ହସ୍ପିଟାଲରେ ଅଗ୍ନିକାଣ୍ଡ: ୪ ଶିଶୁ ଜୀବନ୍ତ ଦଗ୍ଧ
![ହସ୍ପିଟାଲରେ ଅଗ୍ନିକାଣ୍ଡ: ୪ ଶିଶୁ ଜୀବନ୍ତ ଦଗ୍ଧ](https://odishanewslens.com/news_gallery/7915_1636445457.jpg)
ଭୋପାଳ: ମଧ୍ୟପ୍ରଦେଶ ଭୋପାଳସ୍ଥିତ କମଲା ନେହେରୁ ହସ୍ପିଟାଲରେ ଭୟଙ୍କର ଅଗ୍ନିକାଣ୍ଡ । ସୋମବାର ରାତିରେ ହସ୍ପିଟାଲର ଶିଶୁ ବିଭାଗରେ ନିଆଁ ଲାଗିଛି । ଏଥିରେ ମୋଟ ୪ ଜଣ ଶିଶୁଙ୍କ ମୃତ୍ୟୁ ଘଟିଛି । ଅଗ୍ନିକାଣ୍ଡ ସମ୍ପର୍କରେ ଖବର ମିଳିବା ପରେ ଅଗ୍ନିଶମ ବାହିନୀ ତୁରନ୍ତ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛି । ତେବେ ଏ ଯାଏଁ ଏହି ଅଘଟଣର କାରଣ ଅସ୍ପଷ୍ଟ ରହିଛି । ଘଟଣାରେ ମୁଖ୍ୟମନ୍ତ୍ରୀ ଗଭୀର ଦୁଃଖପ୍ରକାଶ କରିବା ସହ ମୃତ ଶିଶୁଙ୍କ ପରିବାର ପିଛା ସରକାର ୪ ଲକ୍ଷ ଟଙ୍କା ସହାୟତା ରାଶି ଘୋଷଣା କରିଛନ୍ତି ।
ସୂଚନାଯୋଗ୍ୟ, ରାତି ପ୍ରାୟ ୯ଟା ସମୟରେ ମେଡିକାଲର ତୃତୀୟ ମହଲା, ଯାହାକି ପେଡିଆଟ୍ରିକ ୱାର୍ଡ ଅଟେ ସେଠାରେ ନିଆଁ ଲାଗିଥିଲା । ପେଡିଆଟ୍ରିକ ବିଭାଗରେ ମୋଟ ୪୦ ଜଣ ଶିଶୁ ଭର୍ତ୍ତି ହୋଇଥିଲେ । ଅଗ୍ନିକାଣ୍ଡ ଘଟିବା ମାତ୍ରେ ସେମାନଙ୍କ ମଧ୍ୟରୁ ୩୬ ଜଣଙ୍କୁ ଅନ୍ୟ ୱାର୍ଡକୁ ସ୍ଥାନାନ୍ତରିତ କରାଯାଇଥିଲା । ମାତ୍ର ୪ ଜଣ ଶିଶୁଙ୍କୁ ରକ୍ଷା କରାଯାଇପାରିନାହିଁ ।
ଏହି ଅଘଟଣରେ ମୁଖ୍ୟମନ୍ତ୍ରୀ ଶିବରାଜ ଚୌହାନ କହିଛନ୍ତି, ଘଟଣାରେ ଉଚ୍ଚସ୍ତରୀୟ ତଦନ୍ତ ପାଇଁ ନିର୍ଦ୍ଦେଶ ଦିଆଯାଇଛି । ଶିଶୁମାନଙ୍କ ଅକାଳ ବିୟୋଗ ଅସହନୀୟ ପୀଡାଦାୟକ । ଅଗ୍ନିକାଣ୍ଡରେ ଆହତ ହୋଇଥିବା ଶିଶୁ ଶୀଘ୍ର ସୁସ୍ଥଲାଭ କରନ୍ତୁ ଏହା ମୋର କାମନା ବୋଲି ଶିବରାଜ ପ୍ରକାଶ କରିଛନ୍ତି ।
Powered by Froala Editor