ଭୁବନେଶ୍ୱର: ଆଜି ପ୍ରାଥମିକ ସମବାୟ ସମିତିର ପ୍ରଥମ ପର୍ୟ୍ୟାୟ ନିର୍ବାଚନ ଅନୁଷ୍ଠିତ ହେବ । ମୋଟ ୩୨୫୨ ପ୍ରାଥମିକ ସମବାୟ ସମିତିରୁ ୨୫୨୧ରେ ସଦସ୍ୟ/ସଦସ୍ୟା ନିଦ୍ୱର୍ନ୍ଦ୍ୱରେ ନିର୍ବାଚିତ ହୋଇଛନ୍ତି । ଅବଶିଷ୍ଟ ୭୩୧ ପ୍ରାଥମିକ ସମବାୟ ସମିତିରେ ନିର୍ବାଚନ ଅନୁଷ୍ଠିତ ହେବ । ତନ୍ମଧ୍ୟରୁ ୨୪୪ ସମିତି ସମ୍ୱେଦନଶୀଳ ବୋଲି ରାଜ୍ୟ ସମବାୟ ନିର୍ବାଚନ ଆୟୋଗ କମିଶନର ସୁନ୍ଦରଲାଲ ସିଲ୍‌ କହିଛନ୍ତି ।
ରବିବାର ପ୍ରାଥମିକ ସମବାୟ ସମିତିର ପ୍ରଥମ ପର୍ୟ୍ୟାୟ ନିର୍ବାଚନକୁ ୧୯ ଉପନିବନ୍ଧକ ଓ ୫୮ ସହକାରୀ ନିବନ୍ଧକ ପରିଚାଳନା କରିବେ ।ଭୋଟ ଗ୍ରହଣ ସରିବା ପରେ ନିର୍ବାଚନ ଅଧିକାରୀ ଏବଂ ନିୟୋଜିତ ଅନ୍ୟ ଅଧିକାରୀମାନେ ଭୋଟ୍‌ ଗଣତି କରି ବୁଥ୍‌ ସ୍ତରରେ ଫଳ ଘୋଷଣା କରିବେ । ଭୋଟ ଗଣତି ଏବଂ ଫଳ ପ୍ରକାଶ ସମୟରେ ପ୍ରାର୍ଥୀ ବା ତାଙ୍କ ଦ୍ୱାରା ନିଯୁକ୍ତ ଏଜେଣ୍ଟମାନେ ଉପସ୍ଥିତ ରହିବେ । ରାତି ୮ ସୁଦ୍ଧା ଫଳ ପ୍ରକାଶ ପାଇବ । ଆଜି ମୋଟ ୪ଲକ୍ଷ ୫୩ହଜାର ୬୧୦ ଭୋଟଦାତା ତାଙ୍କର ମତଦାନ ସାବ୍ୟସ୍ତ କରିବେ । ଆସନ୍ତା ୨୬ ତାରିଖରେ ଦ୍ୱିତୀୟ ପର୍ୟ୍ୟାୟ ମତଦାନ ହେବ । ଏ ସମ୍ପର୍କରେ ଚୂଡାନ୍ତ ସୂଚନା ୨୫ରେ ଦିଆଯିବ ବୋଲି ଆୟୋଗ କହିଛନ୍ତି ।

ଯେଉଁ ସମିତିରେ ଆସନ୍ତାକାଲି ନିର୍ବାଚନ ସରିବ, ତା’ର ଦୁଇ ଦିନ ପରେ ସଭାପତି ନିର୍ବାଚନ ପାଇଁ ବିଜ୍ଞପ୍ତି ପ୍ରକାଶ ପାଇବ । ୧୫ ଦିନ ପରେ ପ୍ରାଥମିକ ସମବାୟ ସମିତିର ସଭାପତି ଭୋଟ୍‌ ହେବ । ୧୫ ଦିନ ପରେ ଉପସଭାପତି ନିର୍ବାଚନ ହେବ । ଅକ୍ଟୋବରରେ କେନ୍ଦ୍ରୀୟ ସମବାୟ ବ୍ୟାଙ୍କ ନିର୍ବର୍ାଚନ ହେବ । ୨୦୨୩ ଜାନୁଆରୀ ରେ ୨୧ଟି ଆପେକ୍ସ ସମବାୟ ସଂସ୍ଥାର ନିର୍ବାଚନ ହେବ ବୋଲି ଶ୍ରୀ ସିଲ୍‌ ସୂଚନା ଦେଇଛନ୍ତି।

Powered by Froala Editor