ଭୁବନେଶ୍ୱର : ଜଗତସିଂହପୁର ଜିଲ୍ଲା ଏରସମା ନୂଆଡ଼ିହି ସେବା ସମବାୟ ସମିତି ଦୁର୍ନୀତିକୁ ନେଇ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁଙ୍କୁ ନିଶାନା ସାଧିଛନ୍ତି ଡାକ୍ତର ଦାମୋଦର ରାଉତ  ।  ଦାମ ଏହି ଘଟଣାରେ ସମବାୟ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁଙ୍କୁ ଟାର୍ଗେଟ କରିଛନ୍ତି । କଟକ କେନ୍ଦ୍ର ସମବାୟ ବ୍ୟାଙ୍କ ଅଧୀନରେ ଏହି ଅଂଚଳ ଆସୁଛି  । ଏହାର ସଭାପତି ମନ୍ତ୍ରୀଙ୍କ ଭାଇ ଥିଲେ ବୋଲି ସେ କହିଛନ୍ତି  । ଯେଉଁଥିପାଇଁ କାର୍ଯ୍ୟାନୁଷ୍ଠାନ ପ୍ରକ୍ରିୟା ବିଳମ୍ବ ହେଉଛି ବୋଲି ଡାକ୍ତର ରାଉତ କହିଛନ୍ତି ।

ଦାମଙ୍କ କହିବା ମୁତାବକ, ଆଠଗଡ଼ ଭଳି ଏରସମା ବ୍ଲକ୍‌ ନୂଆଡ଼ିହି ସେବା ସମିତିରେ ବି କେଳେଙ୍କାରୀ ହୋଇଛି । ସମିତିର ପଦ ପଦବିରେ ଥିବା ଅଧିକାରୀମାନେ ୭୦୦ ଚାଷୀଙ୍କ ନାଁରେ ଋଣ ଉଠାଇ ନେଇ ୧ କୋଟି ୭୦ ଲକ୍ଷ ଟଙ୍କା ହଡ଼ପ କରିଛନ୍ତି  । ଏହାକୁ ନେଇ ସେ ପୂର୍ବରୁ ସମବାୟ ମନ୍ତ୍ରୀ ଶ୍ରୀ ସ୍ୱାଇଁଙ୍କୁ ଚିଠି ଲେଖିଥିଲେ । କିନ୍ତୁ ଏଯାଏ କୌଣସି କାର୍ଯ୍ୟାନୁଷ୍ଠାନ ହେଉ ନାହିଁ । ଯଦି କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାନଯାଏ, ତେବେ ସମବାୟ ବ୍ୟାଙ୍କର ସ୍ଥିତି ଆହୁରି ଖରାପ ହେବ ବୋଲି ଦାମ କହିଛନ୍ତି । ସୂଚନା ମୁତାବକ, ସମିତିର ସମ୍ପାଦକ ଓ ପୂର୍ବତନ ବ୍ୟାଙ୍କ ମ୍ୟାନେଜର ଚାଷୀଙ୍କ ଅଜାଣତରେ ସେମାନଙ୍କ ନାମରେ ଋଣ ଉଠାଇଛନ୍ତି  । ସମିତିର କିଛି ବୋର୍ଡ ସଦସ୍ୟ ନିଜ ନାଁ ବଦଳାଇ ଏବଂ ଚଂଚକତା କରି ଲକ୍ଷ ଲକ୍ଷ ଟଙ୍କା ହାତେଇଛନ୍ତି । ଆଦୌ ଋଣ ନେଇନଥିବା ଚାଷୀମାନଙ୍କ ନିକଟକୁ ଏହାକୁ ଶୁଝିବା ପାଇଁ ଚିଠି ଆସୁଛି । ଯେହେତୁ ଚାଷୀଙ୍କ ନାଁରେ ଋଣ ଗଡ଼ୁଛି ହଜାରେରୁ ଉର୍ଦ୍ଧ୍ୱ ଚାଷୀ ପ୍ରଧାନମନ୍ତ୍ରୀ ଫସଲ ବୀମା ପାଇବାରୁ ବଂଚିତ ହୋଇଛନ୍ତି ।

ଏହି ସମିତିରେ ୧୭୦୦ ଜଣ ଚାଷୀ ଥିବା ବେଳେ ସେମାନଙ୍କ ମଧ୍ୟରୁ ମାତ୍ର ୫୬ ଜଣ ପ୍ରଧାନମନ୍ତ୍ରୀ ଫସଲ ବୀମା ପାଇବାକୁ ଯୋଗ୍ୟ ହୋଇଛନ୍ତି । ଏହାକୁ ନେଇ ଚାଷୀମାନଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି । ଅନ୍ୟପଟେ ଦୁଇ କୋଟିରୁ ଅଧିକ ଟଙ୍କା ଚଳୁ କରି ସମିତି ସମ୍ପାଦକ ତୀର୍ଥ ସମ୍ପଦ ଗୋଚ୍ଛାୟତ, ପୂର୍ବତନ ବ୍ୟାଙ୍କ ମ୍ୟାନେଜର ଓ ବୋର୍ଡ ସଦସ୍ୟମାନେ ବେଫିକର ବସିଛନ୍ତି ।  ଜିଲ୍ଳାପାଳ ସଂଗ୍ରାମ କେଶରୀ ମହାପାତ୍ର ଏହି ଦୁର୍ନୀତିର କ୍ରାଇମବ୍ରାଞ୍ଚ ତଦନ୍ତ ପାଇଁ ରାଜ୍ୟ ସରକାରଙ୍କୁ ସୁପାରିସ କରିଥିଲେ । ମାତ୍ର ଏ ଦିଗରେ ଏ ଯାଏ କୌଣସି ପଦକ୍ଷେପ ନିଆଯାଇ ନଥିବାରୁ ଏହାକୁ ନେଇ ଅଞ୍ଚଳର ଚାଷୀଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି ।

Powered by Froala Editor