ନୂଆଦିଲ୍ଲୀ:  ପୁଟିନଙ୍କ ମୁହଁରେ ମୋଦୀଙ୍କ ପ୍ରଶଂସା । ମସ୍କୋରେ ଏକ କାର୍ୟ୍ୟକ୍ରମରେ ଯୋଗ ଦେବା ଅବସରରେ ସାମ୍ବାଦିକମାନେ ତାଙ୍କୁ ଭାରତ ଓ ପ୍ରଧାନମନ୍ତ୍ରୀ ମୋଦୀଙ୍କ ବିଷୟରେ ପ୍ରଶ୍ନ ପଚାରିଥିଲେ । ଉତ୍ତରରେ ରୁଷ୍ ରାଷ୍ଟ୍ରପତି କହିଛନ୍ତି ଯେ, ମୋଦୀଙ୍କ ନେତୃତ୍ୱେରେ ଭାରତ ଆଗକୁ ବଢ଼ୁଛି । ମୋଦୀ ଜଣେ ଦେଶପ୍ରେମୀ । ଭାରତର ଭବିଷ୍ୟତ ବେଶ୍ ଉଜ୍ୱଳ । ମୋଦୀ ସରକାର ଆପଣେଇଥିବା “ମେକ୍ ଇନ୍ ଇଣ୍ଡିଆ’ ଏକ ଭଲ ପଦକ୍ଷେପ ।
ଏହା ସହ ବିଶ୍ୱର ସର୍ବବୃହତ ଗଣତନ୍ତ୍ର ଭାବେ ଭାରତ ଗର୍ବିତ ହେବା ଉଚିତ ବୋଲି କହିଛନ୍ତି ପୁଟିନ । ସେ ଆହୁରି କହିଛନ୍ତି ଯେ, ଭାରତ ବ୍ରିଟିଶ ଶାସନରୁ ସ୍ୱାଧୀନ ହେବା ପରେ ସବୁ କ୍ଷେତ୍ରରେ ଉନ୍ନତି କରିଚାଲିଛି । ଏତେବଡ଼ ଜନସଂଖ୍ୟାକୁ ନେଇ ଭାରତ ଯେଭଳି ଭାବେ ଆଗକୁ ବଢ଼ୁଛି ତାହା ପ୍ରଶଂସନୀୟ । ଭାରତର ସ୍ୱାଧୀନ ବୈଦେଶିକ ନୀତିକୁ ବେଶ୍ ପ୍ରଶଂସା କରିଛନ୍ତି ରୁଷ୍ ରାଷ୍ଟ୍ରପତି । ଆଜିର ଯୁଗରେ ପ୍ରତ୍ୟେକ ଦେଶ କୌଣସି ନା କୌଣସି ଗୋଟିଏ ଗୋଷ୍ଠୀରେ ସାମିଲ ହେଉଥିବା ବଳେ ଭାରତ ଏହାର ସ୍ୱାଧୀନ ବୈଦଶିକ ନୀତି ବଜାୟ ରଖିଛି ବୋଲି କହିଛନ୍ତି ପୁଟିନ୍ ।ଭାରତ ଓ ରୁଷ୍ ମଧ୍ୟରେ ସମ୍ପର୍କ ବେଶ ଭଲ ଓ ଏହି ସମ୍ପର୍କ ଆହୁରି ମଜବୁତ ହେବ ବୋଲି ପୁଟିନ କହିଛନ୍ତି । ୟୁକ୍ରେନ ଉପରେ ଆକ୍ରମଣ ନେଇ ଆମେରିକା ଓ ୟୁରୋପୀୟ ରାଷ୍ଟ୍ରଗୁଡ଼ିକ କଡ଼ା ସମାଲୋଚନା କରିବା ସହ ରୁଷ୍ ଉପରେ କଟକଣା ଲଗାଇଛନ୍ତି । ହେଲେ ଭାରତ ନିରପେକ୍ଷ ରହିଛି । କଥାବାର୍ତ୍ତା ଓ କୂଟନୀତି ମାଧ୍ୟମରେ ଯୁଦ୍ଧ ବନ୍ଦ କରି ରୁଷ୍ ଓ ୟୁକ୍ରେନ ଆଲୋଚନା ଟେବୁଲକୁ ଫେରିବା ଉଚିତ ବୋଲି ମୋଦୀ ସରକାର କହି ଆସୁଛନ୍ତି ।

Powered by Froala Editor