ଘରୋଇ ସେୟାର ବଜାରରେ ଏକ ଭୟଙ୍କର ସୁନାମି ଦେଖିବାକୁ ମିଳିଛି। ରବିବାର ଦିନ, BSE ସେନସେକ୍ସରେ ୧୫୪୬.୮୪ ପଏଣ୍ଟ (୧.୮୮%) ହ୍ରାସ ଘଟି ୮୦୭୨୨.୯୪ ପଏଣ୍ଟରେ ବନ୍ଦ ହୋଇଛି । ସେହିଭଳି NSE ନିଫ୍ଟି ୫୦ ଇଣ୍ଡେକ୍ସରେ ୪୯୫.୨୦ (୧.୯୬%) ହ୍ରାସ ଘଟି ୨୪୮୨୫.୪୫ ପଏଣ୍ଟରେ ବନ୍ଦ ହୋଇଥିଲା । ତେବେ ବଜେଟ୍ ଦିନ ସବୁଜ ରଙ୍ଗରେ ଖୋଲିଥିବା ବଜାର ବଜେଟ୍ ଭାଷଣ ଆରମ୍ଭ ହେବା ପରେ ଏହା ହ୍ରାସ ପାଇବା ଆରମ୍ଭ କଲା

ରବିବାର ଆଇଟି (IT) ସେକ୍ଟରକୁ ଛାଡ଼ି ପ୍ରାୟ ସମସ୍ତ ପ୍ରମୁଖ ସେକ୍ଟର ଲାଲ୍ ସଙ୍କେତରେ ବନ୍ଦ ହୋଇଛନ୍ତି। ପିଏସୟୁ ବ୍ୟାଙ୍କ ୪% ହ୍ରାସ, ମେଟାଲ୍ ୩.୮% ହ୍ରାସ, ଅଏଲ୍ ଏବଂ ଗ୍ୟାସ୍ ୨.୭% ହ୍ରାସ ଏବଂ ମିଡ୍‌କ୍ୟାପ୍ ଓ ସ୍ମଲ୍‌କ୍ୟାପ୍ ଯଥାକ୍ରମେ ୨.୨% ଏବଂ ୨.୮% ହ୍ରାସ ପାଇଛି।

ଅର୍ଥନୈତିକ ବିଶେଷଜ୍ଞଙ୍କ ଅନୁଯାୟୀ, ବଜେଟରେ ଫ୍ୟୁଚରସ୍ ଆଣ୍ଡ ଅପ୍ସନ୍ସ (F&O) ଉପରେ ସିକ୍ୟୁରିଟିଜ୍ ଟ୍ରାଞ୍ଜାକସନ୍ ଟ୍ୟାକ୍ସ (STT) ବୃଦ୍ଧି କରାଯିବା ନିବେଶକଙ୍କ ମନୋବଳକୁ ଦୋହଲାଇ ଦେଇଛି। ଏହା ବ୍ୟତୀତ ବଜେଟକୁ ନେଇ ବଜାରର ଯେଉଁ ଅଧିକ ଆଶା ଥିଲା, ତାହା ପୂରଣ ନହେବା କାରଣରୁ ଏହି ପ୍ରତିକ୍ରିୟା ଦେଖାଦେଇଛି।

ବଜାର ବିଶେଷଜ୍ଞ କୁନାଲ ସରୱାଗି କହିଛନ୍ତି ଯେ, ଅର୍ଥମନ୍ତ୍ରୀ ନିର୍ମଳା ସୀତାରମଣ ଫ୍ୟୁଚର୍ସ ଏବଂ ଅପ୍ସନ୍ ଟ୍ରେଡିଂ ଉପରେ ଲାଗୁ ହୋଇଥିବା STT (ସିକ୍ୟୁରିଟିଜ୍ ଟ୍ରାଞ୍ଜାକ୍ସନ୍ ଟ୍ୟାକ୍ସ) ବୃଦ୍ଧି ଘୋଷଣା କରିବା ପରେ ବଜାର ବିକ୍ରୟ ଆରମ୍ଭ ହୋଇଥିଲା ଏବଂ ଦ୍ରୁତ ଗତିରେ ଏହା ଗଭୀର ଆଡକୁ ଗତି କରିଥିଲା । ୨୦୨୬-୨୭ ଆର୍ଥିକ ବର୍ଷ ପାଇଁ ଉପସ୍ଥାପିତ ବଜେଟରେ, ଅର୍ଥମନ୍ତ୍ରୀ ଫ୍ୟୁଚର୍ସ ଉପରେ STT ୦.୦୨% ରୁ ୦.୦୫% ଏବଂ ଅପସନ୍ ପ୍ରିମିୟମ୍ ଉପରେ ୦.୧୦% ରୁ ୦.୧୫% କୁ ବୃଦ୍ଧି କରିବାକୁ ଘୋଷଣା କରିଥିଲେ। ଷ୍ଟକ୍ ବଜାର ନିବେଶକ ମାନେ ଏହି ଘୋଷଣାରେ ଖୁସି ନଥିଲେ ଏବଂ ପ୍ରବଳ ବିକ୍ରି କରିବା ଆରମ୍ଭ କରିଥିଲେ।

Powered by Froala Editor