ଶୁଭମ କୁମାର ୟୁପିଏସସି ସିଭିଲ ସର୍ଭିସରେ ଟପର
ନୂଆଦିଲ୍ଲୀ : ୟୁପିଏସସି (ୟୁନିଅନ ପବ୍ଲିକ ସର୍ଭିସ କମିସନ) ସିଭିଲ ସର୍ଭିସ ପରୀକ୍ଷା ଫଳ ଶୁକ୍ରବାର ପ୍ରକାଶ ପାଇଛି । ୨୦୨୦ ସିଭିଲ ସର୍ଭିସ ଚୂଡ଼ାନ୍ତ ପରୀକ୍ଷା ଫଳାଫଳ ୟୁପିଏସସି ୱେବସାଇଟରେ ଜାରି ହୋଇଛି । ମୋଟ ୭୬୧ ପ୍ରାର୍ଥୀଙ୍କ ନାମ ନିଯୁକ୍ତି ପାଇଁ ସୁପାରିସ କରାଯାଇଛି । ଶୁଭମ କୁମାର ସିଭିଲ ସର୍ଭିସ ପରୀକ୍ଷାରେ ଟପର ହୋଇଛନ୍ତି । ଆଇଆଇଟି ବମ୍ବେରୁ ସେ ସିଭିଲ ଇଂଜିନିୟରିଂରେ ବିଟେକ କରିଛନ୍ତି । ଅନ୍ୟପକ୍ଷେ ଜାଗୃତୀ ଅଗସ୍ଥି ଏବଂ ଅଙ୍କିତା ଜୈନ ଯଥାକ୍ରମେ ଦ୍ୱିତୀୟ ଏବଂ ତୃତୀୟ ସ୍ଥାନରେ ରହିଛନ୍ତି । ଜାଗୃତୀ ମହିଳା ପରୀକ୍ଷାର୍ଥୀମାନଙ୍କ ମଧ୍ୟରେ ଶୀର୍ଷରେ ରହିଛନ୍ତି । ଏମଏଏନଆଇଟି ଭୋପାଳରେ ସେ ଇଲେକ୍ଟ୍ରିକାଲ ଇଂଜିନିୟରିଂରୁ ବିଟେକ କରିଛନ୍ତି । ୟୁପିଏସସି ସିଭିଲ ସର୍ଭିସ ପରୀକ୍ଷା ୨୦୨୦ରେ ଉତ୍ତୀର୍ଣ୍ଣ ହୋଇଥିବା ଶୀର୍ଷ ୨୫ ଜଣଙ୍କ ମଧ୍ୟରେ ୧୩ ଜଣ ଛାତ୍ର ଏବଂ ୧୨ ଜଣ ଛାତ୍ରୀ ଅଛନ୍ତି ।
Powered by Froala Editor
