ଭଦ୍ରକ ଜିଲ୍ଲା ଧାମନଗର ଥାନା ଦେହୁଡି ଆନନ୍ଦପୁର ସ୍ଥିତ ହାତିବାଡି ଗାଁର ଜଣେ ବ୍ୟକ୍ତିଙ୍କ ବାଡିରୁ ନର କଙ୍କାଳ ଉଦ୍ଧାର ହୋଇଛି । ତେବେ ଜୋତା ଓ କପଡା ଦେଖି ଏହି କଙ୍କାଳ ଗାଁ ର ୧୯ ବର୍ଷୀୟ ଯୁବକ ଖଗେଶ୍ୱର ନାୟକଙ୍କର ବୋଲି ସନ୍ଦେହ କରାଯାଉଛି ।  

୨୦୨୧ ଡିସେମ୍ବର ୧୯ ତାରିଖରୁ ଖଗେଶ୍ୱର ନିଖୋଜ ଥିଲେ। ପୁଅ ନିଖୋଜ ନେଇ ପରିବାର ଲୋକେ ଧାମନଗର ଥାନାରେ ଲିଖିତ ଅଭିଯୋଗ କରିଥିଲେ। ପୁଲିସ କେବଳ ମାମଲା ରୁଜୁ କରିଦେଇ ଚୁପ୍‌ ବସିଥିଲା। ଆଜି ପରିବାର ଲୋକ ଛପର କରିବା ପାଇଁ ଘର ପଛ ପାର୍ଶ୍ୱରେ ବାଡ଼ିକୁ ବାଉଁଶ ହାଣିବାକୁ ଯାଇଥିଲେ। ଏହି ସମୟରେ ଗୋଟିଏ ନରକଙ୍କାଳ ଝୁଲୁଥିବା ଦେଖିବାକୁ ପାଇଥିଲେ। କଙ୍କାଳ ନିକଟରେ ପଡ଼ିଥିବା ଜୋତା ଓ ଲୁଗାକୁ ଦେଖିଲେ ନିଖୋଜ ଖଗେଶ୍ୱରଙ୍କର ବୋଲି ସନ୍ଦେହ କରାଯାଉଛି। ପୁଲିସ ନରକଙ୍କାଳକୁ ଜବତ କରି ଘଟଣାର ତଦନ୍ତ ଆରମ୍ଭ କରୁଛି।

ପରିବାର ଲୋକଙ୍କ କହିବାନୁଯାୟୀ, ଖଗେଶ୍ୱର ମୋବାଇଲରେ ଫ୍ରି ଫାୟାର ଓ ଲୁଡୋ ଗେମ୍‌ ଖେଳିବା ଦ୍ଵାରା ବାରମ୍ବାର ବାପାଙ୍କ ବ୍ୟାଙ୍କ ଖାତାରୁ ଟଙ୍କା ଖର୍ଚ୍ଚ କରିଥିଲେ । ପର୍ଯ୍ୟାୟ କ୍ରମେ ପ୍ରାୟ ୨୦ ହଜାର କଟିଯାଇଥିଲା । ପରେ ଘର ଲୋକଙ୍କ ତାଗିଦ ପରେ ଖଗେଶ୍ଵର ମୋବାଇଲକୁ ଘରେ ରଖି କେଉଁଆଡ଼େ ଚାଲିଯାଇଥିଲେ । ମୋବାଇଲରୁ ଗେମକୁ ଅନଇନ୍ସଟଲ୍‌ କରିବା ସହ ମୋବାଇଲରୁ କେତେକ ମେସେଜ ମଧ୍ୟ ଡିଲିଟ୍‌ କରିଦେଇଥିଲେ ପରିବାର ଲୋକେ । ତେବେ ବହୁ ଖୋଜାଖୋଜି କରିବା ପରେ ମଧ୍ୟ ଖଗେଶ୍ବରଙ୍କ ସନ୍ଧାନ ନମିଳିବାରୁ ପରିବାର ଲୋକେ ଥାନାରେ ଏତଲା ଦେଇଥିଲେ ।

Powered by Froala Editor