ତିବ୍ବତୀୟ ଧର୍ମଗୁରୁ ଦଲାଇ ଲାମା ଆମେରିକାରେ ଜନ୍ମିତ ମଙ୍ଗୋଲିଆ ବାଳକକୁ ତୃତୀୟ ଗୁରୁତ୍ୱପୂର୍ଣ୍ଣ ଆଧ୍ୟାତ୍ମିକ ନେତା ଭାବେ ମାନ୍ୟତା ଦେଇଛନ୍ତି। ବୌଦ୍ଧ ଧର୍ମର ଗୁରୁ ଦଲାଇ ଲାମା ପିଲାଟିକୁ ୧୦ମ ଖାଲଖା ଜେଟସୁନ ଧମପା ରିନପୋଚେ ମାନ୍ୟତା ଦେଇଛନ୍ତି। ଏଥିପାଇଁ ମାର୍ଚ୍ଚ ୮ ତାରିଖରେ ସ୍ୱତନ୍ତ୍ର କାର୍ଯ୍ୟକ୍ରମ ଆୟୋଜନ କରାଯାଇଥିଲା। ତେବେ 

ଦଲାଇ ଲାମା ଓ ପଞ୍ଚେନ ଲାମାଙ୍କ ପରେ ବୌଦ୍ଧ ଧର୍ମର ତୃତୀୟ ଶ୍ରେଷ୍ଠ ଧାର୍ମିକ ନେତା ପାଲଟିଛି ଏହି ବାଳକ । ଏହି ବାଳକର ବୟସ ୮ ବର୍ଷ ହେବ । ହିମାଚଳ ପ୍ରଦେଶର ଧର୍ମଶାଳାରେ ଆୟୋଜିତ କାର୍ଯ୍ୟକ୍ରମରେ ପିଲାଟିକୁ ମୁକୁଟ ଦେଇ ଦଲାଇ ଲାମା ବିଧିବଦ୍ଧ ଭାବେ ତିବ୍ଦତୀୟ ବୌଦ୍ଧ ଧର୍ମର ତୃତୀୟ ସର୍ବୋଚ୍ଚ ମୁଖ୍ୟର ମାନ୍ୟତା ପ୍ରଦାନ କରିଛନ୍ତି। 

ରିପୋର୍ଟ ଅନୁଯାୟୀ, ଏହି ବାଳକ ଯାଆଁଳା ପୁଅଙ୍କ ମଧ୍ୟରୁ ଅନ୍ୟତମ । ଏହି ଦୁଇ ଜଣଙ୍କ ନାମ ହେଉଛି ଆଗୁଇଡାଇ ଓ ଅଚିଲତାଇ ଅଲତାନାର । ତାଙ୍କ ପିତାମାତାଙ୍କ ନାମ ଅଲଟ୍ନର ଚିଞ୍ଚୁଲୁନ୍ ଏବଂ ମନୋଖନାସନ ନର୍ମଦଖ୍ । ପିଲାଟିର ପିତା ଅଲଟନର ଚିଞ୍ଚୁଲୁନ ଜଣେ ବିଶ୍ୱବିଦ୍ୟାଳୟ ଗଣିତ ଅଧ୍ୟାପକ । ନାବାଳକର ଜେଜେମା, ଗର୍ମଜାଭ ସେଡେନ ଜଣେ ପୂର୍ବତନ ମଙ୍ଗୋଲିଆ ସାଂସଦ । 

ଦଲାଇ ଲାମାଙ୍କର ଏହି ନିଷ୍ପତ୍ତିକୁ ନେଇ ଚୀନ ଅସନ୍ତୋଷ ପ୍ରକାଶ କରିବାର ସମ୍ଭାବନା ରହିଛି। କାରଣ ତିବ୍ଦତୀୟ ଅଞ୍ଚଳକୁ ଚାଇନା ନିଜର କହିବା ସହ ସେଠାରେ ନିଜ ଇଚ୍ଛାରେ ବୌଦ୍ଧ ଧର୍ମର ଲୋକଙ୍କ ପାଇଁ ମୁଖ୍ୟ ଚୟନ କରିଥାଏ। ହେଲେ ଭାରତରେ ନିର୍ବାସିତ ଭାବେ ରହୁଥିବା ଦଲାଇ ଲାମା ନିଜ ଇଚ୍ଛାରେ ୮ ବର୍ଷର ପିଲାଟିକୁ ତୃତୀୟ ସର୍ବୋଚ୍ଚ ନେତାର ମାନ୍ୟତା ଦେଇଛନ୍ତି। ଏପରି ପଦକ୍ଷେପ ଚାଇନାକୁ ବ୍ୟଥିତ କରିପାରେ। 

Powered by Froala Editor