ଦଶପଲ୍ଲା: ସମସ୍ତ ବାପା-ମା’ଙ୍କ ଇଚ୍ଛା ଥାଏ ପୁଅଟିଏ ଥିଲେ ଜୀବନର ଶେଷ ସମୟରେ ମୁହଁରେ ନିଆଁ ଦେବ ଓ କୁଳ ଉଦ୍ଧାର କରିବ । ହେଲେ ନିଜ ପୁଅଠାରୁ ବର୍ଷବର୍ଷ ଧରି ନିର୍ଯାତନାର ଶିକାର ହୋଇ ଆସୁଥିବା ବାପା-ମା’ ଶେଷରେ ଅତି ନୃଶଂସ ଭାବେ ପୁଅକୁ ହତ୍ୟା କରିବା ଘଟଣା ସମଗ୍ର ଦଶପଲ୍ଲା ଅଂଚଳରେ ଚାଞ୍ଚଲ୍ୟ ସୃଷ୍ଟି କରିଛି । ପୁଲିସଠାରୁ ମିଳିଥିବା ସୂଚନା ଅନୁଯାୟୀ, ଦଶପଲ୍ଲା ସହର ନାହାକପଡ଼ା (ଦଣ୍ଡାସାହି) ଗ୍ରାମର ପଞ୍ଚୁ ବେହେରା (୭୦) ଓ ପତ୍ନୀ ସରୋଜିନୀ ବେହେରା (୬୨)ଙ୍କ ପୁଅ ହେଉଛି ବସନ୍ତ ବେହେରା (୪୦) । ୩ଟି ଝିଅରେ ବସନ୍ତ ହେଉଛି ଏକମାତ୍ର ପୁଅ । ହେଲେ ବସନ୍ତକୁ ବାପା-ମା’ ଛୋଟରୁ ବଡ଼ କରିବା ସହ ବିବାହ ଦେଇଥିଲେ । ହେଲେ ରୋଜଗାର କରି ପରିବାର ଚଳାଇବା ପରିବର୍ତ୍ତେ ବସନ୍ତ ନିଶାସେବନ କରି ପରିବାରରେ ଅଶାନ୍ତି ସୃଷ୍ଟିକରେ । ବାପା-ମା’ଙ୍କୁ ଅଧିକାଂଶ ସମୟ ମାରପିଟ କରିଥାଏ । ପାଗଳ ଭଳି ଆଚରଣ କରିବା ସହ ଦାଣ୍ଡ ବଜାରରେ ବୁଲି ବିଭିନ୍ନ ଚୋରି କରିବା ଓ ଅସାମାଜିକ କାର୍ଯ୍ୟରେ ମଧ୍ୟ ଲିପ୍ତ ରହେ । ଯାହାକି ବସନ୍ତର ପତ୍ନୀ ଅତିଷ୍ଠ ହୋଇ ଚାଲିଯାଇଛନ୍ତି । ପ୍ରତିଦିନ ଭଳି ଗତକାଲି ରାତିରେ ବସନ୍ତ ଘରକୁ ଯାଇ ବାପା-ମା’ଙ୍କୁ ଗାଳିଗୁଲଜ କରିବା ସହିତ ସେମାନଙ୍କୁ ଘରୁ ପଦାକୁ ବାହାର କରି ଦେଇନଥିଲା । ଏଥିରେ ଉଭୟ ସ୍ୱାମୀ-ସ୍ତ୍ରୀ ପୁଅର ଏଭଳି ଆଚରଣରେ ଅତିଷ୍ଠ ଓ ଭୟଭୀତ ହୋଇପଡ଼ିଥିଲେ । ପ୍ରତ୍ୟୁଷରୁ ପୁଅ ବସନ୍ତ ଘର ବାରଣ୍ଡାରେ ଶୋଇଥିବାବେଳେ ଏହାର ସୁଯୋଗ ନେଇ ବାପା ଏକ ଠେଙ୍ଗାରେ ମୁଣ୍ଡକୁ ଶକ୍ତ ପ୍ରହାର ଦେଇଥିଲେ । ପରେ ମା’ ଏକ ଧାରୁଆ ଟାଙ୍ଗିଆ ସହାୟତାରେ ମୁଣ୍ଡକୁ ୫ ଚୋଟ ଆକ୍ରମଣ କରିଥିବା ପୁଲିସ ତଦନ୍ତ ସମୟରେ ଜାଣିବାକୁ ପାଇଛି । ଅତି ଚତୁରତାର ସହ ପୁଅ ବସନ୍ତ ମୁମୂର୍ଷୁ ଅବସ୍ଥାରେ ଛଟପଟ ହେଉଥିବା ବେଳେ ଘର ସମ୍ମୁଖ ଏକ ଡ୍ରେନରେ ପକାଇଦେଇ ଘରେ ପଡ଼ିଥିବା ରକ୍ତଛିଟାକୁ ଧୋଇ ଦେଇଥିଲେ । ଗୁରୁତର ଅବସ୍ଥାରେ ଦୀର୍ଘ ୧ ଘଣ୍ଟା ପଡ଼ିରହିବା ପରେ ୧୦୮ ଆମ୍ବୁଲାନ୍ସ ଯୋଗେ ଦଶପଲ୍ଲା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା । ଚିକିତ୍ସାଧୀନ ଅବସ୍ଥାରେ ୩ ଘଣ୍ଟା ପରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ହତ୍ୟାକାଣ୍ଡରେ ସଂପୃକ୍ତ ଉଭୟ ସ୍ୱାମୀ-ସ୍ତ୍ରୀକୁ ଥାନାରେ ଅଟକ ରଖି ଘଟଣାର ତଦନ୍ତ ଜାରି ରଖିଛନ୍ତି ।

Powered by Froala Editor