ଜମ୍ମୁ-କାଶ୍ମୀରରେ ସେନାକୁ ସଫଳତା: ଏନ୍କାଉଣ୍ଟରରେ ଅଶରଫ ମୌଲବୀ ସହ ୩ ନିହତ
![ଜମ୍ମୁ-କାଶ୍ମୀରରେ ସେନାକୁ ସଫଳତା: ଏନ୍କାଉଣ୍ଟରରେ ଅଶରଫ ମୌଲବୀ ସହ ୩ ନିହତ](https://odishanewslens.com/news_gallery/13114_1651856789.jpg)
ଶ୍ରୀନଗର: ସେନାକୁ ପୁଣି ମିଳିଛି ବଡ଼ ସଫଳତା । ଜମ୍ମୁ-କାଶ୍ମୀରର ପହଲଗାମରେ ସୁରକ୍ଷାକର୍ମୀ ଓ ଆତଙ୍କବାଦୀ ଭିତରେ ହୋଇଛି ଗୁଳି ବିନିମୟ । ଏଥିରେ ହିଜବୁଲ ମୁଜାହୁଦ୍ଦିନର ସବୁଠାରୁ ପୁରୁଣା ଆତଙ୍କବାଦୀ ଅଶରଫ ମୌଲବୀ ସହ ୩ ଜଣ ନିହତ ହୋଇଥିବା ପୁଲିସ୍ ପକ୍ଷରୁ ସୂଚନା ଦିଆଯାଇଛି । ଅଶରଫ ପୁଲିସ୍ ତାଲିକାରେ ମୋଷ୍ଟ ୱାଣ୍ଟେଡ୍ ଥିଲା । ତା’ ମୁଣ୍ଡ ଉପରେ ୧୦ ଲକ୍ଷର ପୁରସ୍କାର ରାଶି ଘୋଷଣା ହୋଇଥିଲା ।
କଶ୍ମୀର ପୁଲିସ ମହାନିର୍ଦ୍ଦେଶକଙ୍କ କହିବା ମୁତାବକ, ବଟକୁଟ ଜଙ୍ଗଲରେ ଅଶରଫ ଲୁଚିଥିବା ସେନାକୁ ବିଶ୍ୱସ୍ତ ସୂତ୍ରରୁ ଖବର ମିଳିଥିଲା । ଏହାପରେ ତୁରନ୍ତ ପୁଲିସ୍ ଓ ସେନା ପକ୍ଷରୁ ଆରମ୍ଭ ହୋଇଥିଲା ସର୍ଚ୍ଚ ଅପରେସନ୍ । ଯବାନମାନେ ପୂରା ଜଙ୍ଗଲକୁ ଚାରିପଟୁ ଘେରି ଯାଇଥିଲେ । କମ୍ବିଂ ହେଉଥିବା ଜାଣିବା ପରେ ଅଶରଫ ଓ ତାର ସହଯୋଗୀମାନେ ପୁଲିସ ଉପରକୁ ଗୁଳି ଚଳାଇଥିଲେ । ସେମାନେ ଗଛ ଉପରେ ଲୁଚି ରହି ଯବାନଙ୍କୁ ଟାର୍ଗେଟ୍ କରିଥିଲେ । ଯବାନମାନେ ମଧ୍ୟ ଏହାର ପାଲଟା ଜବାବ ଦେଇଥିଲେ । ଦୀର୍ଘ ସମୟ ପର୍ଯ୍ୟନ୍ତ ଉଭୟ ପକ୍ଷରୁ ଗୁଳି ବର୍ଷା ହୋଇଥିଲା । ଶେଷରେ ୩ ଆତଙ୍କୀ ନିହତ ହୋଇଥିଲେ ।
ଅଶରଫ ହିଜବୁଲ ଆତଙ୍କବାଦୀ ସଙ୍ଗଠନ କଶ୍ମୀର ଶାଖାର କମାଣ୍ଡର ଥିଲା । ୨୦୨୦ ମେ ୬ ତାରିଖରେ ଆତଙ୍କୀ ରିୟାଜ ନାଇକୁର ମୃତ୍ୟୁ ପରେ ଅଶରଫକୁ କମାଣ୍ଡର ଭାବେ ନିଯୁକ୍ତି ମିଳିଥିଲା । ଏବେ ବି ଅନନ୍ତନାଗର ବଟକୁଟ ଜଙ୍ଗଲରେ ଆହୁରି ଦୁଇ ଜଣ ଆତଙ୍କବାଦୀ ଲୁଚି ରହିଥିବା ସନ୍ଦେହ କରାଯାଉଛି । ସେଠାରେ ସୁରକ୍ଷାକର୍ମୀ ଓ ଆତଙ୍କବାଦୀ ମଧ୍ୟରେ ଗୁଳି ବିନିମୟ ଜାରି ରହିଛି । ଘଞ୍ଚ ଜଙ୍ଗଲ ସହ ରାତି ହୋଇଯିବାରୁ ସର୍ଚ୍ଚ ଅପରେସନ୍ରେ ବାଧା ଉପୁଜିଛି । ରିପୋର୍ଟ ଲେଖା ହେବା ପର୍ଯ୍ୟନ୍ତ ଉଭୟ ପକ୍ଷରୁ ଗୁଳିମାଡ଼ ଜାରି ରହିଥିଲା । ତେବେ ଆତଙ୍କବାଦୀମାନେ ଅମରନାଥ ଯାତ୍ରାକୁ ଟାର୍ଗେଟ କରିଥିଲେ ବୋଲି ଜଣେ ବରିଷ୍ଠ ପୁଲିସ୍ ଅଧିକାରୀ ସୂଚନା ଦେଇଛନ୍ତି ।
Powered by Froala Editor