ଭୁବନେଶ୍ୱର : କୁଖ୍ୟାତ ଆତଙ୍କବାଦୀ ସଂଗଠନ ଅଲକାଏଦା ନୂଆଦିଲ୍ଲୀ ବିମାନବନ୍ଦରକୁ ଉଡ଼ାଇ ଦେବାକୁ ଧମକ ଦେବା ପରେ ନୂଆଦିଲ୍ଲୀ ଭଳି ଭୁବନେଶ୍ୱର ବିମାନବନ୍ଦର ପାଇଁ ମଧ୍ୟ ରେଡ ଆଲର୍ଟ ଜାରି ହୋଇଛି । ଅଗଷ୍ଟ ୧୦ରୁ ୨୦ତାରିଖ ପର୍ଯ୍ୟନ୍ତ ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦରର ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି । ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦର ନିଦେ୍ର୍ଧଶକ ପ୍ରଭାତ ରଞ୍ଜନ ବେଉରିଆ କହିଛନ୍ତି; ୧୦ଦିନ ପାଇଁ ବିମାନବନ୍ଦରରେ ରେଡ ଆଲର୍ଟ ଜାରି ହୋଇଥିବାରୁ ଆମେ ବିମାନବନ୍ଦରର ସୁରକ୍ଷା ନେଇ ଏସଓପି ଜାରି କରିଛୁ । ସାଧାରଣତଃ ସ୍ୱାଧୀନତା ଦିବସ ଓ ସାଧାରଣତନ୍ତ୍ର ଦିବସ ସମୟରେ ଆମକୁ ସୁରକ୍ଷା ବ୍ୟବସ୍ଥା କଡ଼ାକଡ଼ି କରିବାକୁ କୁହାଯାଏ । କିନ୍ତୁ ଏଥର ଦିଲ୍ଲୀ ବିମାନବନ୍ଦର ଉଡ଼ାଇଦେବାକୁ ଧମକ ଆସିଥିବାରୁ ଆମେ ସୁରକ୍ଷା ବ୍ୟବସ୍ଥା ବଢ଼ାଇ ଦେଇଛୁ । ସେ ଆହୁରି କହିଛନ୍ତି ଯେ, ଆମେ ସର୍ବଦା ସୁରକ୍ଷା ବ୍ୟବସ୍ଥା କଡ଼ାକଡ଼ି କରିଥାଉ । କିନ୍ତୁ ଏବେ ଏହାକୁ ବଢ଼ାଇ ଦିଆଯାଇଛି । ବିମାନବନ୍ଦର ଭିତରକୁ ଯାତ୍ରୀ ଓ କର୍ମଚାରୀଙ୍କ ବାଦ କାହାକୁ ଛଡ଼ାଯିବନି । ଭିଜିଟର ପାସ୍ ଦିଆଯିବନି । ଟର୍ମିନାଲ ନିକଟକୁ ଗାଡ଼ି ଆସିବନି । ଟର୍ମିନାଲଠାରୁ ଦୂରରେ ଗାଡ଼ି ପାର୍କିଂ ବ୍ୟବସ୍ଥା କରାଯିବ । ସେହିପରି ବିମାନବନ୍ଦରରେ ଦୁଇଗୁଣା ଅଧିକ ବନ୍ଧୁକଧାରୀ ଯବାନଙ୍କୁ ମୁତୟନ କରାଯିବ । ପ୍ରବେଶ ପଥକୁ ସିଲ କରି କଡ଼ା ଚେକିଂ ହେବ । ସନ୍ଦିଗ୍ଧ ବ୍ୟକ୍ତିଙ୍କୁ ଅଟକ ରଖି ପଚରାଉଚରା କରାଯିବ । କାହାକୁ ବି ବାହାରେ କୌଣସି ସାମଗ୍ରୀ ରଖିବାକୁ ଦିଆଯିବନି । ପ୍ରତି ୱାଚଟାୱାରରେ ଦୁଇ ଜଣ ଲେଖାଏଁ ଯବାନଙ୍କୁ ୨୪ଘଣ୍ଟା ମୁତୟନ କରାଯିବ । ଏବେ ଅଧିକ ସୁରକ୍ଷା କର୍ମୀ ନିୟୋଜିତ କରିବା ସହ ତ୍ରିସ୍ତରୀୟ ଯାଞ୍ଚ ବ୍ୟବସ୍ଥା କରିବୁ । ସବୁ ପୋଷ୍ଟରେ ସିଆଇଏସଏଫ ଯବାନଙ୍କ ସଂଖ୍ୟା ବଢ଼ାଇ ଦିଆଯିବ । ପ୍ରବେଶ ପଥରେ ୪ଜଣ ବନ୍ଧୁକଧାରୀ ଯବାନ ମୁତୟନ ହୋଇଥିବା ବେଳେ ଟର୍ମିନାଲ ଭିତରେ ଓ ବାହାରେ ତ୍ରିସ୍ତରୀୟ ଯାଞ୍ଚ ବ୍ୟବସ୍ଥା ହେବ । ଡୋମେଷ୍ଟିକ ଟର୍ମିନାଲରେ ୬୭ଟି ସିସିଟିଭି ଲାଗିଛି । କୌଣସି ପରିସ୍ଥିତିରେ ବି କେହି ଆମ ନଜରରୁ ଖସି ପାରିବେନି । ଏହାସହ ଆମର କୁଇକ ରେସ୍ପନସ ଟିମ (କୁ୍ୟଆରଟି)ରେ ଅଧିକ ଯବାନ ସାମିଲ କରାଯାଇଛି । ସୁରକ୍ଷା ବ୍ୟବସ୍ଥା ଅନୁଯାୟୀ, ଆମର ଟର୍ମିନାଲ ଭିତରେ ଯଦି କୌଣସି ବ୍ୟାଗ କି ସାମଗ୍ରୀ ୧୫ ମିନିଟରୁ ଅଧିକ ରହିବ ଏବଂ ଏହାର କେହି ଦାବିଦାର ନ ଥିବେ, ତେବେ ଆଲାରାମ୍ ବାଜିବ । ଆମ ଯବାନ ତୁରନ୍ତ ଏହାର ଯାଞ୍ଚ କରିବେ । ବିମାନବନ୍ଦରକୁ ଚାରିପଟୁ ସୁରକ୍ଷା ଯୋଗାଇବା ପାଇଁ ୧୩ଟି ଟାୱାରରେ ଦୁଇ ଜଣ ଲେଖାଏଁ ଯବାନଙ୍କୁ ୨୪ଘଣ୍ଟିଆ ମୁତୟନ କରାଯାଇଛି ।

Powered by Froala Editor