ଆରମ୍ଭ ହୋଇଛି ଖରାଦିନ। ଏବେଠୁ ହିଁ ଦିନର ତାପମାତ୍ରା ୪୦ ଉପରେ ରହୁଛି। ଫଳରେ ଘରୁ ବାହାରିବା ଏକ ପ୍ରକାରର ଅସମ୍ଭବ ହୋଇପଡ଼ିଛି। ଏଭଳି ସ୍ଥିତିରେ ବାହାରୁ ଆସି ତୁରନ୍ତ ଏସିରେ ବସିଲେ ମୁଣ୍ଡ ବିନ୍ଧା ହେବା ଭଳି ସମସ୍ୟା ଦେଖାଦେବା ସମ୍ଭାବନା ରହିଛି। ଗରମରୁ ମୁକ୍ତି ପାଇଁ ଖରାଦିନେ ଆପଣ ସାଧାରଣ ପାଣି ଅପେକ୍ଷା ବରଫ ମିଶା ପାଣିରେ ଗାଧୋଇ ପାରିବେ। ଏହା ଦ୍ୱାରା ଶରୀରର ତାପମାତ୍ରା ଶୀଘ୍ର କମିଥାଏ। ଅଚାନକ ଶରୀରର ତାପମାତ୍ରା ବଢ଼ିବା ଓ କମିବା ଶରୀର ପାଇଁ ଘାତକ ସାଜିପାରେ। ଏଣୁ ଖରାଦିନେ ଏସି ଅପେକ୍ଷା ବରଫ ମିଶା ପାଣି ବ୍ୟବହାର କରିବା ଲାଭଦାୟକ ହୋଇଥାଏ। ତେବେ ଆସନ୍ତୁ ଜାଣିବା ବରଫ ମିଶ୍ରିତ ପାଣିରେ ଗାଧୋଇବାର ଅନ୍ୟ ଫାଇଦା…

ଶରୀରର ଉର୍ଜା ବଢ଼େ:
ଖରାଦିନେ ଶରୀରରୁ ବଳ କମିଯାଏ। ଫଳରେ ଭାରି ଦୁର୍ବଳ ଲାଗେ। ଯଦି ଏହି ସମୟରେ ବରଫ ମିଶା ପାଣିରେ ଗାଧାନ୍ତି, ତେବେ ଶରୀରରେ ତୁରନ୍ତ ଉର୍ଜା ଆସେ ଓ ଅଧିକ ଏନ୍‌ର୍ଜେଟିକ୍‌ ଅନୁଭବ ହୁଏ।

ଷ୍ଟ୍ରେସ୍‌ କମାଏ:
ବରଫ ମିଶା ପାଣିରେ ଗାଧୋଇବା ଦ୍ୱାରା ମାନସିକ ଚିନ୍ତାରୁ ମଧ୍ୟ ମୁକ୍ତି ମିଳେ। ପାଣି ବାଲ୍ଟିରେ ଦୁଇ ଟ୍ରେ ବରଫ ମିଶାଇ ଦିଅନ୍ତୁ। ଏହାର ଥଣ୍ଡା ଟିକେ କମିବା ପରେ ଗାଧୋଇ ପଡ଼ନ୍ତୁ। ଦେଖିବେ ଷ୍ଟ୍ରେସ୍‌ ଦୂର ହେବ।

ଭୋକ ପରିମାଣକୁ ବଢ଼ାଏ:
ଗରମ ଦିନରେ କିଛି ଖାଇବାକୁ ଇଚ୍ଛା ହୁଏ ନାହିଁ। କେବଳ ଥଣ୍ଡା ଆଉ ମିଠା ଜିନିଷ ପିଇବାକୁ ମନ ହୁଏ। କିନ୍ତୁ ବରଫ ମିଶା ଥଣ୍ଡା ପାଣିରେ ଗାଧୋଇଲେ, ପ୍ରାକୃତିକ ଭାବେ ଭୋକ ବଢ଼େ। ଯାହା ଫଳରେ ଆପଣ ପେଟ ପୂରା ଖାଇପାରିବେ।

ତ୍ୱଚାର ଚମକ ବୃଦ୍ଧି କରେ:
କୋଲ୍ଡ ସାଓ୍ଵାର ସ୍କିନ୍‌ ପୋର୍ସକୁ ଟାଇଟ୍‌ ରଖିବା ସହ ତ୍ୱଚାର ଲୋଚାକୋଚା ପଣକୁ ବି ଦୂର କରିବାରେ ସାହାଯ୍ୟ କରିଥାଏ। ଖରା ଯୋଗୁ ଝାଳ ମାଧ୍ୟମରେ ଶରୀରର ଅଧିକାଂଶ ଜଳୀୟ ଅଂଶ ବାହାରକୁ ଚାଲିଆସେ। ଏଭଳି ସ୍ଥିତିରେ ଥଣ୍ଡା ପାଣିରେ ଗାଧୋଇଲେ ତ୍ୱଚା ଶୀଘ୍ର ରିଲାକ୍ସ ହୁଏ ଓ ରିଙ୍କଲ୍‌ ଫ୍ରି ରହେ।

ଶରୀରକୁ ରଖେ ମଜଭୁତ:
ବର୍ଷା ଦିନେ ଶୀଘ୍ର ଥଣ୍ଡା ଧରୁଥିବା ଲୋକ ଯଦି ଖରାଦିନେ ବରଫ ପାଣିରେ ସ୍ନାନ କରନ୍ତି ତେବେ ତାଙ୍କ ଶରୀରର ଥଣ୍ଡା ସହ ଲଢ଼ିବା କ୍ଷମତା ବୃଦ୍ଧି ପାଏ। କାରଣ ଏହା ଦ୍ୱାରା ଆପଣଙ୍କ ଶରୀରର ତାପମାତ୍ରାକୁ ମେଣ୍ଟେନ୍‌ କରିବା ଅଭ୍ୟାସ ହୋଇଯାଏ ଓ ବର୍ଷାଦିନେ ଆଉ ବାରମ୍ବାର ଥଣ୍ଡା ହୋଇନଥାଏ।

Powered by Froala Editor