ଜାତୀୟ ପରେଡ୍ରେ ସାମିଲ ହେବନି ଓଡ଼ିଶାର ପ୍ରଜ୍ଞାପନ ମେଢ଼
ଭୁବନେଶ୍ୱର: ଦିଲ୍ଲୀ ରାଜପଥରେ ଦେଖିବାକୁ ମିଳିବନି ଓଡ଼ିଶାର ପ୍ରଜ୍ଞାପନ ମେଢ଼। ଜାତୀୟ ପରେଡ୍ରେ ସାମିଲ ହେବନି ଓଡ଼ିଶାର ମେଢ଼ । ଏହି ସୁଯୋଗରୁ ଏଥର ବି ଓଡ଼ିଶା ବଞ୍ଚିତ । ଯେଉଁଥିପାଇଁ ବାଦ୍ ପଡ଼ିଛି ଓଡ଼ିଆଙ୍କ ଭାବାବେଗ ।
ଓଡ଼ିଶା ବ୍ୟତୀତ୍ ଅନ୍ୟ କିଛି ରାଜ୍ୟର ପ୍ରଜ୍ଞାପନ ମେଢ଼ ମଧ୍ୟ ବାଦ୍ ପଡ଼ିଛି । ମିଳିଥିବା ସୂଚନା ଅନୁଯାୟୀ, ଆସନ୍ତା ଜାନୁଆରୀ ୨୬ ସାଧାରଣତନ୍ତ୍ର ଦିବସରେ ଦିଲ୍ଲୀ ରାଜପଥରେ ସାମିଲ ହୋଇଥାନ୍ତା ଓଡ଼ିଶାର ପ୍ରଜ୍ଞାପନ ମେଢ଼ । ସେଥିପାଇଁ ସବୁବର୍ଷ ପରି ଏଥର ବି ବହୁ ଆଗରୁ ବୈଠକ ବସିଥିଲା । ବିଷୟ ଥିଲା ‘ସ୍ୱାଧୀନତାର ୭୫ବର୍ଷ’ । ଏଥିରେ ସ୍ୱାଧୀନତା ଓ ସଂଗ୍ରାମୀଙ୍କ କାହାଣୀ ଏବଂ ପୂର୍ବବର୍ତ୍ତୀ ଓ ପରବର୍ତ୍ତୀ ସ୍ୱାଧୀନତାର କାହାଣୀକୁ ନେଇ ବିଭିନ୍ନ ମଡେଲ୍ କରିବାକୁ କୁହାଯାଇଥିଲା । ସେହି ଅନୁସାରେ ବିଭିନ୍ନ ସଂସ୍ଥା ତରଫରୁ ରାଜ୍ୟ ସରକାରଙ୍କ ସହାୟତାରେ ୬ଟି ମଡେଲ୍ ଉପସ୍ଥାପନ କରାଯାଇଥିଲା । ପ୍ରଥମ ୩ଟି ବୈଠକରେ ମଡେଲ୍ଗୁଡ଼ିକର ଟୁଡି ଡିଜାଇନ୍ ଉପସ୍ଥାପନ କରାଯାଇଥିଲା । ସେଥିରେ ୬ଟିରୁ ୫ଟି ମଡେଲ୍ କାଟ୍ ଖାଇଥିଲେ । ଗୋଟିଏ ମଡେଲ୍କୁ ସାମାନ୍ୟ ପରିବର୍ତ୍ତନ ସହ ଉପସ୍ଥାପନ କରିବାକୁ କୁହାଯାଇଥିଲା । ମଡେଲ୍ଟି ଥିଲା ‘ପାଇକ ବିଦ୍ରୋହ ଓ ବକ୍ସି ଜଗବନ୍ଧୁ’ । ମାତ୍ର ଯେଉଁ ବୈଠକରେ ମଡେଲ୍ ଉପସ୍ଥାପନ ପାଇଁ ଡକାଯିବା କଥା ଅର୍ଥାତ୍ ୪ର୍ଥ ଥର ବୈଠକକୁ ଡକାଯାଇନଥିଲା । ପରେ ମଡେଲ୍ ପ୍ରସ୍ତୁତ କରିଥିବା ସଂସ୍ଥା ତଥା ଶିଳ୍ପୀମାନେ ନିରାଶ ହୋଇଛନ୍ତି । ସେମାନଙ୍କ କହିବା କଥା ବହୁତ ସୁନ୍ଦର ମଡେଲ୍ ହୋଇଥିଲା କିନ୍ତୁ କ’ଣ ପାଇଁ କଟିଗଲା ଜଣାପଡ଼ୁନି । ରାଜ୍ୟର ଅନ୍ୟ ୬ଟି ମଡେଲ୍ ମଧ୍ୟରେ ‘କୃଷ୍ଣଚନ୍ଦ୍ର ଗଜପତି ଓ ଚାଖୀ ଖୁଣ୍ଟିଆ’, ‘ସ୍ୱାଧୀନତା ସଂଗ୍ରାମ ଓ ସଂଗ୍ରାମୀ ବୀର ସୁରେନ୍ଦ୍ର ସାଏ’,‘ସ୍ୱାଧୀନତା ପରେ ବିକାଶ’, ‘ଓଡ଼ିଶା ଓ ହକି’, ‘ଓଡ଼ିଶା ଓ ପ୍ରାକୃତିକି ବିପର୍ୟ୍ୟୟ’ ଆଦି ରହିଥିଲା । ସବୁଗୁଡ଼ିକ ତୃତୀୟ ବୈଠକ ପୂର୍ବରୁ କଟିଯାଇଥିଲା ।
ପୂର୍ବରୁ ୨୦୧୮ ଏବଂ ୨୦୧୯ ମସିହାରେ ଦିଲ୍ଲୀ ଦରବାରରେ ଓଡ଼ିଶାର ପ୍ରଜ୍ଞାପନ ମେଢ଼ ଗଡ଼ିନଥିଲା । ଏପରିକି ୨୦୨୧ ଅର୍ଥାତ୍ ଚଳିତ ବର୍ଷ ମଧ୍ୟ ଏହି ମେଢ଼ ପ୍ରସ୍ତୁତି ପାଇଁ ଓଡ଼ିଶା ସୁଯୋଗ ପାଇନଥିଲା । ଏନେଇ ପୂର୍ବରୁ ଅନେକ ଥର ଏହି ମେଢ଼ ନିର୍ମାଣ କରି ଆସିଥିବା ଖ୍ୟାତିସମ୍ପନ୍ନ ଚିତ୍ର ଶିଳ୍ପୀ ଗଜେନ୍ଦ୍ର ସାହୁ କହିଛନ୍ତି, ଜଣେ ଶିଳ୍ପୀ ଭାବେ ମୋତେ ଗଭୀର ଆଘାତ ଦେଇଛି ।
Powered by Froala Editor
