ନୂଆଦିଲ୍ଲୀ: ଭାରତରେ ଏଲପିଜି ଦାମ ସାରା ବିଶ୍ୱରେ ସବୁଠୁ ମହଙ୍ଗା । ବିନିମୟ ମୁଦ୍ରା ଅଧାରିତ କ୍ରୟ ଶକ୍ତି ଅନୁସାରେ କରାଯାଇଥିବା ଏକ ହିସାବରୁ ଏହା ଜଣାପଡ଼ିଛି । ପ୍ରତି ଲିଟର ଏଲପିଜିର ଦାମ ଭାରତରେ ସର୍ବାଧିକ ଥିବା ବେଳେ ପେଟ୍ରୋଲ ତୃତୀୟ ସର୍ବାଧିକ ଓ ଡ଼ିଜେଲ ଅଷ୍ଟମ ସର୍ବାଧିକ ମହଙ୍ଗା ରହିଛି । ଯଦି ପେଟ୍ରୋଲର ଲିଟର ପିଛା ଦାମ ୧୨୦ ଟଙ୍କା ଓ ଡ଼ଲାର ତୁଳନାରେ ଟଙ୍କା ମୂଲ୍ୟ ୭୫ଟଙ୍କା ୮୪ ପଇସା ବୋଲି ଧରି ନିଆଯିବ ତେବେ ଆନ୍ତର୍ଜାତିକ ବଜାରରେ ସେହି ପେଟ୍ରୋଲ ଦାମ ହେବ ୧.୫୮ ଡ଼ଲାର ।

ଭାରତରେ ଜଣେ ବ୍ୟକ୍ତି ୭୫ଟଙ୍କା ୮୪ରେ ବହୁତ କିଛି କିଣିପାରିବେ । କିନ୍ତୁ ଆମେରିକାରେ ଏକ ଡ଼ଲାରରେ ସେତିକି ଜିନିଷ କିଣି ହେବ ନାହିଁ । କାରଣ ଆମେରିକାରେ ଏକ କିଲୋ ଆଳୁର ଦାମ ୧.୯୪ ଡ଼ଲାର ରହିଛି ଯାହାକୁ ଭାରତୀୟ ମୁଦ୍ରାରେ ବଦଳାଇଲେ ୧୪୭ ଟଙ୍କା ହେବ । ୧୪୭ ଟଙ୍କାରେ ଭାରତରେ ୭କିଲୋ ଆଳୁ କିଣିହେବ । ବିଭିନ୍ନ ଦେଶର ମୁଦ୍ରାର ଶକ୍ତ ଭିନ୍ନ ଭିନ୍ନ ରହୁଛି । ତାହାକୁ କ୍ରୟ ଶକ୍ତି ସମତା(ପିପିପି) ଡ଼ଲାର ବା ଆନ୍ତର୍ଜାତିକ ଡ଼ଲାର କୁହାଯାଉଛି । ଆଇଏମଏଫ ତଥ୍ୟ ଅନୁସାରେ ଆନ୍ତର୍ଜାତିକ ଡ଼ଲାର ଦାମ ୨୦୨୨ରେ ହାରାହାରି ୨୨ଟଙ୍କା ୬୦ ପଇସା ରହିଛି । ଯଦି ସେହି ମୂଲ୍ୟ ବିଚାରକୁ ନିଆଯିବ ତେବେ ଭାରତରେ ଏକ ଲିଟର ପେଟ୍ରୋଲ ଦାମ ହେଉଛି ୫.୨ ଆନ୍ତର୍ଜାତିକ ଡ଼ଲାର । ସୁଦାନ(୮ଆନ୍ତର୍ଜାତିକ ଡ଼ଲାର) ଓ ଲାଓସ(୫.୬ଆନ୍ତର୍ଜାତିକ ଡ଼ଲାର) ତୁଳନାରେ ଭାରତରେ ପେଟ୍ରୋଲ ତୃତୀୟ ସର୍ବାଧିକ ଦାମରେ ବିକ୍ରି ହେଉଛି ।

ଆମେରିକାରେ ପେଟ୍ରୋଲ ଦାମ ୧.୨ ଆନ୍ତର୍ଜାତିକ ଡ଼ଲାର ଥିବା ବେଳେ ଜାପାନରେ ୧.୫ଡ଼ଲାର, ଜର୍ମାନିରେ ୨.୫ଡ଼ଲାର ଓ ସ୍ପେନରେ ୨.୭ ଡ଼ଲାର ରହିଛି । ଏହି ହିସାବ ଅନୁସାରେ ଭାରତରେ ବିକ୍ରି ହେଉଥିବା ପ୍ରତି ଲିଟର ଏଲପିଜି ଦାମ ହେଉଛି ୩.୫ ଆନ୍ତର୍ଜାତିକ ଡ଼ଲାର ଯାହା ସାରା ବିଶ୍ୱରେ ସର୍ବାଧିକ । ଭାରତ ପଛକୁ ଦାମ ଅନୁସାରେ ରହିଛନ୍ତି ତୁର୍କୀ, ଫିଜି, ମାଲଡେ଼ାଭ ଓ ୟୁକ୍ରେନ । ଏହା ତୁଳନାରେ ସ୍ୱିଜରଲ୍ୟାଣ୍ଡ, ଫ୍ରାନ୍ସ, କାନାଡ଼ା ଓ ବ୍ରିଟେନରେ ଦାମ ୧ ଆନ୍ତର୍ଜାତିକ ଡ଼ଲାର ରହିଛି । ଭାରତରେ ଏବେ ଯେଉଁ ଦାମରେ ଡ଼ିଜେଲ ବିକ୍ରି ହେଉଛି ତାହାର ଦାମ ହେବ ୪.୬ ଆନ୍ତର୍ଜାତିକ ଡ଼ଲାର । ତାହା ହେଉଛି ସାରା ବିଶ୍ୱରେ ଡ଼ିଜେଲର ଅଷ୍ଟମ ସର୍ବାଧିକ ଦାମ । 

Powered by Froala Editor