ବ୍ୟବସାୟରେ କ୍ଷତି ଯୋଗୁ ୨୫ ବର୍ଷୀୟ ଯୁବକଙ୍କୁ ନିଜ ବାପା ରାସ୍ତାରେ ଜୀବନ୍ତ ଜାଳି ହତ୍ୟା କରିଛି। ବେଙ୍ଗାଲୁରୁର ବାଲ୍ମିକ ନଗରରେ ଘଟିଥିବା ଏହି ଲୋମହର୍ଷଣକାରୀ ଘଟଣାରେ ପୁଲିସ୍‌ ଅଭିଯୁକ୍ତ ୫୫ ବର୍ଷୀୟ ବ୍ୟକ୍ତିଙ୍କୁ ଗିରଫ କରିଛି।

ସୁରେନ୍ଦ୍ର କୁମାର ସେତିଆ କେମିକାଲ ରଙ୍ଗ ବ୍ୟବସାୟ କରୁଥିବା ବେଳେ ପୁଅ ଅର୍ପିତ କୁମାର ବ୍ୟବସାୟରେ ବାପାଙ୍କୁ ସହଯୋଗ କରୁଥିଲେ । ଏହାସହ ଅର୍ପିତ ଆକାଉଣ୍ଟସ ମଧ୍ୟ ବୁଝୁଥିଲେ । ବ୍ୟବସାୟରେ ବ୍ୟାପକ କ୍ଷତି ହେବା ପରେ ଆକାଉଣ୍ଟସରେ ଗୋଳମାଳ ଥିବା ଜଣାପଡ଼ିଥିଲା । ଏଥିପାଇଁ ବାପା ସୁରେନ୍ଦ୍ର ପୁଅ ଅର୍ପିତଙ୍କୁ ବ୍ୟବସାୟିକ ଆକାଉଣ୍ଟ ବିଷୟରେ ପଚାରିଥିଲେ। ବ୍ୟବସାୟର ହିସାବ ମାଗିବାରୁ ବାପା ପୁଅଙ୍କ ମଧ୍ୟରେ ତିକ୍ତତା ଆରମ୍ଭ ହୋଇଥିଲା। ଏହାକୁ ନେଇ ଏପ୍ରିଲ ୧ରେ ବାପା ପୁଅ ଝଗଡ଼ା କରିଥିଲେ।

ଘଟଣା ଦିନ ଗୋଦାମ ଭିତରେ ସୁରେନ୍ଦ୍ର ଓ ଅର୍ପିତ ପ୍ରାୟ ୩୦ ମିନିଟ୍‌ ଯୁକ୍ତିତର୍କ କରିଥିଲେ। ଏହାପରେ ଅର୍ପିତ ଗୋଦାମ ଭିତରୁ ବାହାରକୁ ଦୌଡ଼ି ଚାଲି ଆସିଥିଲେ। ଏହି ସମୟରେ ତାଙ୍କ ଦେହରେ କିଛି ଲିକ୍ୟୁଇଡ ପଡ଼ିଥିବା ସ୍ଥାନୀୟ ଲୋକମାନେ କହିଛନ୍ତି। ଲୋକଙ୍କ କହିବା କଥା ଯୁକ୍ତିତର୍କ ବେଳେ ସୁରେନ୍ଦ୍ର କୁମାର ପୁଅ ଉପରକୁ ରାଗରେ ରଙ୍ଗରେ ମିଶଯାଉଥିବା ଥିନର ଫୋପାଡ଼ି ଦେଇଥିଲେ।

ଅର୍ପିତ ଗୋଦାମରୁ ଆସିବା ପରେ ତାଙ୍କ ପଛପଛେ ସୁରେନ୍ଦ୍ର ମଧ୍ୟ ଆସିଥିଲେ। ରାସ୍ତା ଉପରେ ଅର୍ପିତ ବାପାଙ୍କ ଗୋଡ଼ ତଳେ ପଡ଼ି କ୍ଷମା ମାଗିଥିଲେ ମଧ୍ୟ ସେ କିଛି ବି ଶୁଣି ନଥିଲେ। ସୁରେନ୍ଦ୍ର ନିଆଁ ଲଗାଇବାକୁ ଦିଆସିଲ ମାରିବା ବେଳେ ଅର୍ପିତ ତାଙ୍କୁ ଅଟକାଉଥିବା ସିସିଟିଭିରେ କଏଦ ହୋଇଛି। ଗତକାଲି ଚିକିତ୍ସାଧୀନ ଅବସ୍ଥାରେ ଅର୍ପିତଙ୍କ ମୃତ୍ୟୁ ହୋଇଛି । ଅଭିଯୁକ୍ତ ବାପାଙ୍କୁ ଗିରଫ କରିଛି ପୋଲିସ ।

Powered by Froala Editor