ରାଜ୍ୟରେ ପୁଣି କଡ଼ାକଡ଼ି ହେବ ସ୍କୁଲ ବସ୍ ଓ ଅଟୋରିକ୍ସା ଯାଞ୍ଚ
ଭୁବନେଶ୍ୱର: ରାଜ୍ୟରେ ପୁଣି କଡ଼ାକଡ଼ି ହେବ ସ୍କୁଲ ବସ୍ ଓ ଅଟୋରିକ୍ସା ଯାଞ୍ଚ । କୌଣସି ଗାଡ଼ିରେ ଓଭରଲୋଡିଂ କରାଯିବ ନାହିଁ । କ୍ଷମତା ଅନୁସାରେ ହିଁ ଗାଡ଼ିରେ ପିଲାମାନେ ସ୍କୁଲ ଯିବେ । ଏନେଇ ସମସ୍ତ ଆଞ୍ଚଳିକ ପରିବହନ ଅଧିକାରୀ (ଆର୍ଟିଓ)ଙ୍କୁ ନିର୍ଦ୍ଦେଶ ଦେଇଛନ୍ତି ପରିବହନ କମିଶନର ।
ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ ଗୁରୁବାର କେନ୍ଦୁଝର ଗସ୍ତରେ ଯାଉଥିବାବେଳେ ହଠାତ୍ ଏକ ଓଭର୍ଲୋଡିଂ ସ୍କୁଲ ଗାଡ଼ିକୁ ଅଟକାଇଥିଲେ । ବସ୍ର ଯାଞ୍ଚ କରିବା ସହ ଡ୍ରାଇଭର୍କୁ ତାଗିଦ୍ କରିଥିଲେ । ଖାଲି ଗୁରୁବାର ଘଟଣା ନୁହେଁ, ପ୍ରତିଦିନ ରାଜ୍ୟରେ ଶହ ଶହ ସ୍କୁଲ ଗାଡ଼ିରେ ମାଲ୍ବୁହା ହେଲା ଭଳି ପିଲାମାନେ ସ୍କୁଲ ଯିବାଆସିବା କରୁଛନ୍ତି । ବସ୍ ହେଉ କି ଅଟୋରିକ୍ସା ମନ ଇଚ୍ଛା ପିଲାଙ୍କୁ ନେବା ଆଣିବା କରୁଛନ୍ତି । ସବୁଥିରେ ସୁରକ୍ଷା ବ୍ୟବସ୍ଥା ମଧ୍ୟ ରହୁନି । ଅନେକ ତ ବିନା ଲାଇସେନ୍ସରେ ଚଲାଉଛନ୍ତି । ଆଉ କିଛି ବିନା ପ୍ରଶିକ୍ଷିତ ଡ୍ରାଇଭର୍ରେ ଚାଲୁଛି । ଯାତାୟାତ ଲାଗି ଥିବା ନିୟମକୁ ବି ଠିକ୍ରେ ପାଳନ ହେଉନି । ଏସବୁ ଉପରେ ବାରମ୍ବାର ଯାଞ୍ଚ ହେଉଛି । କିନ୍ତୁ ମାସେ ଦି ମାସ ପରେ ପୁଣି ଯେଉଁ ଅବସ୍ଥାକୁ ସେହି ଅବସ୍ଥା ହେଉଛି । କିଛି ଦିନ ବସ୍ ଆଉ ଅଟୋରିକ୍ସା ନିୟମ ମାନୁଛନ୍ତି ପୁଣି ମାଲ୍ବାହୀ ଗାଡ଼ି ପରି ପିଲାଙ୍କୁ ସ୍କୁଲ ନେଉଛନ୍ତି । ଏହାକୁ ଯାଞ୍ଚ କରିବାକୁ ପୁଣି ନିର୍ଦ୍ଦେଶ କରିଛନ୍ତି ପରିବହନ କମିଶନର ।
Powered by Froala Editor
