ଅଷ୍ଟ୍ରେଲିଆର ପର୍ଯ୍ୟଟନସ୍ଥଳୀ ‘ଗୋଲ୍‌ଡ୍‌ କୋଷ୍ଟ୍‌’ରେ ଦୁଇଟି ହେଲିକପ୍ଟର୍‌ ପରସ୍ପର ସହିତ ଧକ୍କା ଖାଇବାରୁ ୪ଜଣ ଲୋକଙ୍କ ମୃତ୍ୟୁ ଘଟିଛି। ଏଥିସହ ଅନ୍ୟ ତିନି ଜଣ ଆହତ ହୋଇଛନ୍ତି। ଦୁର୍ଘଟଣା ପରେ ଗୋଟିଏ ହେଲିକପ୍ଟର ସୁରକ୍ଷିତ ଭାବେ ଗୋଲ୍ଡ କୋଷ୍ଟର ମେନ୍ ବିଚ୍ ଅବତରଣ କରିଥିଲା। ଅନ୍ୟ ହେଲିକପ୍ଟରଟି କ୍ଷତିଗ୍ରସ୍ତ ହୋଇଛି।

ପବ୍ଲିକ୍‌ ବ୍ରଡ୍‌କାଷ୍ଟର୍‌ ‘ଏବିସି’ରେ ପ୍ରସାରଣ କରିଥିବା ଫଟୋରେ ଦେଖାଯାଉଛି ସମୁଦ୍ର ତଟରୁ ମାତ୍ର ଅଳ୍ପ କେତେ ଫୁଟ୍‌ ଦୂରରେ ବାଲୁକା ଉପରେ ଗୋଟିଏ ହେଲିକପ୍ଟର୍‌ କଡ଼େଇ ହୋଇ ପଡ଼ିଛି। ତା’ଠାରୁ ଟିକେ ଦୂରରେ ତା’ର ପଙ୍ଖା ସବୁ ପଡ଼ିଛି । ଦୁର୍ଘଟଣାସ୍ଥଳରେ ଉଦ୍ଧାର କାର୍ଯ୍ୟ ନିମନ୍ତେ ଆଉ ଏକ ‘ରେସ୍କ୍ୟୁ ହେଲିକପ୍ଟର୍‌’ ବାଲି ଉପରେ ଅବତରଣ କରିବା ପରେ ଅନେକ ଉଦ୍ଧାରକାରୀ ସେ ଅଞ୍ଚଳରେ ତଲାସ ଆରମ୍ଭ କରିଥିଲେ। ଦୁଇଟି ହେଲିକପ୍ଟର୍‌ର ଭଙ୍ଗାରୁଜା ଅଂଶ ବିଛାଡ଼ି ହୋଇ ପଡ଼ିଥିବା ବେଳାଭୂମି ନିକଟ ଜଳରାଶିରେ କେତେଗୁଡ଼ିଏ ପୁଲିସ ଓ ଉଦ୍ଧାରକାରୀ ବୋଟ୍‌ ପହଞ୍ଚିଥିବା ଦେଖାଯାଇଥିଲା।

ପୁଲିସ କହିବା ମୁତାବକ, ଲ୍ୟାଣ୍ଡିଂ କରୁଥିବା ବେଳେ ଦୁଇ ହେଲିକପ୍ଟର ମଧ୍ୟରେ ଧକ୍କା ହୋଇଥିଲା। କ୍ଷତିଗ୍ରସ୍ତ ହେଲିକପ୍ଟରଟି ଲ୍ୟାଣ୍ଡିଂ ସ୍ଥଳରୁ ବହୁ ଦୂରରେ ଖଣ୍ଡବିଖଣ୍ଡିତ ଅବସ୍ଥାରେ ପଡିଛି।

Powered by Froala Editor