ଉତ୍ତରାଖଣ୍ଡରର ବିଜେପି ନେତା ତଥାପ ପୂର୍ବତନ ମନ୍ତ୍ରୀ ବିନୋଦ ଆର୍ଯ୍ୟଙ୍କ ପୁଅ ପୁଲକିତଙ୍କୁ ପୁଲିସ ହତ୍ୟା ମାମଲାରେ ଗିରଫ କରିଛି। ପୁଲକିତଙ୍କ ବାପା ବିଜେପିର ଜଣେ ନେତା ଭାବେ କାମ କରୁଥିବା ବେଳେ ଭାଇ ଅଙ୍କିତ ଆର୍ଯ୍ୟ ଉତ୍ତରାଖଣ୍ଡ ଓବିସି କଲ୍ୟାଣ କମିଶନର ଉପାଧ୍ୟୟ।

ରିପୋର୍ଟ ଅନୁଯାୟୀ, ରିଷିକେଶରେ ପୁଲକିତଙ୍କର ଗୋଟିଏ ରିସର୍ଟ ରହିଛି। ଏହି ରିସର୍ଟରେ ୧୯ ବର୍ଷୀୟ ଅଙ୍କିତା ଭଣ୍ଡାରୀ ରିସେପ୍ସନିଷ୍ଟ ଭାବେ କାମ କରୁଥିଲେ। ହେଲେ ହଠାତ୍‌ ସେପ୍ଟେମ୍ବର ୧୮ରୁ ସେ ନିଖୋଜ ହୋଇ ଯାଇଥିଲେ। ପୁଲିସ୍‌ ତାଙ୍କୁ ଖୋଜାଖୋଜି କରୁଥିବା ବେଳେ ପୁଲକିତ ହରିଦ୍ୱାର ପଳାଇଥିଲେ। ହେଲେ ଅଙ୍କିତାଙ୍କ ପରିବାର ଲୋକ ପୁଲିସ୍‌ର ଦ୍ୱାରସ୍ଥ ହୋଇ ଝିଅକୁ ଖୋଜି ଆଣିବାକୁ ନେହୁରା ହୋଇଥିଲା। ପୁଲିସ୍‌ ତଦନ୍ତ ଜାରି ରଖିଥିବା ବେଳେ ରିସର୍ଟର ସିସିଟିଭି ଯାଞ୍ଚ କରିଥିଲା। ହେଲେ ସିସିଟିଭି କ୍ୟାମେରା ଭାଙ୍ଗି ଯାଇଥିବାରୁ କୌଣସି ସୁଫଳ ମିଳି ନଥିଲା। ଏହାପରେ ପୁଲିସ୍‌ ଅଙ୍କିତାଙ୍କ ସହ ରିସର୍ଟରେ କାମ କରୁଥିବା କିଛି ସହଯୋଗୀଙ୍କ ଫୋନ ଯାଞ୍ଚ କରିଥିଲା। ଏହି ସମୟରେ ଅଙ୍କିତା ହ୍ୱାଟସଆପ୍‌ରେ ପୁଲକିତଙ୍କ ଯୌନ କେଳେଙ୍କାରୀ କଥା ସହଯୋଗୀ ମାନଙ୍କୁ କହିଥିବା ଜଣାପଡ଼ିଥିଲା। ଏ ଦିଗରେ ପୁଲିସ୍‌ ତଦନ୍ତ କରୁଥିବା ବେଳେ ପୁଲକିତଙ୍କୁ ଗିରଫ କରିବା ପାଇଁ ବିକ୍ଷୋଭ ପ୍ରଦର୍ଶନ କରିଥିଲେ। ଏହାପରେ ପୁଲିସ୍‌ ତାଙ୍କୁ ଗିରଫ କରିଛି। ଏଥିସହ ପୁଲିସ୍‌ ଓ ଉଦ୍ଧାରକାରୀ ଦଳ ଆଜି କେନାଲରୁ ଅଙ୍କିତାଙ୍କ ମୃତଦେହ ଜବତ କରିଛି। ଏ ସମ୍ପର୍କରେ ପାଉରୀର ଅତିରିକ୍ତ ଏସ୍‌ପି ଶେଖର ସୂୟାଲ ସୂଚନା ଦେଇଛନ୍ତି।

ପୁଲକିତଙ୍କ ଗିରଫ ପରେ ପିତା ବିନୋଦ ଆର୍ଯ୍ୟ ଓ ଭାଇ ଅଙ୍କିତ ଆର୍ଯ୍ୟକୁ ବିଜେପି ଶନିବାର ପାର୍ଟିରୁ ବହିଷ୍କାର କରିଛି। ଉଭୟଙ୍କୁ ତତ୍କାଳ ପାର୍ଟିରୁ ବହିଷ୍କୃତ କରାଯାଇଥିବା ବେଳେ ଅଙ୍କିତ ଆର୍ଯ୍ୟଙ୍କୁ ଉତ୍ତରାଖଣ୍ଡ ଅନ୍ୟ ପଛୁଆ ବର୍ଗ ଆୟୋଗର ନୋମିନେଟେଡ ଉପାଧ୍ୟକ୍ଷ ପଦରୁ ତୁରନ୍ତ ହଟାଇ ଦିଆଯାଇଛି।

ଏ ନେଇ ଉତ୍ତରାଖଣ୍ଡ ବିଜେପିର ପ୍ରଦେଶ ମହାମନ୍ତ୍ରୀ ରାଜେନ୍ଦ୍ର ସିଂହ ବିଷ୍ଟଙ୍କ ନାମରେ ଜାରି ଏକ ବିବୃତ୍ତିରେ ପ୍ରଦେଶ ଅଧ୍ୟକ୍ଷ ମହେନ୍ଦ୍ର ଭଟ୍ଟ ଅଙ୍କିତା ହତ୍ୟାର ସଜ୍ଞାନ ନେଇ ହରିଦ୍ୱାର ନିବାସୀ ଡା. ବିନୋଦ ଆର୍ଯ୍ୟ ଓ ତାଙ୍କ ପୁତ୍ର ଅଙ୍କିତ ଆର୍ଯ୍ୟଙ୍କୁ ଭାରତୀୟ ଜନତା ପାର୍ଟିରୁ ତତ୍କାଳ ପ୍ରଭାବରେ ବହିଷ୍କାର କରାଯାଉଥିବା କୁହାଯାଇଛି।

Powered by Froala Editor