ନୂଆଦିଲ୍ଲୀ: ବିକେୟୁ (ଭାରତୀୟ କିଷାନ ସଂଗଠନ)ର ସଦସ୍ୟମାନେ ସ୍ୱୀକାର କରିଛନ୍ତି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ କାରକେଡକୁ ଏହାର କର୍ମୀମାନେ ହିଁ ରାସ୍ତାରେ ଅଟକାଇଥିଲେ । ବିକେୟୁ ମୁଖ୍ୟ ସୁରଜିତ ସିଂହ ଫୁଲ କହିଛନ୍ତି, ଏମଏସପି (ସର୍ବନିମ୍ନ ସହାୟକ ମୂଲ୍ୟ) ସଂକ୍ରାନ୍ତରେ ସରକାର କମିଟି ଗଠନ ନକରିବାରୁ ୧୨-୧୩ ଚାଷୀ ସଂଗଠନ ଆନେ୍ଦାଳନ କରିବାକୁ ନିଷ୍ପତ୍ତି ନିଆଯାଇଥିଲା । 
ମୋଦୀଙ୍କ ର୍ୟାଲିସ୍ଥଳଠାରୁ ୮ କିମି ଦୂରରେ ଆନେ୍ଦାଳନ ହୋଇଥିବା ସେ କହିଛନ୍ତି । ଚାଷୀ ନେତା ସୁରଜିତ କହିଛନ୍ତି, ‘ପ୍ରଧାନମନ୍ତ୍ରୀ ସଡ଼କ ପଥରେ ଆସୁଛନ୍ତି ବୋଲି ପୁଲିସ ହିଁ ଆମକୁ କହିଥିଲା କିନ୍ତୁ ଆମେ ଏହାକୁ ମିଛ ଭାବିଥିଲୁ । କାରଣ ର୍ୟାଲି ସ୍ଥଳ ନିକଟରେ ଏକ ବିଶାଳ ହେଲିପ୍ୟାଡ ଅଛି । ତେଣୁ ଆମେ ପୁଲିସର କଥାକୁ ମିଛ ଭାବି ରାସ୍ତା ଫାଙ୍କା କରିନଥିଲୁ । ଯଦି ଆମକୁ ପୁଲିସ ଭଲଭାବେ ବୁଝାଇଥାନ୍ତା ଯେ, ପ୍ରଧାନମନ୍ତ୍ରୀ ରାସ୍ତାରେ ଆସୁଛନ୍ତି ତେବେ ଆମେ ରାସ୍ତା ଫାଙ୍କା କରିଥାନ୍ତୁ । ସୁରଜିତ କହିଛନ୍ତି, ଆମେ ଯାହା କରିଛୁ ତାହା ସଂପୂର୍ଣ୍ଣ ଠିକ୍ । ଆନେ୍ଦାଳନ କରିବା ଆମର ଗଣତାନ୍ତ୍ରିକ ଅଧିକାର ବୋଲି ସୁରଜିତ କହିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସଡ଼କ ପଥରେ ଗସ୍ତ ପାଇଁ ପଂଜାବ ପୁଲିସକୁ ଆଗୁଆ ଅବଗତ କରାଯାଇଥିଲା ଏବଂ ରାଜ୍ୟ ପୁଲିସ ମୁଖ୍ୟଙ୍କଠାରୁ ଏନେଇ ସ୍ୱୀକୃତି ମିଳିଥିଲା ବୋଲି ଜଣାପଡ଼ିଛି । 
ଏହାସତ୍ତ୍ୱେ ମଧ୍ୟ ପ୍ରଧାନମନ୍ତ୍ରୀଙ୍କ ସୁରକ୍ଷାରେ ତ୍ରୁଟି ହେବା ନିନ୍ଦନୀୟ ବୋଲି ବିଜେପି କହିଛି । ପ୍ରଧାନମନ୍ତ୍ରୀ ଭଟିଣ୍ଡାରୁ ହେଲିକପ୍ଟରରେ ଯାଇଥାନ୍ତେ । କିନ୍ତୁ ଶେଷ ମୁହୂର୍ତ୍ତରେ ପାଗ ଖରାପ ହେତୁ ଯୋଜନାରେ ପରିବର୍ତ୍ତନ ହୋଇଥିଲା । ପଂଜାବ ବିଜେପି ସଭାପତି ଅଶ୍ୱିନୀ ଶର୍ମା କହିଛନ୍ତି, ପ୍ରଧାନମନ୍ତ୍ରୀଙ୍କ ବିରୋଧରେ ଏହି ଷଡ଼ଯନ୍ତ୍ରରେ କେବଳ ପଂଜାବ କଂଗ୍ରେସ ମଧ୍ୟ ସଂପୃକ୍ତ ଅଛି ।

Powered by Froala Editor