୨୦୧୭ରୁ ବାରିପଦା ପିଆରଏମ ଏଠାରେ ମେଡିକାଲ କଲେଜ ପ୍ରତିଷ୍ଠା ହୋଇଥିଲେ ସୁଦ୍ଧା ଆଜି ଯାଏଁ ଏଠାରେ ପୂର୍ଣ୍ଣାଙ୍ଗ ମେଡିକାଲ କଲେଜର ସ୍ୱାସ୍ଥ୍ୟସେବା ଓ ସୁବିଧା ଉପଲବ୍ଧ ହୋଇପାରିନି । ମେଡିକାଲ କଲେଜ ଆରମ୍ଭରୁ ବିଭିନ୍ନ ବିଭାଗ ରହିଥିଲେ ବି ବର୍ଷ ବର୍ଷ ଧରି ବିଭିନ୍ନ ପଦବୀ ଖାଲିପଡିଛି । କେଉଁଠି ବିଭାଗୀୟ ମୁଖ୍ୟ ନାହାନ୍ତିି ତ କେଉଁଠି ବର୍ଷ ବର୍ଷ ଧରି ସେହି ବିଭାଗୀୟ ମୁଖ୍ୟ ନ ଆସି ଛୁଟିରେ ରହୁଛନ୍ତି । ପୁଣି ଅଧିକାଂଶ ବିଭାଗୀୟ ମୁଖ୍ୟ ପାଳିରେ ଆସୁଥିବା ଅଭିଯୋଗ ହୋଇଛି ।

ତଥ୍ୟ ମୁତାବକ ପିଆରଏମ୍ ମେଡିକାଲ କଲେଜରେ ବର୍ତ୍ତମାନ ୫୦ପ୍ରତିଶତରୁ ଅଧିକ ପଦବୀ ଖାଲି ପଡିଛି । ଏହି ମେଡିକାଲ କଲେଜରେ ମୋଟ ୨୩ଟି ବିଭାଗ ଥିବା ବେଳେ ମୋଟ ୨୦୧ଟି ଅନୁମୋଦିତ ପଦବୀ (ସେଙ୍କସନପୋଷ୍ଟ) ରହିଛି । ସେଥି ମଧ୍ୟରୁ ବର୍ତ୍ତମାନ ୧୦୩ଟି ପଦଦୀ ଖାଲି ପଡିଥିବା ବେଳେ ନିକଟରେ ଆଉ ଦୁଇଟି ପଦବୀ ମଧ୍ୟ ଖାଲି ପଡିବାର ସମ୍ଭାବନା ରହିଛି । ଅର୍ଥାତ ୨୦୧ରୁ ୧୦୫ଟି ପଦବୀ ଖାଲି ପଡିବା ନିଶ୍ଚିତ ।

ଏମାରଜେନ୍ସି ମେଡିସିନ ଏବଂ ଫିଜିକାଲ ମେଡିସିନ ଦୁଇଟି ବିଭାଗ ସଂପୂର୍ଣ୍ଣ ଖାଲି ପଡିଛି । ଅର୍ଥାତ ଏହି ଦୁଇଟି ବିଭାଗ ଥିଲେ ମଧ୍ୟ କୌଣସି ପୋଷ୍ଟରେ କାହାକୁ ଏ ଯାଏଁ ପୋଷ୍ଟିଂ ଦିଆ ଯାଇ ନଥିବାରୁ ଏହି ଦୁଇଟି ବିଭାଗ ନଥିବା ସହିତ ସମାନ । ଗତ ୪ବର୍ଷରୁ ଅଧିକ ସମୟ ଧରି ପାଥୋଲଜି ବିଭାଗର ବିଭାଗୀୟ ମୁଖ୍ୟ ଏବଂ ଆନାଟୋମି ବିଭାଗର ଆସୋସିଏଟ ପ୍ରଫେସର ଛୁଟିରେ ଥିଲେ ସୁଦ୍ଧା ନା ତାଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ହେଉଛି ନା ସେମାନଙ୍କୁ ଅନ୍ୟତ୍ର ବଦଳି ହେଉଛି ।

ବର୍ତ୍ତମାନ ସ୍ତ୍ରୀ ଓ ପ୍ରସୂତି ବିଭାଗରେ ୬ଟି ପଦବୀ ଖାଲି ପଡିଥିବା ବେଳେ ଶଲ୍ୟବିଭାଗ(ସର୍ଜରୀ)ରେ ୧୦ଟି ପଦବୀ, ପାଥୋଲଜିରେ ୩ଟି ପଦବୀ, ଫାର୍ମାକୋଲୋଜିରେ ୫ଟି ପଦବୀ, ବାୟୋକେମେଷ୍ଟ୍ରିରେ ୨ଟି ପଦବୀ ଖାଲି ପଡିଛି ।

ସେପଟେ ବିଭିନ୍ନ ବିଭାଗରେ ଖାଲିପଡିଥିବା ପଦବୀ ପୂରଣ ପାଇଁ ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ କୌଣସି ପଦକ୍ଷେପ ନେଇ ନଥିବାରୁ ମେଡିକାଲ କଲେଜ କର୍ତ୍ତୃପକ୍ଷଙ୍କୁ ଏନଏମସି (ନେସନାଲ ମେଡିକାଲ କାଉନସିଲ) ଚିନ୍ତା ଘାରୁଛି । ଯେ କୌଣସି ମୁହୂର୍ତ୍ତରେ ପରିଦର୍ଶନ ପାଇଁ ଏନଏମସିର ସଦସ୍ୟ ଅଚାନକ ଆସିଗଲେ ମେଡିକାଲ କଲେଜ କର୍ତ୍ତୃପକ୍ଷ ଅକଳରେ ପଡିଯାଇପାରନ୍ତି ।

ଉଲ୍ଲେଖଯୋଗ୍ୟଯେ, ଜନଜାତି ବହୁଳ ମୟୂରଭଞ୍ଜ ଜିଲ୍ଲାରେ ବିଶ୍ୱ ସ୍ତରୀୟ ସ୍ୱାସ୍ଥ୍ୟସେବା ଯୋଗାଇଦେବା ଲକ୍ଷ୍ୟରେ ୨୦୧୭ସେ ପ୍ଟେମ୍ବର ୬ତାରିଖରେ ଖୋଦ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ୱାରା ଏହି ମେଡିକାଲ କଲେଜ ପ୍ରତିଷ୍ଠା ହୋଇଥିଲା । ଇତି ମଧ୍ୟରେ ଏହି ମେଡିକାଲ କଲେଜକୁ ୫ବର୍ଷ ପୂରି ଯାଇଥିଲେ ମଧ୍ୟ ମେଡିକାଲ କଲେଜର ଭିତ୍ତିଭୂମିରେ ସେମିତି କିଛି ଆଖି ଦୃଶିଆ ପରିବର୍ତ୍ତନ ହୋଇନଥିବାରୁ ସାଧାରଣରେ କ୍ଷୋଭ ପ୍ରକାଶ ପାଇଛି ।

Powered by Froala Editor