ସୁନ୍ଦରଗଡ଼: ୨୦୧୪ରେ ସୁନ୍ଦରଗଡ଼ ଜିଲ୍ଲା ବଣାଇ ଥାନା ଅଞ୍ଚଳରେ ସଂଘଟିତ ଏକ ନାବାଳିକା ଗଣଦୁଷ୍କର୍ମ ମାମଲାରେ ସୁନ୍ଦରଗଡ଼ ପକ୍ସୋ କୋର୍ଟ ୨ ଅଭିଯୁକ୍ତକୁ ଦୋଷୀ ସାବ୍ୟସ୍ତ କରିଛନ୍ତି । ଏଥି ସହିତ, ଉଭୟଙ୍କୁ ୨୫ ବର୍ଷ ଜେଲ ଦଣ୍ଡ ଓ ୧୦ ହଜାର ଟଙ୍କା ଜରିମାନା ଆଦେଶ କରିଛନ୍ତି । ଦୁଇ ଦୋଷୀ ହେଲେ; ବଣାଇ ଥାନା ବାରଡେଙ୍ଗଡ଼ାର ଟୁନୁ ଓରଫ ହରେ କିସାନ (୨୫) ଓ ଭାଲୁଡୁଙ୍ଗୁରିର ପ୍ରହଲ୍ଲାଦ କିସାନ (୨୩) ମାମଲାର ଅନ୍ୟ ଜଣେ ମହିଳା ଅଭିଯୁକ୍ତ ଶାନ୍ତି ଓରଫ ସବିତା ଧୀବର (୨୪)ଙ୍କ ବିଚାର ଜାରି ରହିବ ବୋଲି କୋର୍ଟ କହିଛନ୍ତି । ଅନ୍ୟପଟେ ପୋକ୍ସ ବିଚାରପତି ପାର୍ଥ ସାରଥୀ ପଟ୍ଟନାୟକ ପୀଡ଼ିତାଙ୍କୁ ୭ ଲକ୍ଷ ଟଙ୍କା କ୍ଷତି ପୂରଣ ଦେବାକୁ ଜିଲ୍ଲା ଆଇନ ସେବା ପ୍ରାଧିକରଣଙ୍କୁ ଆଦେଶ କରିଛନ୍ତି । ଗତ ୨୦୧୪ ମେ ୧୨ ତାରିଖ ରାତିରେ ଏହି ଘଟଣା ଘଟିଥିଲା । ପୀଡ଼ିତା ନାବାଳିକା ନିଜ ଗାଁର ପାକଳ ମୁଣ୍ଡାଙ୍କ ପୁଅର ବିବାହ ଉତ୍ସବରେ ଯୋଗ ଦେବାକୁ ଯାଇଥିଲେ । ରାତି ୧୨ଟାରେ ଅଭିଯୁକ୍ତ ମହିଳା ଶାନ୍ତି ଓରଫ ସବିତା ନାବାଳିକାଙ୍କୁ ଫୁସୁଲାଇ ଗାଁ ପାଖ ନଈପଠାକୁ ନେଇ ଯାଇଥିଲେ । ସେଠାରେ ପୂର୍ବରୁ ଜଗିଥିବା ଅଭିଯୁକ୍ତ ହରେ ଓ ପ୍ରହଲ୍ଲାଦ  ନାବାଳିକାଙ୍କ ମୁହଁକୁ ଗାମୁଛାରେ ବନ୍ଦ କରି ଜୋରଜବରଦସ୍ତ ନଈପଠାରେ୨ ଅନ୍ୟ ସ୍ଥାନକୁ ନେଇ ଗଣଦୁଷ୍କର୍ମ କରିଥିଲେ । ଏହା ପରେ ଭୋର ୪ଟାରେ ତାଙ୍କୁ ଆଣି ଘର ପାଖରେ ଛାଡ଼ି ଦେଇଥିଲେ । ଘଟଣା ସମ୍ପର୍କରେ କହିଲେ ତାଙ୍କୁ ଓ ପରିବାର ଲୋକଙ୍କୁ ଜୀବନରେ ମାରିଦେବାର ଧମକ ଦେଇ ଯାଇଥିଲେ । ହେଲେ ପୀଡ଼ିତା ଘରେ ସବୁ କଥା କହିଦେବା ପରେ ୧୯ ତାରିଖରେ ବଣାଇ ଥାନାରେ ଏତଲା ଦିଆଯାଇଥିଲା ।

Powered by Froala Editor