ଭୁବନେଶ୍ୱର :  ପାରିବାରିକ ସମସ୍ୟା ଜାଲରୁ ଏବେବି ମୁକୁଳି ପାରିନାହାନ୍ତି କେନ୍ଦ୍ରାପଡ଼ା ସାଂସଦ ଅନୁଭବ ମହାନ୍ତି  । ବର୍ଷା ପ୍ରିୟଦର୍ଶିନୀଙ୍କ ସହ ତାଙ୍କର ବିବାଦ ପରେ ସେ ବିଜେଡ଼ିରେ ଏକରକମ କୋଣଠେସା ହୋଇଯାଇଛନ୍ତି । ସେ ଉପନିର୍ବାଚନ ହେଉ ଅବା ଦଳର ପ୍ରମୁଖ କାର୍ୟ୍ୟକ୍ରମରେ ଆଉ ଅନୁଭବଙ୍କୁ ଦେଖିବାକୁ ମିଳୁନାହିଁ  । ଫଳରେ ସେ ଯେ ନବୀନଙ୍କ ଆସ୍ଥା ହରାଇ ସାରିଛନ୍ତି ତାହା ପ୍ରମାଣିତ ହୋଇଯାଇଛି ।

ନିକଟରେ ବିଜେଡ଼ି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦିଲ୍ଲୀ ଯାଇଥିବାବେଳେ ତାଙ୍କ ପାଖେପାଖେ ଅନୁଭବଙ୍କୁ ଦେଖିବାକୁ ମିଳିଥିଲା  । ଫଳରେ ତାଙ୍କର ସମର୍ଥକମାନେ ପୁଣି ଭାଇଜାନ ବିଜେଡ଼ି ସୁପ୍ରିମୋ ନବୀନଙ୍କ ନିକଟତର ହେଲେଣି ବୋଲି ଚର୍ଚ୍ଚା କରୁଥିଲେ । କେନ୍ଦ୍ରାପଡ଼ା ସାଂସଦ ଅନୁଭବ ମହାନ୍ତି ମଧ୍ୟ ଏଭଳି ମନେ କରୁଥିଲେ । କିନ୍ତୁ ବିଜୁ ଜନତା ଦଳ ପକ୍ଷରୁ ବ୍ରଜରାଜନଗର ନିର୍ବାଚନ ପାଇଁ ଜାରି ତାରକା ପ୍ରଚାରକ ତାଲିକାରେ ଅନୁଭବ ସ୍ଥାନ ପାଇନାହାନ୍ତି  । ଏକଦା ସୁପ୍ରିମୋ ନବୀନ ପଟ୍ଟନାୟକଙ୍କ ପରେ ଅନୁଭବ ଥିଲେ ଦଳର ପ୍ରମୁଖ ଷ୍ଟାର ପ୍ରଚାରକ । ଜଣେ ଲୋକପ୍ରିୟ ଅଭିନେତା ହୋଇଥିବାରୁ ନିର୍ବାଚନ ପ୍ରଚାର କାଳରେ ଅନୁଭବ ହିଁ ବେଶ ଗୁରୁତ୍ୱ ବହନ କରୁଥିଲେ । ଏପରିକି ଲୋକପ୍ରିୟ ଅଭିନେତା ତଥା ପୂର୍ବତନ ସାଂସଦ ସିଦ୍ଧାନ୍ତ ମହାପାତ୍ରଙ୍କ ଠାରୁ ବି ବିଜେଡ଼ିରେ ତାଙ୍କର ବେଶ ଦବଦବା ରହିଥିଲା ।

ପ୍ରଶାନ୍ତ ନନ୍ଦ ଓ ସିଦ୍ଧାନ୍ତ ମହାପାତ୍ରଙ୍କ ଭଳି ଧିରେଧିରେ ବିଜେଡ଼ି ରାଜନୀତିରୁ ଅନୁଭବ ମହାନ୍ତି ମଧ୍ୟ ନିଜର ସ୍ଥାନ ହରାଉଥିବା ଲକ୍ଷ୍ୟ କରାଯାଉଛି  । ବର୍ଷାଙ୍କ ସହ ବିବାଦ କାରଣରୁ ତିର୍ତୋଲ, ବାଲେଶ୍ୱର ଓ ପିପିଲି ଉପନିର୍ବାଚନ ସମୟରେ ବି ଅନୁଭବଙ୍କୁ ତାରକା ପ୍ରଚାରକ କରାଯାଇନଥିଲା । ଗାଏମୋଟ କହିଲେ ଅନୁଭବଙ୍କୁ ଦଳ ଆଦୌ ଗୁରୁତ୍ୱ ଦେଉନାହିଁ  । ଅଭିନେତା ଅରିନ୍ଦମ ରାୟ ତାରକା ପ୍ରଚାରକ ହେଉଥିଲେ ମଧ୍ୟ ଅନୁଭବଙ୍କ ଉପରେ ସୁପ୍ରିମୋ ନବୀନ ପଟ୍ଟନାୟକ କେତେ ଫିଡ଼ିକି ଯାଇଛନ୍ତି ତାହା ଏଥିରୁ ସ୍ପଷ୍ଟ ଅନୁମେୟ  । ଫଳରେ ତାଙ୍କର ରାଜନୈତିକ କ୍ୟାରିୟର ଉପରେ ପ୍ରଶ୍ନବାଚୀ ସୃଷ୍ଟିହୋଇଛି  ।

ବର୍ଷାଙ୍କୁ ଛାଡ଼ପତ୍ର ଦେବା ପାଇଁ ଅନୁଭବ ଆବେଦନ କରିଥିବାବେଳେ ଏହି ମାମଲାର ଶୁଣାଣୀ ଶେଷ ହୋଇନାହିଁ  । କିନ୍ତୁ ଏହି ମାମଲାରେ ଅନୁଭବ ବେଶ ବିବାଦୀୟ ହୋଇଯାଇଛନ୍ତି । ଯାହାକୁ ବିଜେଡ଼ି ବେଶ ଗମ୍ଭୀରତାର ସହ ନେଇଛି  । ଅନୁଭବଙ୍କୁ ଦଳ କରଛଡ଼ା ଦେଉଥିବାବେଳେ ଆଗାମୀ ଦିନରେ ତାଙ୍କର ରାଜନୈତିକ ଭବିଷ୍ୟତ କେଉଁ ଦିଗ ଦେଇ ଗତି କରିବ ତାହାର ଉତ୍ତର ସମୟ ହିଁ ଦେଇପାରିବ  । 

Powered by Froala Editor