ଉତ୍ତରପ୍ରଦେଶ: ସବୁବେଳେ ନିଶାସକ୍ତ ରହୁଥିଲା । ପ୍ରଚୁର ମଦ ପିଇ ଘରକୁ ଫେରୁଥିଲା । ଏହାକୁ ନେଇ ପରିବାରରେ ଅଶାନ୍ତି ଲାଗି ରହୁଥିଲା । ହେଲେ ସେ ଅଭ୍ୟାସ ଛାଡ଼ି ପାରୁନଥିଲା । ବୁଧବାର ମଦ ନିଶାରେ ନିଜର ହିତାହିତ ଜ୍ଞାନ ଭୁଲିଗଲା । ଯାହାକୁ ସାତ ଜନ୍ମର ସାଥୀ କରିବ ବୋଲି କଥା ଦେଇଥିଲା । ଶେଷରେ ତାକୁ ହତ୍ୟା କଲା । ବେକ କାଟି ମାରି ଦେଲା । ଏଭଳି ଏକ ଅଭାବନୀୟ ଘଟଣା ଘଟିଛି ଉତ୍ତରପ୍ରଦେଶର କୁଶିନଗର ହାଟା କୋଟୱାଲୀ ଅଞ୍ଚଳରେ । ପୁଲିସ୍ ଅଭିଯୁକ୍ତ ରାମ ସିଂକୁ ଗିରଫ କରିଛି । ଏହାସହିତ ମୃତଦେହ ଜବତ କରି ବ୍ୟବଚ୍ଛେଦ ନିମନ୍ତେ ପଠାଇଛି । ଏହି ଘଟଣା ସ୍ଥାନୀୟ ଅଞ୍ଚଳରେ ଆଲୋଚନାର ବିଷୟ ପାଲଟିଛି ।

ମଙ୍ଗଳବାର ରାତିରେ ନିଶାସକ୍ତ ଅବସ୍ଥାରେ ଘରକୁ ଫେରିଥିଲା ରାମ ସିଂ । ଏହାକୁ ତାଙ୍କ ସ୍ତ୍ରୀ ରୀତା ଦେବୀ ବିରୋଧ କରିଥିଲେ । ଯାହାକୁ ନେଇ ସ୍ୱାମୀ-ସ୍ତ୍ରୀଙ୍କ ମଧ୍ୟରେ ଝଗଡ଼ା ହୋଇଥିଲା । ଏହାପରେ ରୀତା ଦୁଇ ଝିଅ ଓ ଦୁଇ ପୁଅକୁ ନେଇ ଶୋଇବାକୁ ପଲାଇଥିଲେ । ରାମ ସିଂ ଅନ୍ୟ ଏକ କୋଠରୀରେ ଶୋଇଥିଲେ । ରାତିରେ ରାମ ପତ୍ନୀ ରୀତାଙ୍କ ରୁମ୍‌କୁ ଯାଇଥିଲା । ସେଠାରେ ଥିବା ଏକ କୁରାଢ଼ିରେ ରୀତାଙ୍କ ବେକ କାଟି ହତ୍ୟା କରିଥିଲା । ସକାଳୁ ପିଲାମାନେ ଉଠିବା ବେଳେ ମା’ଙ୍କ ରକ୍ତ ଜୁଡୁବୁଡ଼ୁ ମୃତଦେହ ଦେଖି ପାଟି କରିଥିଲେ । ପଡ଼ୋଶୀ ଆସି ପହଞ୍ଚିବା ବେଳକୁ ରୀତାଙ୍କ ମୃତଦେହ ପଡ଼ି ରହିଥିଲା । ନିକଟରେ ରାମ ବସି ରହିଥିଲା । ଏନେଇ ଗାଁ ଲୋକେ ପୁଲିସ୍‌କୁ ଖବର ଦେଇଥିଲେ । ପୁଲିସ୍ ଅଭିଯୁକ୍ତକୁ ଗିରଫ କରିଥିଲା । ଏବେ ପିଲାମାନେ ଅନାଥ ହୋଇ ଯାଇଛନ୍ତି । ପରିବାରରେ କେବଳ ୮୦ ବର୍ଷିୟ ବୁଢ଼ା ବାପା ରହିଛନ୍ତି ।

Powered by Froala Editor