ଆମର ପ୍ରିୟ ଫଳ କଦଳୀ ଫେଣାରେ ବା କାନ୍ଧିରେ ଯେପରି ସଜ୍ଜିତ ହୋଇ ରହିଥାଏ, ତାହା ବେଶ୍ ଆକର୍ଷିକ ଦିଶେ । ତେବେ ଏହି ରସାଳ ଫଳଟି ସିଧା ନ ହୋଇ ତାହାର ଆକୃତି ଏପରି ବଙ୍କା ହୋଇଥାଏ କାହିଁକି, ତାହାର କାରଣ ଖୋଜିବାକୁ ଯାଇ ଗବେଷକମାନେ ଦୀର୍ଘ ଦିନ ଯାଏ ଦ୍ୱନ୍ଦରେ ପଡିଥିଲେ । ବହୁ ଅନୁଧ୍ୟାନ ପରେ କଦଳୀର ବକ୍ରତାର ପ୍ରକୃତ କାରଣ ମିଳିପାରିଛି । ବିଶେଷ କରି ‘ନେଗେଟିଭ୍ ଜିଓ ଟ୍ରପିଜିମ୍’ ନାମକ ଏହାର ବୃଦ୍ଧି ପ୍ରକ୍ରିୟା ହିଁ ତାହାକୁ ଏପରି ବକ୍ର କରିଦେଇଥାଏ  ବୋଲି ସ୍ପଷ୍ଟ ହୋଇଛି । ଅର୍ଥାତ୍ ପୃଥିବୀର ମାଧ୍ୟାକର୍ଷଣ ବଳର ପ୍ରତିକୂଳ ଦିଗରେ ଏହା ବଢିଥାଏ । ସାଧାରଣତ ଅନ୍ୟ ଫଳଗୁଡିକ କଷି ଅବସ୍ଥାରୁ ପାକଳ ହେବାଯାଏ ପୃଥିବୀର ମାଧ୍ୟାକର୍ଷଣ ଶକ୍ତି ଯୋଗୁଁ ତଳମୁହାଁ ହୋଇ ବଢିଥାନ୍ତି । ମାତ୍ର ଆକୃତିରେ ସିଧା ଥିବା କଦଳୀ କଷିଗୁଡିକ ପଢିଳା ବେଳେ ସୂର୍ଯ୍ୟାଲୋକ ପାଇବା ପାଇଁ ସୂର୍ଯ୍ୟଙ୍କ ଆଡକୁ ଢଳି ଉପରମୁହାଁ ହୋଇ ବଢିଥାନ୍ତି । ଏହି ଅବସରରେ ସୂର୍ଯ୍ୟଙ୍କ ମାଧ୍ୟାକର୍ଷଣ ବଳ ମଧ୍ୟ ସେମାନଙ୍କୁ ତଳକୁ ଟାଣିଥାଏ । ସୁତରାଂ ସେମାନେ ମଧ୍ୟଭାଗକୁ ଏପରି ବକ୍ର ହୋଇ ପଡିଥାନ୍ତି । ଯଦିଓ କାନ୍ଧିଟି ମାଧ୍ୟାକର୍ଷଣ ବଳ ଦ୍ୱାରା ତଳକୁ ଝୁଲିଥାଏ, ଫେଣାରେ ଉପରମୁହାଁ ହୋଇ ବଢୁଥିବା କଦଳୀ ଗୁଡିକ ସମାନ ଧାରାରେ ବଙ୍କା ହୋଇ ସଜେଇ ହୋଇ ରହିଥାନ୍ତି ।

Powered by Froala Editor