ପୁରୀ: ଜ୍ୱର ରୋଗରେ ଅସୁସ୍ଥ ଶ୍ରୀବିଗ୍ରହ ରାଜବୈଦ୍ୟଙ୍କ ପରାମର୍ଶ ଏବଂ ଦଇତାପତିଙ୍କ ସେବା ପରେ ସମ୍ପୂର୍ଣ୍ଣ ସୁସ୍ଥ ହୋଇଛନ୍ତି । ଏହି ସୂଚନା ଦେଇଛନ୍ତି ମହାପ୍ରଭୁଙ୍କ ସେବକ ଦଇତାପତି । ଶ୍ରୀମନ୍ଦିରର ପ୍ରଥମ ସେବକ ଗଜପତି ମହାରାଜା ଦିବ୍ୟସିଂହ ଦେବଙ୍କୁ ଦଇତାପତିମାନେ ଶ୍ରୀନଅରଙ୍କୁ ରାଜ ପ୍ରସାଦ ବିଜେ ବେଳେ ଶ୍ରୀବିଗ୍ରହ ଆରୋଗ୍ୟ ହୋଇଥିବା ଖବର ଦେଇଛନ୍ତି । ଏହା ପରେ ଦତ୍ତମହାପାତ୍ର ସେବକ ପ୍ରଭୁଙ୍କୁ ଖଡ଼ି ଲାଗି ଗୋପନ ସେବା କରିବେ । ଖଡ଼ି ଲାଗି ପରେ ଦତ୍ତମହାପାତ୍ର ସେବକ ପ୍ରଭୁଙ୍କ ବନକଲାଗି ତଥା ଶ୍ରୀମୁଖ ସିଙ୍ଗାର ନିମନ୍ତେ ପ୍ରଭୁଙ୍କ ସେବାରେ ହାଜର ହେବେ ।

ବୁଧବାର ମହାବାହୁଙ୍କ ନବଯୌବନ ଦର୍ଶନ ହେବ । ଆଉ  ଜୁଲାଇ ୧ ତାରିଖରେ ପ୍ରଭୁ ଘୋଷଯାତ୍ରାରେ ବାହାରିବେ । ଶ୍ରୀନଅରରେ ସାକ୍ଷାତ ବେଳେ ଗଜପତି ମହାରାଜା କହିଥିଲେ, ପ୍ରଭୁଙ୍କ ପହଣ୍ଡି ନୀତିକୁ ଶୃଙ୍ଖଳାର ସହ ସମ୍ପନ୍ନ କରିବା । ସେହିଭଳି ପ୍ରଭୁଙ୍କ ଅବାଧ ଦର୍ଶନକୁ ଗୁରୁତ୍ୱ ଦେବାକୁ ଗଜପତି ମହାରାଜା ପରାମର୍ଶ ଦେଇଛନ୍ତି ।

ସ୍ନାନପୂର୍ଣ୍ଣିମା ତିଥିରେ ମହାପ୍ରଭୁ ସ୍ନାନବେଦିରେ ୧୦୮ ଗରା ଜଳରେ ସ୍ନାନ କରିବା ପରେ ଜ୍ୱର ରୋଗର ଆକ୍ରାନ୍ତ ହୋଇଥିଲେ । ଜୁନ ୧୪ ତାରିଖରୁ ଦଶ ଦିନ ହେଲା ମହାପ୍ରଭୁଙ୍କ ଜ୍ୱର ରୋଗର ଉପଚାର ଚାଲିଥିଲା । ଦ୍ୱାଦଶୀ ତିଥିରେ ସମ୍ପୂର୍ଣ୍ଣ ସୁସ୍ଥ ହୋଇଛନ୍ତି ।

ଶନିବାର ଦ୍ୱାଦଶୀ ତିଥିରେ ଶ୍ରୀନଅରକୁ ରାଜ ପ୍ରସାଦ ବିଜେ କରିଥିଲେ ଦଇତାପତି ସେବକ । ରବିବାର ତ୍ରୟୋଦଶୀ ତିଥିରେ ମହାପ୍ରଭୁଙ୍କ ଖଡ଼ି ଲାଗି ବିଧି ସମ୍ପନ୍ନ ହେବ । ତ୍ରୟୋଦଶୀ ତିଥିରେ ପ୍ରଥମ ଭୋଗ ମଣ୍ଡପ ବଢ଼ିବା ପରେ ବେହରଣ ଦ୍ୱାର ଖୋଲି ଦତ୍ତମହାପାତ୍ର ଆଣିଥିବା ଖଡ଼ିକୁ ଶ୍ରୀଜିଉଙ୍କୁ ଲାଗି କରାଯିବ । ଖଡ଼ି ଲାଗି ପରେ ଖଡ଼ି ପ୍ରସାଦ ବି ରାଜପ୍ରସାଦକୁ ବିଜେ କରିବାର ପରମ୍ପରାକୁ ଦତ୍ତମହାପାତ୍ର ସମ୍ପନ୍ନ କରିବେ । ଏହା ପରେ ପ୍ରଭୁଙ୍କ ଘୋଷଯାତ୍ରା ପ୍ରସ୍ତୁତିରେ ବନକଲାଗି ପ୍ରକ୍ରିୟା କରିବେ ଦତ୍ତମହାପାତ୍ର ।

Powered by Froala Editor