ପ୍ରଥମଥର : ସୁପ୍ରିମକୋର୍ଟର ସିଧାପ୍ରସାରଣ ଦେଖିଲେ ସାଧାରଣ ଲୋକ
ପ୍ରଥମଥର ପାଇଁ ସୁପ୍ରିମକୋର୍ଟର ସିଧାପ୍ରସାରଣ ଦେଖିଛନ୍ତି ସାଧାରଣ ଲୋକ। ଆଜି ଲୋକମାନେ webcast.gov.in/scindia/ରେ ଏହାର ସାଧାରଣ ପ୍ରସାରଣ ୟୁଟ୍ୟୁବରେ ଦେଖିବାକୁ ସକ୍ଷମ ହୋଇଛନ୍ତି। ପ୍ରଥମ ପର୍ଯ୍ୟାୟରେ ୩ଟି ସାମ୍ବିଧାନିକ ବେଞ୍ଚରେ ଚାଲିଥିବା ଶୁଣାଣିର ସିଧାପ୍ରସାରଣ ହୋଇଛି।
ମହାରାଷ୍ଟ୍ରର ଚର୍ଚ୍ଚିତ ଶିବସେନା ପ୍ରମୁଖ ଉଦ୍ଧବ ଠାକରେ ବନାମ ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ମାମଲା ଉପରେ ଶୁଣାଣି ହୋଇଛି। ତେବେ ସିଧା ପ୍ରସାରଣ ପାଇଁ ସୁପ୍ରିମକୋର୍ଟର ନିଜସ୍ଵ ପ୍ଲାଟଫର୍ମ ଖୁବ୍ ଶୀଘ୍ର କରାଯିବ କହିଛନ୍ତି ପ୍ରଧାନ ବିଚାରପତି ୟୁ ୟୁ ଲଳିତ।
ପ୍ରକୃତ ଶିବସେନା କାହାର ? ଏହି ପ୍ରଶ୍ନର ଉତ୍ତର ଦେବା ଆଇନଗତ ଏବଂ ରାଜନୈତିକ ଦୃଷ୍ଟିରୁ ମୁସ୍କିଲ ହୋଇ ପଡିଛି। ଅଗଷ୍ଟ ମାସରେ ମାମଲାର ଶୁଣାଣି ପାଇଁ ସୁପ୍ରିମକୋର୍ଟ ପାଞ୍ଚ ଜଣିଆ ସାମ୍ବିଧାନିକ ପୀଠକୁ ସ୍ଥାନାନ୍ତର କରିଥିଲେ। ଏହି କ୍ରମରେ ଆଜି ବିଚାରପତି ଡିଓ୍ଵାଇ ଚନ୍ଦ୍ରଚୂଡଙ୍କ ନେତୃତ୍ଵାଧୀନ ପୀଠ ମହାରାଷ୍ଟ୍ର ରାଜନୈତିକ ସଂପର୍କିତ ଯାଚିକା ଉପରେ ଶୁଣାଣି କରିଛନ୍ତି।
ସୋମବାର ସୁପ୍ରିମକୋର୍ଟ କହିଥିଲେ ଯେ ଶୁଣାଣିର ସିଧାପ୍ରସାଣ କରିବା ପାଇଁ ସର୍ବୋଚ୍ଚ ଅଦାଲତ ନିଜସ୍ୱ ବ୍ୟବସ୍ଥା କରିବେ। ଗୋଟିଏ ନିର୍ଦ୍ଦିଷ୍ଟ ପ୍ଲାଟଫର୍ମରେ ମାମଲା ଗୁଡ଼ିକର ଶୁଣାଣି ଲୋକମାନେ ଦେଖିପାରିବେ। ୟୁଟ୍ୟୁବରେ ସିଧାପ୍ରସାରଣ ଗୋଟିଏ ଅସ୍ଥାୟୀ ବ୍ୟବସ୍ଥା। ନ୍ୟାଶନାଲ ଇନଫର୍ମମେଟିକ ସେଣ୍ଟର ଏହି ବ୍ୟବସ୍ଥାର ପରିଚାଳନା କରୁଛି। ରବିବାର ଓ ସୋମବାର ସିଧାପ୍ରସାରଣ ବ୍ୟବସ୍ଥାର ଟେଷ୍ଟିଂ କରାଯାଇଥିଲା। ମଙ୍ଗଳବାର ବିଧିବଦ୍ଧ ଭାବେ ଶୁଶାଣିର ସିଧାପ୍ରସାରଣ ଆରମ୍ଭ କରାଯାଇଛି।
Powered by Froala Editor