କୁକୁଡ଼ାଖଣ୍ଡି : ବିଧାନସଭା ବାଚସ୍ପତିଙ୍କ ନିର୍ବାଚନମଣ୍ଡଳୀରେ ମନରେଗା ଦୁର୍ନୀତି! ଏହିଭଳି ଏକ ଦୁର୍ନୀତି ପାଇଁ ଅସନ୍ତୋଷ ପ୍ରକାଶ କରିଛନ୍ତି ଖୋଦ ବାଚସ୍ପତି ସୂର୍ଯ୍ୟନାରାୟଣ ପାତ୍ର । ଏ ନେଇ ସେ କଠୋର ଆଭିମୁଖ୍ୟ ଗ୍ରହଣ କରିବା ସହିତ ବିଧିବଦ୍ଧ ତଦନ୍ତ ପାଇଁ ବିଡିଓଙ୍କୁ ଚିଠି ଲେଖିଥିବା ଜଣାପଡ଼ିଛି । ବାଚସ୍ପତିଙ୍କ ଚିଠିକୁ ନେଇ ଚର୍ଚ୍ଚା ଜୋର ଧରିଛି । ଗଞ୍ଜାମ ଜିଲ୍ଲା କୁକୁଡ଼ାଖଣ୍ଡି ବ୍ଲକରେ ମନରେଗା ସମେତ ବିଭିନ୍ନ ଉନ୍ନୟନମୂଳକ ଯୋଜନାରେ ବ୍ୟାପକ ଦୁର୍ନୀତି ଓ ଅନିୟମିତତା ଅଭିଯୋଗ ସାମ୍ନାକୁ ଆସିଛି । ଏହି ବ୍ଲକ ବାଚସ୍ପତି ଶ୍ରୀ ପାତ୍ରଙ୍କ ଦିଗପହଣ୍ଡି ନିର୍ବାଚନମଣ୍ଡଳୀ ଅଧୀନରେ ଆସୁଛି । ଏହି ଦୁର୍ନୀତି ସମ୍ପର୍କରେ ଜାଣିବାପରେ ସେ ବିଡିଓଙ୍କୁ ଚିଠି ଲେଖିବା ସହିତ ବିଧିବଦ୍ଧ ତଦନ୍ତ ରିପୋର୍ଟ ଦେବାପାଇଁ ବିଡିଓଙ୍କୁ ନିଦେ୍ର୍ଧଶ ଦେଇଛନ୍ତି । ଚିଠିରେ ବାଚସ୍ପତି ଶ୍ରୀ ପାତ୍ର ଦର୍ଶାଇଛନ୍ତି, କୁକୁଡ଼ାଖଣ୍ଡି ବ୍ଲକ୍ ଅଧୀନ ବାଲିପଡ଼ା ଓ ବଉଳଝୋଳି ପଞ୍ଚାୟତରେ ମନରେଗା ଯୋଜନାରେ ଦୁର୍ନୀତି ହେଉଥିବା ତାଙ୍କ ନଜରକୁ ଆସିଛି । ଶ୍ରମ ଟଙ୍କା ପ୍ରକୃତ ହିତାଧିକାରୀଙ୍କ ଜମାଖାତାକୁ ଯାଇନି । ସେମାନଙ୍କ ବଦଳରେ ଭୂତ ଶ୍ରମିକଙ୍କ ଜମାଖାତାକୁ ଟଙ୍କା ପଠାଯାଇଛି । ଖାଲି ଏତିକି ନୁହେଁ, ମନେରଗା କାମରେ ଶ୍ରମିକଙ୍କୁ କାମରେ ନିୟୋଜିତ କରା ନଯାଇ ମେସିନ୍ ସାହାଯ୍ୟରେ କାର୍ଯ୍ୟ ହାସଲ ହୋଇଛି । ଆଉ ଟଙ୍କାକୁ ହଡ଼ପ କରାଯାଇଥିବା ଅଭିଯୋଗ ତାଙ୍କ ଦୃଷ୍ଟିକୁ ଆସିଛି । ତୁରନ୍ତ କାମରେ ନିୟୋଜିତ ହୋଇଥିବା ଶ୍ରମିକ ମାନଙ୍କ ନାମ, କାର୍ଡÿ ନମ୍ବର, ଠିକଣା, ପ୍ରଦାନ କରାଯାଇଥିବା ଅର୍ଥର ପରିମାଣ ଓ କାର୍ଯ୍ୟ ବିବରଣୀ ତୁରନ୍ତ ପ୍ରଦାନ କରିବାକୁ ବାଚସ୍ପତି ଚିଠି ମାଧ୍ୟମରେ ବିଡିଓଙ୍କୁ ନିଦେ୍ର୍ଧଶ ଜାରି କରିଛନ୍ତି । ଏହାସହ ଏ ସଂକ୍ରାନ୍ତରେ ସେ ଜିଲ୍ଲାପାଳଙ୍କ ସହ ଆଲୋଚନା କରିଥିବା ଦର୍ଶାଇଛନ୍ତି । ବାଚସ୍ପତିଙ୍କ ଏହି ଚିଠିକୁ ନେଇ ଏବେ ଚର୍ଚ୍ଚା ଜୋର୍ ଧରିଥିବା ବେଳେ ଜନପ୍ରତିନିଧି ଓ ଅଧିକାରୀମାନଙ୍କ ଭିତରେ ଛନକା ପଶିଛି । କାରଣ ଗତ ଅଗଷ୍ଟ ମାସରେ ପଞ୍ଚାୟତ ସମିତିର ଶେଷ ବୈଠକ ବସିଥିବା ବେଳେ ଏଥିରେ ବାଚସ୍ପତି ଯୋଗ ଦେଇଥିଲେ । ଆଉ ସରକାରୀ ଅଧିକାରୀ ଓ ଜନପ୍ରତିନିଧିଙ୍କ ବିରୋଧରେ ଦୁର୍ନୀତି ଅଭିଯୋଗ ସତ ପ୍ରମାଣିତ ହେଲେ, ତୁରନ୍ତ ଗିରଫ କରାଯିବ ବୋଲି କହିଥିଲେ ।

ମନରେଗା ଦୁର୍ନୀତିରେ ବ୍ୟାପକ ଅନିୟମିତତାକୁ ନେଇ ବାଚସ୍ପତିଙ୍କ ଏହି ଚିଠି ମିଳିବା ପରେ ପ୍ରଶାସନ ଆଗକୁ କିଭଳି କାର୍ଯ୍ୟାନୁଷ୍ଠାନ ଗ୍ରହଣ କରୁଛି ତାହା ଦେଖିବାକୁ ବାକି ରହିଛି । ତେବେ ଏନେଇ ବିଡିଓଙ୍କ ପ୍ରତିକ୍ରିୟା ନେବାକୁ ଚେଷ୍ଟା କରିଥିଲେ ବି ସେ ମୋବାଇଲ୍ ନ ଉଠାଇବାରୁ ଯୋଗାଯୋଗ ସମ୍ଭବପର ହୋଇପାରିନି । କୁକୁଡ଼ାଖଣ୍ଡି ବ୍ଲକର କେବଳ ଏହି ଦୁଇ ପଞ୍ଚାୟତ ନୁହେଁ, ଅନେକ ସ୍ଥାନରେ ମନେରଗା କାମରେ ମେସିନ୍ ବ୍ୟବହାର କରାଯାଇ କୋଟି କୋଟି ଟଙ୍କା ଆତ୍ମସାତ୍ ହେଉଛି । ଦକ୍ଷିଣପୁର, ଡେ଼ଙ୍ଗାପଦର ଓ ସିହଳା ପରି ବହୁତ ପଞ୍ଚାୟତରେ ଦୁର୍ନୀତି ସାମ୍ନାକୁ ଆସିଛି । ଏଣୁ ଏହାର ତଦନ୍ତ ସହ କାର୍ଯ୍ୟାନୁଷ୍ଠାନ ଗ୍ରହଣ ଦାବି ହୋଇଛି ।

Powered by Froala Editor