ଭାରତୀୟ ଆଖଡା ପରିଷଦର ସଭାପତି ମହନ୍ତ ନରେନ୍ଦ୍ର ଗିରିଙ୍କ ପ୍ରୟାଗରାଜରେ ଶେଷକୃତ୍ୟ ସମ୍ପନ୍ନ ହୋଇଛି । ମହନ୍ତ ନରେନ୍ଦ୍ର ଗିରିଙ୍କୁ ଦିଆଯାଇଛି ଭୂ-ସମାଧି । ଏହି ପ୍ରକ୍ରିୟାରେ ସାମିଲ ହୋଇଛନ୍ତି ଅନେକ ସାଧୁ ସନ୍ଥ । ବିଭିନ୍ନ ଆଖଡା ଓ ମଠର ସାଧୁସନ୍ଥ ନରେନ୍ଦ୍ର ଗିରିଙ୍କ ସମାଧି ବେଳେ ସେଠାରେ ଉପସ୍ଥିତ ରହିଛନ୍ତି । ପୋଷ୍ଟମର୍ଟମ କରାଯାଇଥିବା ଯୋଗୁଁ ସଙ୍ଗମରେ ତାଙ୍କର ବୁଡ ପକା ଯାଇନଥିଲା ।

ସାଧାରଣତଃ ହିନ୍ଦୁ ଧର୍ମରେ ପାର୍ଥିବ ଶରୀରକୁ ଦାହ କରିବା ପରମ୍ପରା ଥିବା ବେଳେ ସାଧୁ ସନ୍ନ୍ୟାସୀମାନଙ୍କର ମରଶରୀରକୁ ପୋତାଯାଏ। ଏହା ପଛରେ ମଧ୍ୟ ଏକ ରୋଚକ ବିଶ୍ୱାସ ରହିଛି। ତାହା ହେଉଛି ମଣିଷ ଦେହ ତ୍ୟାଗ କରିବା ପରେ ମଧ୍ୟ ଆତ୍ମାଛାଡ଼ି ଯାଇ ନଥାଏ। କାରଣ ଶରୀର ସହ ଦୀର୍ଘଦିନ ବନ୍ଧନରେ ବାନ୍ଧି ହୋଇଯାଇଥିବା ଆତ୍ମାର ଏତେ ଶୀଘ୍ର ମୋହମାୟା ତୁଟି ନଥାଏ। ତେଣୁ କାଳେ ମୃତ ଦେହକୁ ପୋତି ଦେଲେ ଆତ୍ମା ଆଖପାଖରେ ରହିଯିବ ତେଣୁ ଦାହ କରିଦିଆଯାଏ। ଅନ୍ୟପଟେ ଜଣେ ବ୍ୟକ୍ତି ଯେତେବେଳେ ସାଧୁ ସନ୍ନ୍ୟାସର ବାଟକୁ ଆପଣେଇ ନିଅନ୍ତି ସେ ସାଂସାରିକ ମୋହମାୟାକୁ ତ୍ୟାଗ କରିଥାଆନ୍ତି।  ସଶରୀରରେ ଥିବା ବେଳେ ମଧ୍ୟ ସେମାନଙ୍କର ଲୋଭ, ମାୟା କିମ୍ବା କୌଣସି ପ୍ରକାର ମୋହ ନଥାଏ। ତେଣୁ ପଦ୍ମଆକୃତିରେ ତାଙ୍କୁ ଶୁଆଇ ଦେଇ ପୋତି ଦିଆଯାଏ।

ସେପଟେ ନରେନ୍ଦ୍ର ଗିରିଙ୍କ ମୃତ୍ୟୁକୁ ନେଇ ସନ୍ଦେହ ବଢିବାରେ ଲାଗିଛି । ମୃତ୍ୟୁର କାରଣ ନେଇ ଖୋଳତାଡ ଜାରି ରଖିଛି ଉତ୍ତରପ୍ରଦେଶ ପୁଲିସ । ଘଟଣାରେ ଉତ୍ତରପ୍ରଦେଶ ପୁଲିସ ୧୮ଜଣିଆ ଏସଆଇଟି ଟିମ ଗଠନ କରି ତଦନ୍ତ ଚଲାଇଛି । ବଦନାମ ଭୟରେ ସେ ଆତ୍ମହତ୍ୟା କରିଥିବା ନିଜ ସୁଇସାଇଡ ନୋଟରେ ଲେଖିଛନ୍ତି । ଏହାକୁ ଆଧାର କରି ମହନ୍ତ ନରେନ୍ଦ୍ର ଗିରିଙ୍କ ଶିଷ୍ୟ ଆନନ୍ଦ ଗିରି, ପ୍ରୟାଗରାଜ ହନୁମାନ ଗଡିର ପୁରୋହିତ ଆଦ୍ୟା ପ୍ରସାଦ ତିୱାରିଙ୍କୁ ଗିରଫ କରିଛି ପୁଲିସ । ଆଦ୍ୟା ପ୍ରସାଦ ତିୱାରୀଙ୍କ ପୁଅକୁ ଥାନାକୁ ନେଇ ପଚରା ଉଚରା କରାଯାଉଛି । 

Powered by Froala Editor