ଭୁବନେଶ୍ୱର : ସ୍ୱାସ୍ଥ୍ୟମନ୍ତ୍ରୀ ନବ କିଶୋର ଦାସ ଏବେ ଜାତୀୟସ୍ତରରେ ଚର୍ଚ୍ଚା ସୃଷ୍ଟି କରିଛନ୍ତି  । ଜାତୀୟ ଗଣମାଧ୍ୟମରେ ତାଙ୍କୁ ନେଇ ଖବର ପ୍ରକାଶ ପାଇଛି  । ମହାରାଷ୍ଟ୍ରର ପ୍ରସିଦ୍ଧ ଶନି ଶିଙ୍ଗନପୁର ମନ୍ଦିରକୁ ସେ କୋଟିଏ ଟଙ୍କାର ସୁନା କଳସ ଦାନ କରିଛନ୍ତି  । ଏନେଇ ଶ୍ରୀ ଦାସ କିଛି ସ୍ପଷ୍ଟ କରିନଥିଲେ ହେଁ ଭିଡ଼ିଓରୁ ଏହା ସ୍ପଷ୍ଟ ପ୍ରତୀୟମାନ ହେଉଛି  ।

ଇଟିଭି ଭାରତ ଚ୍ୟାନେଲରେ ପ୍ରକାଶିତ ରିପୋର୍ଟ ଅନୁଯାୟୀ, ଓଡ଼ିଶାର ଜଣେ ଭକ୍ତ ୭୦୦ ଗ୍ରାମ ସୁନା ଓ ୫ କିଲୋ ରୂପାରେ ତିଆରି ଏକ କଳସ ଠାକୁରଙ୍କୁ ଦାନ କରିଛନ୍ତି  । ଗତ ଶନିବାର ଥିଲା ଶନି ଅମାବାସ୍ୟା  । ଏହି ଶନି ଅମାବାସ୍ୟାରେ ଶ୍ରୀ ଦାସ ନିଜ ପରିବାରବର୍ଗଙ୍କ ସହ ଶନିଦେବଙ୍କ ଆରାଧନା କରିଥିଲେ  ।

ମନ୍ଦିରର ଜଣେ ପୂଜକ କହିଛନ୍ତିଯେ, ଓଡ଼ିଶାର ଜଣେ ଭକ୍ତ ଠାକୁରଙ୍କୁ ୭୦୦ ଗ୍ରାମ ସୁନା ଓ ୫ କେଜି ରୂପାର ଏକ କଳସ ଦାନ କରିଛନ୍ତି  । ଯାହାର ମୂଲ୍ୟ ପ୍ରାୟ ୧ କୋଟି ହେବ  । ସଂଧ୍ୟା ଆଳତୀ ସମୟରେ ଏହି କଳସଟି ଠାକୁରଙ୍କ ଆଗରେ ରଖାଯାଇଥିଲା  । ତେବେ ପୂଜକ ଜଣଙ୍କ ଭକ୍ତଙ୍କ ନାମ ପ୍ରକାଶ କରିନାହାନ୍ତି  । କିନ୍ତୁ ଭିଡ଼ିଓରେ ନବ ଦାସ ପୂଜା କରୁଥିବା ଦେଖିବାକୁ ମିଳିଛି  ।

କୋଟିଏ ଟଙ୍କାର କଳସ ଶ୍ରୀ ଦାସ ଦାନ କରିଛନ୍ତି ନା ନାହିଁ ତାହା ଆନୁଷ୍ଠାନିକ ଭାବେ ସ୍ପଷ୍ଟ ହୋଇନାହିଁ  । କାହିଁକିନା ମନ୍ଦିର ପକ୍ଷରୁ କିମ୍ବା ନବ ଦାସଙ୍କ ପକ୍ଷରୁ କିଛି କୁହାଯାଇନାହିଁ  । ତେବେ ଜାତୀୟ ଗଣମାଧ୍ୟମ ଓ ସ୍ଥାନୀୟ ଗଣମାଧ୍ୟମରେ ଯେଉଁ ଖବର ପ୍ରକାଶ ପାଇଛି ସେଥିରୁ ନବ ଦାସ ହିଁ ଦାନ କରିଥିବା ଅନୁମାନ କରାଯାଉଛି  । ଏନେଇ ଶ୍ରୀ ଦାସଙ୍କ ସହ ଯୋଗାଯୋଗ କରାଯାଇଥିଲେବି ତାହା ସ୍ପଷ୍ଟ ହୋଇନାହିଁ  ।

Powered by Froala Editor