ନୂଆପଡ଼ା: ଜଙ୍ଗଲକୁ କାଠ ସଂଗ୍ରହ କରିବାକୁ ଯାଇଥିବା ବେଳେ ଭାଲୁ ଆକ୍ରମଣରେ ୩ଜଣ ବ୍ୟକ୍ତି ପ୍ରାଣ ହରାଇଛନ୍ତି । ଅନ୍ୟ ଦୁଇଜଣ ଗୁରୁତର ଆହତ ହୋଇ ଡାକ୍ତରଖାନାରେ ଭର୍ତ୍ତି ହୋଇଛନ୍ତି । ଘଟଣାଟି ଘଟିଛି ନୂଆପଡ଼ା ଜିଲ୍ଲା ଲଖନା ଥାନା ସମରସିଂ ଗାଁରେ । ମୃତକ ୩ ଜଣ ହେଲେ ସମରସିଂ ଗାଁର ରତନ ମାଝି(୬୦), ନକୁଲ ମାଝି(୬୦), ରବି ରଣା(୨୭) । ସେହିପରି ଆହତ ଦ୍ୱୟହେଲେ ପରମେଶ୍ୱର ମାଝି(୫୦) ଓ କୁନା ମାଝି(୨୬) । ଘଟଣା ପରେ ଉତ୍ତ୍ୟକ୍ତ ଲୋକେ ଭାଲୁକୁ ପିଟିପିଟି ମାରିଦେଇଥିବା ପ୍ରକାଶ ।
 ଗତକାଲି ଲଖନା ଥାନା ସମରସିଂ ଗାଁର ରତନ ଲୁହାଖେନଖୋଲ ଜଙ୍ଗଲକୁ ଜାଳେଣି କାଠ ସଂଗ୍ରହ କରିବାକୁ ଯାଇଥିଲେ । ସେ ଅପରାହ୍ନ ସୁଦ୍ଧା ଘରକୁ ଫେରିନଥିଲେ । ଅପରାହ୍ନ ୫ଟାରେ ରତନଙ୍କୁ ଖୋଜିବା ପାଇଁ ଗାଁର ନକୁଲ ମାଝି, ରବି ରଣା, ପରମେଶ୍ୱର ମାଝି, ବାଦଲ ମାଝି, ଶଙ୍କର ମାଝି, ନୂଆଧର ମାଝି ପ୍ରମୁଖ ଲୁହାଖେନଖୋଲ ଜଙ୍ଗଲକୁ ଯାଇଥିଲେ । ସେତେବେଳେ ଭାଲୁଟି ରତନଙ୍କୁ ମାରି ମୃତଦେହକୁ ଜଗି ରହିଥିଲା । ଉପରୋକ୍ତ ବ୍ୟକ୍ତିମାନେ ଘଟଣାସ୍ଥଳକୁ ପହଞ୍ଚିବାରୁ ଭାଲୁଟି ପରମେଶ୍ୱରଙ୍କୁ ଆକ୍ରମଣ କରିଥିଲା ।ସେ ଭୟରେ ଏକ ଗଛ ଉପରକୁ ଚଢି ଯାଇଥିଲେ । ପରମେଶ୍ୱରଙ୍କ ବାମହାତରେ ଆଘାତ ଲାଗିଥିବା ପ୍ରକାଶ । ପରେ ଭାଲୁଟି ନକୁଳ ଓ ରବିଙ୍କୁ ଆକ୍ରମଣ କରି ଲହୁଲୁହାଣ କରିଥିଲା ।

ଏହାଦେଖି ବାଦଲ, ଶଙ୍କର ଓ ନୂଆଁଧର ପ୍ରାଣ ବିକଳରେ ଦୌଡି ଗାଁକୁ ପଳାୟନ କରିଥିଲେ । ଏଣେ ଭାଲୁଟି ନକୁଳ ଓ ରବିଙ୍କୁ ମାରି ପକାଇଥିଲା । ଏହି ଖବର ଗାଁରେ ପ୍ରଚାର ହେବାପରେ ସନ୍ଧ୍ୟା ୭ ଟାରେ ଗାଁ ଲୋକେ ଏକତ୍ରିତ ହୋଇ ଜଙ୍ଗଲରେ ଫସି ରହିଥିବା ବ୍ୟକ୍ତିଙ୍କୁ ଉଦ୍ଧାର କରିବାକୁ ବାହାରିଥିଲେ । ଗାଁର ପ୍ରାୟ ୫୦ ଜଣ ଯୁବକ ହାତରେ ନିଆଁ ଧରି ଭାଲୁକୁ ଘଉଡାଇବାକୁ ଯାଇଥିଲେ । ସେଠାରେ ଭାଲୁ ପୁଣି ଗାଁ ଲୋକଙ୍କୁ ଆକ୍ରମଣ ଉଦ୍ୟମ କରିଥିଲା । ଭାଲୁ ଆକ୍ରମଣରେ ଗ୍ରାମର କୁନା ଆହତ ହୋଇଥିଲେ । ଗାଁ ଲୋକେ ଠେଙ୍ଗା ବାଡି ଧରି ଭାଲୁକୁ ଘଉଡାଇବାରୁ କୁନାଙ୍କୁ ଛାଡି ଜଙ୍ଗଲ ପଟେ ଚାଲି ଯାଇଥିଲା । ସେଠାରୁ କୁନାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରିଥିଲେ । ଗ୍ରାମବାସୀ ଜଙ୍ଗଲରୁ ରତନ, ନକୁଳ ଓ ରବିଙ୍କ ମୃତଦେହ ଉଦ୍ଧାର କରିଥିଲେ । ଗାଁ ଲୋକଙ୍କୁ ଦେଖି ପରମେଶ୍ୱର ଗଛରୁ ଓହ୍ଲାଇଥିଲେ । ଉତ୍ତ୍ୟକ୍ତ ଗାଁ ଲୋକେ ଗୋଷ୍ଠିବଦ୍ଧ ଭାବେ ଭାଲୁକୁ ପିଟିପିଟି ମାରି ଦେଇଥିଲେ । 

Powered by Froala Editor