ଜିଲ୍ଲା କୋର୍ଟର ଅତିରିକ୍ତ ବିଚାରପତି ଉତ୍ତମ ଆନନ୍ଦଙ୍କୁ ଦୁଇ ଜଣ ଅଟୋ ଡ୍ରାଇଭର ଜାଣିଶୁଣି ଅଟୋରେ ଧକ୍କା ଦେଇ ହତ୍ୟା କରିଛନ୍ତି। ତଦନ୍ତ ଏବଂ ଫୋରେନ୍‌ସିକ୍‌ ରିପୋର୍ଟରୁ ଏହା ଜଣାପଡ଼ିଥିବା କଥା ‘ସିବିଆଇ’ ଆଜି ଅଦାଲତଙ୍କୁ କହିଛି। ଏନେଇ ସିବିଆଇ ଝାଡ଼ଖଣ୍ଡ ହାଇକୋର୍ଟରେ ଏହାର ତଦନ୍ତ ରିପୋର୍ଟ ଦାଖଲ କରିଛି। କ୍ରାଇମ ସିନ୍ ରିକ୍ରିଏଟ, ଘଟଣାର ତର୍ଜମା, ସିସିଟିଭି ଭିଜୁଆଲ୍ ଏବଂ ଫୋରେନସିକ ପ୍ରମାଣରୁ ଜଣାପଡ଼ିଛି ଯେ, ୪୯ ବର୍ଷୀୟ ଜିଲ୍ଲା ଜଜ୍ ଉତ୍ତମ ଆନନ୍ଦଙ୍କୁ ନିର୍ଦ୍ଦିଷ୍ଟ ଭାବେ ଉଦ୍ଦେଶ୍ୟ ରଖି ଅଟୋ ଧକ୍କା ଦେଇ ହତ୍ୟା କରାଯାଇଥିଲା । ଘଟଣାରେ ଗିରଫ ହୋଇଥିବା ଅଭିଯୁକ୍ତମାନେ ହେଲେ ଅଟୋ ଡ୍ରାଇଭର ଲଖନ ବର୍ମା ଓ ହେଲ୍ପର ରାହୁଲ ବର୍ମା।
ଝାଡଖଣ୍ଡ ରାଞ୍ଚରେ ଜୁଲାଇ ୨୮ ତାରିଖରେ ଗୋଟାଏ ଅଟୋରିକ୍ସା ଧକ୍କା ଦେବାରୁ ଝାଡ଼ଖଣ୍ଡର ଜିଲ୍ଲା ଜଜ୍‌ ଉତ୍ତମ ଆନନ୍ଦଙ୍କର ମୃତ୍ୟୁ ଘଟିଥିଲା। ଏହି ଘଟଣାର ପ୍ରମାଣସମୂହ ଅନୁଧ୍ୟାନ କରିବା ଲାଗି ସମଗ୍ର ଦେଶରୁ ‘ସିବିଆଇ’ ୪ଟି ପୃଥକ୍‌ ଫୋରେନ୍‌ସିକ୍‌ ଟିମ୍‌ ନିୟୋଜିତ କରିଥିଲା।

ଏଥିସହ, ଗୁଜରାଟର ଗାନ୍ଧୀନଗରରେ ଦୁଇ ଅଭିଯୁକ୍ତଙ୍କର ‘ବ୍ରେନ୍‌ ମ୍ୟାପିଙ୍ଗ୍‌’ ଏବଂ ‘ନେକ୍ରୋ ଆନାଲିସିସ୍’ ବା ‘ଲାଇ-ଡିଟେକ୍ଟର୍‌ ଟେଷ୍ଟ୍‌’ କରାଯିବା ସହ ସେ ସବୁର ରିପୋର୍ଟଗୁଡ଼ିକୁ ଉତ୍ତମରୂପେ ଅଧ୍ୟୟନ କରାଯାଇଛି। ସମ୍ପ୍ରତି ‘ସିବିଆଇ’ ନିଜ ତଦନ୍ତ ରିପୋର୍ଟ ସହ ‘ଫୋରେନ୍ସିକ୍‌’ ରିପୋର୍ଟ ସବୁକୁ ମିଳାଉଛି। ଏଣୁ ପରବର୍ତ୍ତୀ ମୁହୂର୍ତ୍ତରେ ପୂର୍ଣ୍ଣାଙ୍ଗ ତଦନ୍ତ ରିପୋର୍ଟ ଦାଖଲ କରାଯିବ ବୋଲି ସିବିଆଇ କହିଛି।