ଗଞ୍ଜେଇ ଚାଲାଣର ନୂଆ ଶୈଳି, ପଇଡ଼ ବୋଝେଇ ଟ୍ରକ୍ରୁ ୭୦ଲକ୍ଷ ଟଙ୍କାର ଜବତ
ଲମତାପୁଟ: ରାଜ୍ୟରେ ବଦଳୁଛି ଗଞ୍ଜେଇ ଚାଲାଣର ତରିକା। ଚାଲାଣକାରୀ ମାନେ ଆପଣାଉଛନ୍ତି ଗଞ୍ଜେଇ ଚାଲାଣର ନୂଆ ନୂଆ ଶୈଳି। କେତେବେଳେ ଚାଉଳ ବୋଝେଇ ଟ୍ରାକ୍ଟର ତ ପୁଣି କେତେବେଳେ ପଇଡ ବୋଝେଇ ଟ୍ରକରୁ ଜବତ ହେଉଛି ଗଞ୍ଜେଇ। ଆଜି ଏକ ପଇଡ଼ ବୋଝେଇ ଟ୍ରକ୍ରୁ ୭୦ଲକ୍ଷ ଟଙ୍କାର ଗଞ୍ଜେଇ ଜବତ ହୋଇଛି। କୋରାପୁଟ ଜିଲ୍ଲା ଲମତାପୁଟ ଅଞ୍ଚଳରୁ ସାତ କୁଇଣ୍ଟାଲରୁ ଅଧିକ ଗଞ୍ଜେଇ ମାଛକୁଣ୍ଡ ପୋଲିସ ଜବତ କରିଥିବା ବେଳେ, ୨ଜଣ ଚାଲାଣକାରୀଙ୍କୁ ଗିରଫ କରିଛି।
ସୂଚନା ଅନୁଯାୟୀ, ଏକ ପଇଡ ବୋଝେଇ ଟ୍ରକ୍ରେ ଲମତାପୁଟ ଓ ଜୟପୁର ରାସ୍ତା ଦେଇ ଗଞ୍ଜେଇ ବିହାରକୁ ଚାଲାଣ କରାଯାଉଥିଲା। ଏନେଇ ବିଶେଷ ସୂତ୍ରରୁ ଖବର ପାଇଥିଲେ କୋରାପୁଟ ଏସପି। ପରେ ଏସ୍ପିଙ୍କ ନିର୍ଦ୍ଦେଶ କ୍ରମେ କଞ୍ଚଣା ଗାଁ ଛକ ନିକଟରେ ଗାଡି ମୋଟର ଯାଞ୍ଚ କରିଥିଲା ପୋଲିସ।
ଯାଞ୍ଚ ସମୟରେ ଟ୍ରକରୁ ୭୦୧କେଜି ୭୦୦ଗ୍ରାମ ଗଞ୍ଜେଇ ଜବତ କରାଯାଇଥିଲା। ଜବତ ଗଞ୍ଜେଇର ଆନୁମାନିକ ମୂଲ୍ୟ ୭୦ଲକ୍ଷ ଟଙ୍କା ହେବ । ତେବେ ଘଟଣାରେ ସମ୍ପୃକ୍ତ ଜଗେନ୍ଦ୍ର ତିଓ୍ୱାରି ଓ ଶିବ ଶଙ୍କର ଚୌଧରିଙ୍କୁ ଗିରଫ କରିଛି ପୋଲିସ। ସେମାନଙ୍କ ଘର ବିହାରରେ ବୋଲି ଜଣାପଡ଼ିଛି।
Powered by Froala Editor
