ଭୁବନେଶ୍ୱର: ଆଜି ରାଜ୍ୟରେ ଚାଲିଛି ପଞ୍ଚମ ତଥା ଅନ୍ତିମ ପର୍ଯ୍ୟାୟ ପଞ୍ଚାୟତ ନିର୍ବାଚନ । ତେବେ ଗତ ୪ଟି ପର୍ଯ୍ୟାୟ ଭଳି ଶେଷ ପର୍ଯ୍ୟାୟରେ ବି ହିଂସାକାଣ୍ଡ ଦେଖିବାକୁ ମିଳିଛି ।  କେଉଁଠି ମାଡ଼ ତ କେଉଁଠି ଭୋଟବାକ୍ସକୁ ପାଣିରେ ଫିଙ୍ଗିବା ଭଳି ଘଟଣା ଘଟିଛି । ତେବେ ନିଆଳି ପୋଖରୀଗାଁ ପଞ୍ଚାୟତରେ ୯ଟି ବୁଥରେ ଭୋଟ ବନ୍ଦ ଥିବା ଜଣାଯାଇଛି ।  ୧୧, ୧୨, ୧୩, ୧୪, ୧୫, ୧୬, ୧୭, ୧୮ ଓ ୧୯ ନଂ ବୁଥରେ ଭୋଟ ବନ୍ଦ ରହିଛି ।  ଭୋଟ ବାକ୍ସକୁ ପାଣିରେ ଫିଙ୍ଗିବା ଓ ପାଣି ଭର୍ତ୍ତି କରିବାରୁ ଭୋଟ ବନ୍ଦ ରହିଛି ।  ସେହିପରି ୧, ୨, ୩, ୪, ୫, ୨୦ ଓ ୨୧ ନଂ ବୁଥରେ ବ୍ୟାପକ ରିଗିଂ ହୋଇଥିବା ଅଭିଯୋଗ ହୋଇଛି । ଭୋଟରଙ୍କୁ ଜଣେ ନିର୍ଦ୍ଧିଷ୍ଟ ସରପଞ୍ଚ ପ୍ରାର୍ଥୀଙ୍କ ସମର୍ଥକ ମାଡ଼ ମାରିବା ନେଇ ଅଭିଯୋଗ ହୋଇଛି । 

ଅନ୍ୟପକ୍ଷରେ ଭଦ୍ରକ ଜିଲ୍ଲା ଧାମନଗର ଅର୍ଜୁନପୁର ପଞ୍ଚାୟତରେ ପ୍ରବଳ ଉତ୍ତେଜନା ଦେଖିବାକୁ ମିଳିଛି ।  ୩,୪ ଓ ୮ ନଂ ବୁଥରେ ମାଡ଼ ମାରି ଦୁର୍ବୃତ୍ତମାନେ ଏଜେଣ୍ଟଙ୍କୁ ବାହାର କରିଦେଇଥିବା ଜଣାଯାଇଛି ।  ସେହିପରି ୬ ଓ ୭ ନଂ ବୁଥରେ ରିଗିଂ ହୋଇଥିବା ଅଭିଯୋଗ ହୋଇଥିବାବେଳେ ଦୁଇଗୋଷ୍ଠୀ ପିଟାପିଟି ହୋଇଥିବା ଜଣାଯାଇଛି । 

ପ୍ରକାଶ ଯେ ଆଜି ରାଜ୍ୟରେ  ପଞ୍ଚମ ତଥା ଶେଷ ପର୍ୟ୍ୟାୟ ପଞ୍ଚାୟତ ନିର୍ବାଚନ । ସକାଳ ୭ଟାରୁ ଆରମ୍ଭ ହୋଇଛି ଭୋଟିଂ । ୨୫ ଜିଲ୍ଲାର ୪୮ ବ୍ଲକରେ ଆରମ୍ଭ ହୋଇଛି ଭୋଟିଂ । ୧୩୧ ଜିଲ୍ଲା ପରିଷଦ ଆସନରେ ନେତା ବାଛୁଛନ୍ତି ଜନତା । ୯୭୫ ପଞ୍ଚାୟତର ୧୩ ହଜାର ୫୧୪ ବୁଥରେ ମତ ସାବ୍ୟସ୍ତ କରୁଛନ୍ତି ଭୋଟର । ଭୋଟ ପାଇଁ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି । ଯେଉଁ ବୁଥ୍ ସମ୍ବେଦନଶୀଳ ରହିଛି ସେଠାରେ ସୁରକ୍ଷା ବ୍ୟବସ୍ଥାକୁ ଅଧିକ କଡ଼ାକଡ଼ି କରାଯାଇଛି । ପଞ୍ଚମ ପର୍ୟ୍ୟାୟ ନିର୍ବାଚନରେ ୧ ହଜାର ୭୭୫ ସମ୍ବେଦନଶୀଳ ବୁଥ ରହିଛି । ସମ୍ବେଦନଶୀଳ ବୁଥରେ ସୁରକ୍ଷା ବ୍ୟବସ୍ଥା ଅଧିକ କଡ଼ାକଡ଼ି କରାଯାଇଛି । ଏହି ପର୍ୟ୍ୟାୟରେ ୩୦ ହଜାରରୁ ଅଧିକ ପୋଲିସ କର୍ମଚାରୀ ନିୟୋଜିତ ହୋଇଛନ୍ତି । ସୂଚନା ଅନୁସାରେ ରାଜ୍ୟରେ ଚାରୋଟି ପର୍ୟ୍ୟାୟରେ ପଞ୍ଚାୟତ ନିର୍ବାଚନ ଶେଷ ହୋଇଥିବା ବେଳେ ଆଜି ରାଜ୍ୟରେ ଶେଷ ତଥା ପଞ୍ଚମ ପର୍ୟ୍ୟାୟ ନିର୍ବାଚନ ଅନୁଷ୍ଠିତ ହେଉଛି । ଆଜି ପଞ୍ଚମ ପର୍ୟ୍ୟାୟ ଭୋଟ ଶେଷ ହେବା ପରେ ଫେବ୍ରୁଆରୀ ୨୬ରୁ ୨୮ ପର୍ୟ୍ୟନ୍ତ ଭୋଟ ଗଣତି ହେବ ।

Powered by Froala Editor