କରୋନା ଦ୍ୱିତୀୟ ଲହରୀରେ ସଂକ୍ରମଣ କିଛିଟା କମିଥିଲେ ବି ମୃତ୍ୟୁରେ ବ୍ରେକ୍ ଲାଗୁନି ।  ଭାରତ କରୋନାଜନିତ ମୃତ୍ୟୁ ମାମଲାରେ ତୃତୀୟ ସ୍ଥାନରେ ପହଞ୍ଚିଛି। ପ୍ରଥମରେ ଆମେରିକା ରହିଥିବା ବେଳେ ବ୍ରାଜିଲ ଦ୍ଵିତୀୟରେ ରହିଛି। ଭାରତରେ କରୋନାଜନିତ ମୃତ୍ୟୁ ସଂଖ୍ୟା ୩ ଲକ୍ଷ ଟପିଛି। ଆମେରିକାରେ ୩୧ ଦିନ ମଧ୍ୟରେ ସର୍ବାଧିକ ୧ ଲକ୍ଷ ଲୋକ ପ୍ରାଣ ହରାଇଥିଲେ। କିନ୍ତୁ ଭାରତ ଏହି ରେକର୍ଡକୁ ମଧ୍ୟ ଅତିକ୍ରମ କରିଯାଇଛି। କରୋନାର ଦ୍ୱିତୀୟ ୱେଭ ସବୁଠାରୁ ଅଧିକ ଲୋକଙ୍କ ଜୀବନ ନେଇଛି।

ସ୍ଵାସ୍ଥ୍ୟ ମନ୍ତ୍ରଣାଳୟ ଅନୁଯାୟୀ, କରୋନାରେ ଦେଶରେ ୨,୯୯, ୨୬୬ ଜଣଙ୍କ ମୃତ୍ୟୁ ଘଟିଛି। ଏଥିରେ ରାଜ୍ୟ ଗୁଡିକର ସଦ୍ୟତମ ତଥ୍ୟକୁ ଯୋଡି ଦେଲେ ଏହା ତିନି ଲକ୍ଷ ଅତିକ୍ରମ କରିବ। ମେ ୨୩ ତାରିଖ ସନ୍ଧ୍ୟାରେ ରାଜ୍ୟଗୁଡିକ ପକ୍ଷରୁ ଜାରି ସଦ୍ୟତମ ତଥ୍ୟ ଅନୁସାରେ, ଗତ ୨୪ ଘଣ୍ଟାରେ ମହାରାଷ୍ଟ୍ରରେ ୫୯୪, ଦିଲ୍ଲୀରେ ୧୮୯, ରାଜସ୍ଥାନରେ ୧୧୩, ପୁଡୁଚେରୀରେ ୩୪, ଛତିଶଗଡରେ ୯୨ ଓ ଓଡିଶାରେ ୨୮ ଜଣଙ୍କ କୋଭିଡ୍-୧୯ରେ ପ୍ରାଣହାନୀ ଘଟିଛି।

ସ୍ଵାସ୍ଥ୍ୟ ମନ୍ତ୍ରଣାଳୟ ଅନୁଯାୟୀ, ବିଶ୍ଵ ମହାମାରୀରେ ଯେଉଁ ରାଜ୍ୟରେ ସର୍ବାଧିକ ମୃତ୍ୟୁ ଘଟିଛି ସେଥିରେ  ମହାରାଷ୍ଟ୍ରରେ ୮୭,୩୦୦ , କର୍ଣ୍ଣାଟକରେ ୨୪,୬୫୮, ଦିଲ୍ଲୀରେ ୨୩,୦୧୩, ତାମିଲନାଡୁରେ ୨୦,୦୪୬, ଉତ୍ତର ପ୍ରଦେଶରେ ୧୮,୯୭୮, ପଶ୍ଚିମବଙ୍ଗରେ ୧୪,୨୦୮, ପଞ୍ଜାବରେ ୧୩,୦୮୯ ଓ ଛତିଶଗଡରେ ୧୨,୪୯୪ ଜଣଙ୍କ ପ୍ରାଣହାନୀ ଘଟିଛି।  ଅନ୍ୟପକ୍ଷରେ ଅଧିକାଂଶ ବିଶେଷଜ୍ଞଙ୍କ ମତରେ, ସରକାରୀ ସଂଖ୍ୟାଠାରୁ ଆହୁରି ଅଧିକ ଲୋକ କରୋନାରେ ପ୍ରାଣ ହରାଇଛନ୍ତି। ତଥାପି ଏହା ସରକାରୀ ତାଲିକାରେ ସ୍ଥାନ ପାଇନି। ତେଣୁ ଭାରତରେ କରୋନା ଆହୁରି ଲକ୍ଷାଧିକ ଲୋକଙ୍କ ଜୀବନ ନେଇଛି। 

Powered by Froala Editor