ଭୁବନେଶ୍ୱର: ହୁ ହୁ ହୋଇ ମଡିଆସିଲାଣି କରୋନାର ନୂଆ ଭାରିଆଣ୍ଟ ଓମିକ୍ରନ । ଦକ୍ଷିଣ ଆଫ୍ରିକାରୁ ପ୍ରଥମେ ଚିହ୍ନଟ ହୋଇଥିବା କରୋନାର ନୂଆ ଭାରିଆଣ୍ଟ ଓମିକ୍ରନ ପାଇଁ ସାରା ବିଶ୍ୱ ଚିନ୍ତାରେ । ସମସ୍ତ ପ୍ରକାର କଟକଣା ସତ୍ତ୍ୱେ ଦେଶରେ ଓମିକ୍ରନ ପଶି ବିଭିନ୍ନ ରାଜ୍ୟରେ ତା’ର କାୟା ବିସ୍ତାର କରିବାରେ ଲାଗିଛି । ଏହାର ମୁକାବିଲା ପାଇଁ ସରକାର ବିଭିନ୍ନ ପ୍ରକାର ପଦକ୍ଷପ ନେଉଛନ୍ତି ।

ଏହାରି ଭିତରେ ଗତକାଲି ଦେଶରେ ପ୍ରଥମ ଓମିକ୍ରନ ଜନିତ ମୃତୁ୍ୟ ହୋଇଥିବାରୁ ଛାନିଆ ହୋଇଛନ୍ତି ଦେଶବାସୀ । ସୂଚନା ଅନୁସାରେ, ମହାରରାଷ୍ଟ୍ର ପିମ୍ପରି ଚିଚୱାଡାର ବାସିନ୍ଦା ୫୨ବର୍ଷୀୟ ଜଣେ ବ୍ୟକ୍ତିଙ୍କର ଓମିକ୍ରନରେ ମୃତୁ୍ୟ ହୋଇଥିବା ସୂଚନା ମିଳିଛି ।  କରୋନା ଭାଇରସର ଓମିକ୍ରନ ଭାରିଏଣ୍ଟରେ ଆକ୍ରାନ୍ତ ଥିବା ବ୍ୟକ୍ତି ଜଣକ ୟଶବନ୍ତରାଓ ଚଭନ ହସ୍ପିଟାଲରେ ଭର୍ତ୍ତି ହୋଇଥିଲେ । ହେଲେ ସେଠାରେ ତାଙ୍କର ସ୍ୱାସ୍ଥ୍ୟାବସ୍ଥା ଅଧିକ ଖରାପ ହୋଇଥିଲା । ଡାକ୍ତରଙ୍କ ବହୁ ପ୍ରୟାସ ସତ୍ତ୍ୱେ ସେ ବଞ୍ଚିପାରିନଥିଲେ ।

ମିଳିଥିବା ସୂଚନା ମୁତାବକ ଏହି ବ୍ୟକ୍ତିଜଣକ ନାଇଜେରିଆରୁ ଫେରିଥିଲେ । ସଂକ୍ରମିତ ହେବା ପରେ ଡିସେମ୍ବର ୨୮ ତାରିଖରେ ତାଙ୍କର ମୃତୁ୍ୟ ହୋଇଥିଲା । ଏଥିସହ ଦେଶରେ ଓମିକ୍ରନ ଆକ୍ରାନ୍ତରେ ପ୍ରଥମ ମୃତୁ୍ୟ ଘଟିଛି । ମୃତ ବ୍ୟକ୍ତିଙ୍କ ପାଖରେ କୋଭିଡର କୌଣସି ଲକ୍ଷଣ ନଥିଲା । ହେଲେ ଗୁରୁବାର ତାଙ୍କର ଏନଆଇଭି ରିପୋର୍ଟରେ ସ୍ପଷ୍ଟ ହୋଇଛି ଯେ ସେ ଓମିକ୍ରନ ଭାରିଏଣ୍ଟରେ ସଂକ୍ରମିତ ଥିଲେ ।
 ଏ ନେଇ ମହାରାଷ୍ଟ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ସୂଚନା ଦେଇଛି । ଓମିକ୍ରନର ପ୍ରଥମ ମୃତୁ୍ୟପରେ କେନ୍ଦ୍ର ସରକାର ସମସ୍ତ ରାଜ୍ୟ ସରକାରଙ୍କୁ ସତର୍କ ରହିବାକୁ ନିଦେ୍ର୍ଧଶ ଦେଇଛନ୍ତି । କରୋନା କଟକଣାରେ ଯେମିତି ସାମାନ୍ୟ ଢିଲା ନଦିଆଯାଏ, ସେଥିପ୍ରତି ଗୁରୁତ୍ୱ ଦେବାକୁ କେନ୍ଦ୍ର କହିଛି ।

Powered by Froala Editor