ମୁମ୍ବାଇ: ବିଗ୍ ବସ୍ ୱିନର ଦିବ୍ୟା ଅଗ୍ରୱାଲ୍ ଏବଂ ଅଭିନେତା ବରୁଣ ସୁଦ୍‌ଙ୍କ ମଧ୍ୟରେ ଥିବା ଦୀର୍ଘ ଦିନର ପ୍ରେମ ସମ୍ପର୍କ ଏବେ ଭାଙ୍ଗି ଯାଇଛି । ପାଖାପାଖି ୪ ବର୍ଷ ଉଭୟ ଏକାଠି ସମୟ କାଟିଥିବା ବେଳେ ନିକଟ ଅତୀତରେ ସେମାନଙ୍କ ବ୍ରେକ୍‌ଅପ୍ ହୋଇଛି । ଟେଲି ଦୁନିଆର ଏହି ଲଭ୍ ବାର୍ଡଙ୍କ ବିଚ୍ଛେଦକୁ ସହଜରେ ଗ୍ରହଣ କରିପାରୁନାହାନ୍ତି ଫ୍ୟାନ୍‌ସମାନେ । ଏହା ଭିତରେ ଏବେ ପୁଣି ଏକ ଟୁଇଷ୍ଟ୍ ଆସିଛି । ବରୁଣଙ୍କ ପିତା ବିନିତ୍ ସୁଦ୍ ସୋସିଆଲ୍ ମିଡିଆରେ ଦିବ୍ୟାଙ୍କ ନିଷ୍ପତ୍ତିକୁ ସମ୍ମାନ ଜଣାଇବା ସହ ତାଙ୍କ ଉଜ୍ଜ୍ୱଳ ଭବିଷ୍ୟତ କାମନା କରିଛନ୍ତି । ଯାହାକି ଏବେ ଚର୍ଚ୍ଚାର ବିଷୟ ପାଲଟିଛି ।

ବ୍ରେକଅପ୍ ପରେ ନିକଟରେ ଦିବ୍ୟା ଏକ ଇମୋସନାଲ୍‌ ଟୁଇଟ୍ କରିଥିଲେ । ଯେଉଁଥିରେ ସେ ଲେଖିଥିଲେ, ‘ଜୀବନ ଏକ ସର୍କସ ପରି । ସମସ୍ତଙ୍କୁ ଖୁସି ରଖିବାକୁ ଚେଷ୍ଟା କରନ୍ତୁ କିନ୍ତୁ କାହା ଉପରେ ଆଶା ରଖନ୍ତୁ ନାହିଁ । ଏହା ସତ କାହିଁକି ନା କଣ ହୁଏ ଧିରେ ଧିରେ ଭଲ ପାଇବା ବି କମି ଯାଇଥାଏ । ମୋ ସହ ଯାହା ଘଟୁଛି କି ଘଟିଛି ମୁଁ କାହାକୁ ଦାୟୀ କିମ୍ବା ଦୋଷ ଦେଉ ନାହିଁ … ମୁଁ ଭାବୁଛି ଯାହା ହୋଇଗଲା ତାହା ଏବେ ସରିଛି … ମୁଁ ନିଶ୍ୱାସ ନେବାକୁ ଏବଂ ନିଜ ପାଇଁ ବଞ୍ଚିବାକୁ ଚାହୁଁଛି … ଠିକ ଅଛି । ଏହାସହ ସେ ଆହୁରି କହିଥିଲେ, ବରୁଣ ଜଣେ ଭଲ ମଣିଷ , ସେ ସବୁବେଳେ ମୋର ଭଲ ବନ୍ଧୁ ହୋଇ ରହିବେ ।

ଏହାପରେ ବରୁଣ ମଧ୍ୟ ଟୁଇଟ୍‌ କରି ଏକ ଫଟୋ ସେୟାର କରିଥିଲେ । ଆଉ ଲେଖିଥିଲେ ‘ସବୁଦିନ ପାଇଁ ଏବଂ ସବୁଦିନ ପାଇଁ’ । ଏହି ପୋଷ୍ଟ ସେୟାର ହେବା ମାତ୍ରେ ବରୁଣଙ୍କୁ ଖୁବ୍‌ ଟ୍ରୋଲ୍‌ କରାଯାଇଥିଲା । ଏହି ସମୟରେ ବରୁଣଙ୍କ ପିତା ବିନିତ୍‌ ସୁଦ ଆସି ବରୁଣଙ୍କ ଟୁଇଟ୍‌ ରିଟୁଇଟ୍ କରିଥିଲେ । ସେ ଲେଖିଛନ୍ତି ଯେ ସେ ଦିବ୍ୟାଙ୍କ ନିଷ୍ପତ୍ତିକୁ ସମ୍ମାନ କରନ୍ତି । ଦିବ୍ୟାଙ୍କ ପାଇଁ ତାଙ୍କର କୌଣସି ପ୍ରକାରର ଭୁଲ୍‌ ଭାବନା ନାହିଁ । ଦିବ୍ୟାଙ୍କ ନିଷ୍ପତ୍ତିକୁ ସମ୍ମାନ ଦିଅନ୍ତୁ । ମୋର ତାଙ୍କ ଉପରେ କୌଣସି ନକାରାତ୍ମକତା ଚିନ୍ତା ନାହିଁ ।

Powered by Froala Editor