ଭୁବନେଶ୍ବର: ପାଣିପାଗ ବିଭାଗ ସୂଚନାନୁଯାୟୀ ବାତ୍ୟା ‘ଅର୍ଣ୍ଣବ’ ଦୁର୍ବଳ ହୋଇ ଉତ୍ତର ଛତିଶଗଡ଼ ଏବଂ ଏହାର ପାର୍ଶ୍ବବର୍ତ୍ତୀ ପୂର୍ବ ମଧ୍ୟପ୍ରଦେଶ ରାଜ୍ୟରେ ସକ୍ରିୟ ରହିଛି। ଗତ ୨୪ ଘଣ୍ଟା ମଧ୍ୟରେ ବାଲେଶ୍ବରର ଭୋଗରାଇରେ ୧୮୫ ମିମି ବର୍ଷା ହୋଇଥିବା ବେଳେ ନୀଳଗିରିରେ ୮୪ ମିମି, ଖଇରାରେ ୮୩ ମିମି, ଔପଦାରେ ୮୦ ମି.ମି ବର୍ଷା ହୋଇଛି। ଗଞ୍ଜାମ ଜିଲାର ପାତ୍ରପୁରରେ ୧୭୩ ମିମି, ପୋଲସରାରେ ୧୫୪.୬ ମିମି, ଧରାକୋଟରେ ୮୯ ମିମି, ବେଲଗୁଣ୍ଠାରେ ୮୧ ମିମି ବର୍ଷା ହୋଇଛି। ସେହିପରି, ପୁରୀ ଜିଲାର ନିମାପଡ଼ାରେ ୧୫୪.୨ ମିମି, ବରଗଡ଼ର ଅମ୍ବାଭୋନାରେ ୧୦୮ ମିମି, ସୁନ୍ଦରଗଡ଼ର ହେମଗିରରେ ୯୦.୬ ମିମି, ମୟୂରଭଞ୍ଜର ବେତନଟୀରେ ୮୨ ମିମି ଏବଂ ଜି.ବି ନଗରରେ ୮୫ ମିମି ବର୍ଷା ହୋଇଛି।
ଅପରପକ୍ଷେ, ଦକ୍ଷିଣ ଆଣ୍ଡାମାନ ସାଗର ଏବଂ ପାର୍ଶ୍ବବର୍ତ୍ତୀ ଆଣ୍ଡାମାନ ନିକୋବର ଦ୍ବୀପପୁଞ୍ଜ ଅଞ୍ଚଳରେ ସକ୍ରିୟ ଲଘୁଚାପ ଶନିବାର ଏକ ଅବପାତର ରୂପ ନେଉଛି। ପରବର୍ତ୍ତୀ ଦୁଇଦିନ ମଧ୍ୟରେ ଏହା ପଶ୍ଚିମ-ଉତ୍ତରପଶ୍ଚିମ ଦିଗରେ ଗତି କରି ଆନ୍ଧ୍ରପ୍ରଦେଶ ଉପକୂଳ ଆଡ଼କୁ ମୁହାଁଇବାର ମ୍ଭାବନା ରହିଛି ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି। ଏହା ପ୍ରଭାବରେ ଆସନ୍ତା ୩ ତାରିଖ ପର୍ଯ୍ୟନ୍ତ ଦକ୍ଷିଣ ଓଡ଼ିଶାର ଜିଲାଗୁଡ଼ିକରେ ବିଜୁଳି ଘଡ଼ଘଡ଼ି ସହ ବର୍ଷା ସମ୍ଭାବନା ରହିଛି। ବିଶେଷକରି, ରାୟଗଡ଼ା, କୋରାପୁଟ, ମାଲକାନଗିରି, ଗଜପତି ଏବଂ ଗଞ୍ଜାମ ଜିଲାରେ ବଜ୍ରପାତ ସହ ବର୍ଷା ଏବଂ ଘଣ୍ଟା ପ୍ରତି ୩୦ରୁ ୪୦କି.ମି ଏବଂ ସ୍ଥଳବିଶେଷରେ ଝଟକା ପବନର ବେଗ ୫୦କି.ମି. ଛୁଇଁବାର ସମ୍ଭାବନା ରହିଛି। ନଭେମ୍ବର ୧ରୁ ଉତ୍ତର ଏବଂ ଉପକୂଳବର୍ତ୍ତୀ ଜିଲାଗୁଡ଼ିକରେ ମଧ୍ୟ ବଜ୍ରପାତ ସହ ବର୍ଷା ହୋଇପାରେ। ତେଣୁ, ଆସନ୍ତା ୩ ତାରିଖ ପର୍ଯ୍ୟନ୍ତ ଉପରୋକ୍ତ ଜିଲାଗୁଡ଼ିକୁ ପାଣିପାଗ ବିଭାଗ ପକ୍ଷରୁ ୟେଲୋୱାର୍ଣ୍ଣିଂ ଜାରି କରାଯାଇଛି।
ବିଶିଷ୍ଟ ପାଣିପାଗ ବିଶେଷଜ୍ଞ ସୁରେନ୍ଦ୍ରନାଥ ପଶୁପାଳକ କହିଛନ୍ତି, ଏହି ଅବପାତ ଦକ୍ଷିଣ ଆନ୍ଧ୍ରପ୍ରଦେଶ ଉପକୂଳରେ ସ୍ଥଳଭାଗ ଅତିକ୍ରମ କରିବାର ସମ୍ଭାବନା ରହିଥିବା ବେଳେ ଉତ୍ତର ତାମିଲନାଡୁ ଉପକୂଳକୁ ଯିବାର ସମ୍ଭାବନାକୁ ମଧ୍ୟ ବାଦ୍ ଦିଆଯାଇପାରିବ ନାହିଁ। ସ୍ଥଳଭାଗ ଅତିକ୍ରମ କରିବାର ନିର୍ଦିଷ୍ଟ ସ୍ଥାନ, ସମୟ ଓ ତୀବ୍ରତା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ ସେ କହିଛନ୍ତି। ଆସନ୍ତା ୩ ତାରିଖ ମଧ୍ୟରେ ପଶ୍ଚିମ-କେନ୍ଦ୍ରୀୟ ବଙ୍ଗୋପସାଗର ଓ ଦକ୍ଷିଣ ଓଡ଼ିଶା ଉପକୂଳ ସଂଲଗ୍ନ ସମୁଦ୍ରରେ ପବନର ବେଗ ଘଣ୍ଟାକୁ ୩୫ରୁ ୪୫କି.ମି ଏବଂ ଝଟକା ପବନ ୫୫ କି.ମି ପର୍ଯ୍ୟନ୍ତ ହୋଇପାରେ। ଗଞ୍ଜାମ, ଗଜପତି, ପୁରୀ, ଜଗତସିଂହପୁର ଓ କେନ୍ଦ୍ରାପଡ଼ା ଅଞ୍ଚଳରେ ପବନର ବେଗ ସାଧାରଣତଃ ଘଣ୍ଟାକୁ ୨୦ରୁ ୩୫କି.ମି ଏବଂ ଝଟ୍‌କା ପବନ ଘଣ୍ଟା ପ୍ରତି ୪୫କି.ମି ପର୍ଯ୍ୟନ୍ତ ହୋଇପାରେ। ଗଞ୍ଜାମ ଓ ଗଜପତିରେ ନଭେମ୍ବର ୨ ମଧ୍ୟରେ ହାଲୁକାରୁ ମଧ୍ୟମ ବର୍ଷା ସହିତ କେତେକ ସ୍ଥାନରେ ପ୍ରବଳ ବର୍ଷା ହୋଇପାରେ। ଗଞ୍ଜାମରେ ୧ ଓ ୨ ତାରିଖରେ ପୁଣି ଲଗାଣ ବର୍ଷା ହେବାର ସମ୍ଭାବନା ରହିଛି। କେତେକ ସ୍ଥାନରେ ୨୪ ଘଣ୍ଟାରେ ୬୪.୫ରୁ ୧୧୫.୫ମି.ମି ପର୍ଯ୍ୟନ୍ତ ବର୍ଷା ହୋଇପାରେ।

Powered by Froala Editor