୟ ସେନା ପକ୍ଷରୁ କରାଯାଇଥିବା ସାମରିକ ଅଭିଯାନ ‘ଅପରେସନ୍ ସିନ୍ଦୂର’ର ଏକବର୍ଷ ପୂରଣ ହୋଇଛି। ଗତବର୍ଷ ଏପ୍ରିଲ ୨୨ରେ ପାକ୍ ଆତଙ୍କୀ ଦେଇଥିବା ଏହି କ୍ଷତର ଜବାବ ଭୀଷଣ ହୋଇଥିଲା । ଭାରତୀୟ ସେନା ଯୋଜନାବଦ୍ଧ ଭବେ ମେ ୭ ତାରିଖରେ ପାକିସ୍ତାନ ଭିତରେ ପଶି ଆତଙ୍କୀ ଶିବିରଗୁଡିକୁ ମିସାଇଲ ମାଡ କରି ଛାରଖାର କରିଦେଲେ । ଏହି ପ୍ରତିଶୋଧ ଅଭିଯାନର ନାଁ ରହିଥିଲା 'ଅପରେସନ ସିନ୍ଦୂର' । ଆଜି ଏହି ମିଶନକୁ ବର୍ଷେ ପୂରଣ ହୋଇଛି । ଏହି ଅବସରରେ ପ୍ରଧାନମନ୍ତ୍ରୀ ମୋଦି ତାଙ୍କ ଏକ୍ସ ଡିପି 'ଅପରେସନ ସିନ୍ଦୂର' ରଖିଛନ୍ତି ଏବଂ ସେନାର ସାହାସିକତାକୁ ସଲାମ୍ କରିଛନ୍ତି ।

'ଅପରେସନ ସିନ୍ଦୂର'ର ଗୋଟିଏ ବର୍ଷ ପୂରଣ ଅବସରରେ ପ୍ରଧାନମନ୍ତ୍ରୀ ମୋଦୀ କହିଛନ୍ତି - " ଗୋଟିଏ ବର୍ଷ ପୂର୍ବେ, 'ଅପରେସନ ସିନ୍ଦୂର' ସମୟରେ, ଆମର ସଶସ୍ତ୍ର ବାହିନୀ ଅତୁଳନୀୟ ସାହସ, ସଠିକତା ଏବଂ ଦୃଢ଼ ସଂକଳ୍ପ ପ୍ରଦର୍ଶନ କରିଥିଲେ । ପହଲଗାମରେ ନିରୀହ ଭାରତୀୟଙ୍କ ଉପରେ ଆକ୍ରମଣ କରିବାକୁ ସାହସ କରୁଥିବା ଲୋକଙ୍କୁ ସେମାନେ ଉପଯୁକ୍ତ ଜବାବ ଦେଇଥିଲେ। ସମଗ୍ର ଦେଶ ଆମ ବାହିନୀର ବୀରତ୍ୱକୁ ସଲାମ କରୁଛି । ଆମେ ଆତଙ୍କବାଦୀଙ୍କ ଇକୋସିଷ୍ଟମକୁ ହରାଇବୁ ।''

୨୦୨୫ ମେ’ ୬ ତାରିଖ ବିଳମ୍ବିତ ରାତି (୭ ତାରିଖ)ରେ ଭାରତୀୟ ସେନା ଦ୍ୱାରା ଏହି ଅପରେସନ୍ ଆରମ୍ଭ କରାଯାଇଥିଲା। ଜାମ୍ମୁ-କାଶ୍ମୀରର ପହଲଗାଓଁରେ ହୋଇଥିବା ଆତଙ୍କବାଦୀ ଆକ୍ରମଣର ଜବାବ ଦେବା ପାଇଁ ଭାରତୀୟ ସେନା ପାକିସ୍ତାନ ଅଧିକୃତ କାଶ୍ମୀର (ପିଓକେ) ରେ ଥିବା ପ୍ରାୟ ୯ଟି ଆତଙ୍କବାଦୀ ଶିବିର ଉପରେ ଆକ୍ରମଣ କରିଥିଲା। ଭାରତର ଏହି ଆକ୍ରମଣ ଉପରେ ପାକିସ୍ତାନ ପ୍ରତିଆକ୍ରମଣ କରିବାରୁ ଦୁଇ ଦେଶ ମଧ୍ୟରେ ସଂଘର୍ଷ ହୋଇଥିଲା। ମେ ୭ ତାରିଖରୁ ୧୦ ତାରିଖ ପର୍ଯ୍ୟନ୍ତ ଏହି ସାମରିକ ସଂଘର୍ଷ ଲାଗି ରହିଥିଲା। ଶେଷରେ ପାକିସ୍ତାନର ଅନୁରୋଧ କ୍ରମେ ଏହି ସଂଘର୍ଷର ଅସ୍ତ୍ରବିରତି ହୋଇଥିଲା। ଅସ୍ତ୍ରବିରତି ଯୋଗୁଁ ଏହି ଅଭିଯାନ ଏବେ ବନ୍ଦ ରହିଛି। 

Powered by Froala Editor