କୁନି ଭାଇଭଉଣୀଙ୍କୁ ୨୦ରୁ ଅଧିକ ବୁଲା କୁକୁର ଝୁଣି ପକାଇଲେ । କଲବଲ କରି ମାରିଦେଲେ ୮ ବର୍ଷୀୟ ଭାଇକୁ । ୫ ବର୍ଷର ଭଉଣୀ ବି ଗୁରୁତର ଅବସ୍ଥାରେ ଏବେ ହସ୍ପିଟାଲରେ ଭର୍ତ୍ତି ହୋଇଛି । ଏଭଳି ଦୁଃଖଦ ଘଟଣା ଘଟିଛି ଠାକୁରଗଞ୍ଜର ମୁସାହିବଗଞ୍ଜ ଅଞ୍ଚଳରେ ।

ହାଇଦର ଓ ଜନତ ଭାଇଭଉଣୀ । ଉଭୟ ଘର ସାମ୍ନାରେ ଖେଳୁଥିବା ବେଳେ ହଠାତ୍‌ ୨୦ରୁ ଅଧିକ ବୁଲା କୁକୁର ସେମାନଙ୍କ ପାଖକୁ ଦୌଡ଼ି ଆସି କାମୁଡ଼ିବା ଆରମ୍ଭ କରିଦେଇଥିଲେ। ସେମାନଙ୍କ ଚିତ୍କାର ଶୁଣି ପରିବାର ଲୋକ ସେଠାରେ ପହଞ୍ଚିଥିଲେ। ଏହାପରେ ଉଭୟଙ୍କୁ ରକ୍ତାକ୍ତ ଅବସ୍ଥାରେ ତୁରନ୍ତ କେଜିଏମୟୁ ଟ୍ରମା ସେଣ୍ଟରୁ ନିଆଯାଇଥିଲା। ତେବେ ଚିକିତ୍ସାଧୀନ ଅବସ୍ଥାରେ ୮ ବର୍ଷୀୟ ମହମ୍ମଦ ହାଇଦର ପ୍ରାଣ ହରାଇଛନ୍ତି। ତାଙ୍କର ୫ ବର୍ଷୀୟ ଭଉଣୀ ଜନତଙ୍କୁ ଗୁରତର ଅବସ୍ଥାରେ ଆଇସିୟୁରେ ଭର୍ତ୍ତି କରାଯାଇଛି। ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି।

ହାଇଦର ଓ ଜନତଙ୍କ ପରିବାର ଲୋକ କହିଛନ୍ତି, ସେମାନେ ବୁଲା କୁକୁରଙ୍କ ଦୌରାତମ୍ୟ ବିଷୟରେ ବାରମ୍ବାର ଲକ୍ଷ୍ନୌ ମ୍ୟୁନିସପାଲ କର୍ପୋରେସନ(ଏଲଏମସି)କୁ ଜଣାଇଥିଲେ। ଏଥିସହ ପ୍ରତିକାର ପାଇଁ ଅନୁରୋଧ କରିଥିଲେ। କିନ୍ତୁ ଏଲଏମସି ଏହାକୁ କର୍ଣ୍ଣପାତ କରି ନଥିଲା। ୬ ନମ୍ବର ମହାନଗର ନିଗମ ଜୋନ୍‌ ଏବଂ ଅନ୍ୟମାନଙ୍କ ବିରୋଧରେ କୁକୁର ଆକ୍ରମଣର ଶିକାର ହୋଇଥିବା ଦୁଇ ପିଲାଙ୍କ ବାପା ଠାକୁରଗଞ୍ଜ ଥାନାରେ ଅଭିଯୋଗ ଦାଏର କରିଛନ୍ତି।

Powered by Froala Editor