ଇଣ୍ଟରନ୍ୟାସନାଲ୍ କନ୍ସୋର୍ଟିୟମ୍ ଅଫ୍ ଇନଭେଷ୍ଟିଗେଟିଭ୍ ସାମ୍ବାଦିକ (ଆଇସିଆଇଜେ) ର ପାଣ୍ଡୋରା ପେପର୍ସ ତଥ୍ୟ ଏବେ ସବୁଠି ଆଲୋଡ଼ନ ସୃଷ୍ଟି କରିଛି । ଭାରତୀୟ କ୍ରିକେଟର ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକରଙ୍କ ନାମ ପେଣ୍ଡୋରା ପେପର ଲିକ୍ସରେ ରହିଛି । ତାଙ୍କ ପରେ ବର୍ତ୍ତମାନ ଅନିଲ ଅମ୍ବାନୀ, ବିନୋଦ ଆଦାନୀ, ଜ୍ୟାକି ଶ୍ରଫ, କିରଣ ମଜୁମଦାର ଖାଁ , ନିରା ରେଡିଆ, ସତୀଶ ଶର୍ମାଙ୍କ ଭଳି ୩୮୦ରୁ ଅଧିକ ଚର୍ଚ୍ଚିତ ତଥା ହାଇପ୍ରୋଫାଇଲ୍‌ ଭାରତୀୟଙ୍କ ନାମ ରହିଛି। 

ତେବେ ପାଣ୍ଡୋରା ପେପର୍ସ ଲିକ୍ ପରେ ତଦନ୍ତ ନିର୍ଦ୍ଦେଶ ଦେଇଛନ୍ତି କେନ୍ଦ୍ର ସରକାର ।  ଏଥିପାଇଁ କେନ୍ଦ୍ରୀୟ ପ୍ରତ୍ୟକ୍ଷ କର ବୋର୍ଡ (ସିବିଡିଟି)ର ଅଧ୍ୟକ୍ଷଙ୍କ ନେତୃତ୍ବରେ ଏକାଧିକ ଏଜେନ୍ସିକୁ ନେଇ ଏକ ତଦନ୍ତ ଟିମ୍ ଗଠନ କରାଯାଇଛି। ଆୟକର ବିଭାଗ, ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି), ଭାରତୀୟ ରିଜର୍ଭ ବ୍ୟାଙ୍କ ଏବଂ ଆର୍ଥିକ ଗୁଇନ୍ଦା ଶାଖା (ଏଫ୍‌ଆଇୟୁ) ଭଳି ଏଜେନ୍ସିକୁ ତଦନ୍ତ ଟିମ୍‌ରେ ସାମିଲ କରାଯାଇଛି।

ଏବେ ସିବିଡିଟି ଅଧ୍ୟକ୍ଷ ଭାବେ ଜେ ବି ମହାପାତ୍ର କାର୍ଯ୍ୟ କରୁଛନ୍ତି। ଗତକାଲି ତଦନ୍ତକାରୀ ସାମ୍ବାଦିକଙ୍କ ଆନ୍ତର୍ଜାତିକ କନ୍‌ସୋର୍ଟିୟମ୍ (ଆଇସିଆଇଜେ) ପକ୍ଷରୁ ଆର୍ଥିକ ସେବା କ୍ଷେତ୍ରର ସବୁଠୁ ବଡ଼ ଲିକ୍‌ ଭାବେ ପାଣ୍ଡୋରା ପେପର୍ସକୁ ଜାରି କରାଯାଇଥିଲା। 

ଅର୍ଥ ମନ୍ତ୍ରଣାଳୟ ପକ୍ଷରୁ ଆଜି କୁହାଯାଇଛି ଯେ ପାଣ୍ଡୋରା ପେପର୍ସରେ ପ୍ରଘଟ ହୋଇଥିବା ତଥ୍ୟକୁ ସରକାର ବିଚାରକୁ ନେଇଛନ୍ତି। ତଦନ୍ତ ଏଜେନ୍ସିଗୁଡ଼ିକୁ ତଦନ୍ତ ଦାୟିତ୍ବ ଦିଆଯାଇଛି। ସେମାନେ ପ୍ରଚଳିତ ନିୟମ ଅନୁସାରେ ତଦନ୍ତ କରିବେ। ପୂର୍ବରୁ ପ୍ରଘଟ ହୋଇଥିବା ଆଇସିଆଇଜେ, ଏଚ୍‌ଏଚ୍‌ବିସି, ପାନାମା ପେପର୍ସ ଓ ପାରାଡାଇଜ୍‌ ପେପର୍ସ ଭଳି ଲିକ୍ ମାମଲାକୁ ସରକାର ବିଚାରକୁ ନେଇ ତଦନ୍ତ ନିର୍ଦେଶ ଦେଇଥିଲେ। କଳାଧନ ବିରୋଧୀ ଆଇନ ଆଧାରରେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା। ପାନାମା ପେପର୍ସ ଓ ପାରାଡାଇଜ୍‌ ପେପର୍ସ‌ରେ ଥିବା ତଥ୍ୟ ଆଧାରରେ ତଦନ୍ତ କରି ୨୦,୩୫୨ କୋଟି ଟଙ୍କାର ‌ବେଆଇନ ଆୟ ଚିହ୍ନଟ କରାଯାଇଥିଲା ବୋଲି ମନ୍ତ୍ରଣାଳୟ ପକ୍ଷରୁ କୁହାଯାଇଛି।

Powered by Froala Editor