ଦେଶର ୧୫ତମ ରାଷ୍ଟ୍ରପତି ଭାବେ ଦ୍ରୌପଦୀ ମୁର୍ମୁ ଦାୟିତ୍ବ ଗ୍ରହଣ କରିବା ପରେ ରାଇରଙ୍ଗପୁର ସମେତ ସମଗ୍ର ମୟୁରଭଞ୍ଜ ଜିଲ୍ଲାରେ ରେଳ ଚଳାଚଳ କ୍ଷେତ୍ରରେ ଉଲ୍ଲେଖନୀୟ ଉନ୍ନତି ଦେଖିବାକୁ ମିଳିବ ବୋଲି ଆକଳନ ହୋଇଛି। ଏହା ହେଲେ ଟାଟାନଗର ଷ୍ଟେସନ ପରେ ରାଇରଙ୍ଗପୁର ରେଳ ଷ୍ଟେସନ ଏକ ହବରେ ପରିଣତ ହେବ। ଖୁବଶୀଘ୍ର ରାଇରଙ୍ଗପୁର ଷ୍ଟେସନରୁ ରାଉରକେଲା ଓ ନୂଆଦିଲ୍ଲୀ ଅଭିମୁଖେ ଯାତ୍ରୀବାହୀ ଟ୍ରେନ ଚଳାଚଳ କରିବା ବୋଲି ଝାଡ଼ଖଣ୍ଡରୁ ପ୍ରକାଶିତ ବିଭିନ୍ନ ସମ୍ବାଦ ସୂତ୍ରରୁ ଜଣାଯାଇଛି।

ଦକ୍ଷିଣ ପୂର୍ବ ଚକ୍ରଧରପୁର ରେଳ ଡିଭିଜନ ସୂତ୍ରରୁ ଜଣାପଡ଼ିଛି ଯେ ଟାଟା ନଗର ଷ୍ଟେସନର ଭିଡ଼ ଓ ରେଳ ଟ୍ରାଫିକ ନିୟନ୍ତ୍ରଣ ପାଇଁ ନୂଆଦିଲ୍ଲୀ ପର୍ଯ୍ୟନ୍ତ ଯିବାକୁ ଥିବା ଟ୍ରେନ ରାଇରଙ୍ଗପୁର ପର୍ଯ୍ୟନ୍ତ ବଢ଼ାଇବାକୁ ପ୍ରସ୍ତାବ ବିଚାରାଧୀନ ରହିଛି। ଜୁନ ୨୯ ତାରିଖରୁ ଉକ୍ତ ରେଳ ଲାଇନ ର ବିଭିନ୍ନ ଷ୍ଟେସନ ପରିଦର୍ଶନ କରିବା ଅବସରରେ ରାଇରଙ୍ଗପୁର ଓ ବାଦାମପାହାଡ଼ରେ ଟ୍ରେନ ପାଇଁ କୋଚିଂ ପିଟ ତିଆରି ପାଇଁ ପ୍ରସ୍ତାବ ଗୃହୀତ ହୋଇଛି। ଏହା ଦ୍ଵାରା ରାଇରଙ୍ଗପୁର ଓ ବାଦାମପାହାଡ଼ ଷ୍ଟେସନରେ କୋଚ ଛିଡ଼ା କରାଯାଇ ପାରିବ। ଏହାଛଡା ବାମନଘାଟି ଉପଖଣ୍ଡର ସଦର ରାଇରଙ୍ଗପୁର ଷ୍ଟେସନରେ ଆଧୁନିକୀରଣ ଓ ଉନ୍ନତିକରଣ ପାଇଁ ନଅ କୋଟି ଟଙ୍କା ଖର୍ଚ୍ଚ ହେବାର ଯୋଜନା ରହିଛି ବୋଲି ଜଣାପଡିଛି। ଏହାଦ୍ୱାରା ଗ୍ରାମୀଣ କ୍ଷେତ୍ରରେ ଯାତ୍ରୀଙ୍କ ପାଇଁ ବିଶେଷ ସୁବିଧା ମିଳିବ। ଏହି ଖବର ଜଣାପଡିବା ପରେ ଜନସାଧାରଣରେ ଆନନ୍ଦର ଲହରୀ ଖେଳିଯାଇଛି।

ସେହିପରି କୋଭିଡ ପାଇଁ ବାତିଲ ହୋଇଥିବା  ଦ୍ୱିତୀୟ ଡ଼ି ଏମ ୟୁ ଟ୍ରେନଟି ଟାଟାରୁ ଭୋର  ୩.୪୫ମିନିଟ ରେ ଛାଡି ସାତୋଟା ପାଞ୍ଚ ମିନିଟରେ ବାଦାମପାହାଡ଼ ପର୍ଯ୍ୟନ୍ତ ଯାଇ ୭.୨୫ମିନିଟରେ ଛାଡି ଟାଟାକୁ ଦିନ ଏଗାର ଟାରେ ପହଞ୍ଚି ଥିଲା। ବିଭିନ୍ନ ରେଳ ଷ୍ଟେସନରେ ଫୁଲ ମାଳ ଦେଇ ଚାଳକ , ଟ୍ରେନ ମ୍ୟାନେଜର, ଷ୍ଟେସନ ସୁପରିଟେଡେଣ୍ଟ ଙ୍କୁ ସ୍ୱାଗତ କରିଥିଲେ।