ଭୁବନେଶ୍ୱର : ଆସନ୍ତା ଦୁର୍ଗାପୂଜା ପାଇଁ ଭୁବନେଶ୍ୱର-କଟକ କମିଶନରେଟ୍ ପୁଲିସ, ଭୁବନେଶ୍ୱର ସହର ପାଇଁ ଟ୍ରାଫିକ କଟକଣା ଜାରି କରିଛି । ସମ୍ଭାବ୍ୟ ଭିଡ଼କୁ ଦୃଷ୍ଟିରେ ରଖି ଦିନ ୨ରୁ ରାତି ୨ଟା ମଧ୍ୟରେ ସହରର ବିଭିନ୍ନ ରୁଟ୍‌ରେ ଭାରୀଯାନ ଚଳାଚଳ ଉପରେ ପ୍ରତିବନ୍ଧକ ଜାରି କରାଯାଇଛି । ଆସନ୍ତା ଅକ୍ଟୋବର ୧୬ ତାରିଖରୁ ୨୧ ତାରିଖ ପର୍ଯ୍ୟନ୍ତ ଏହି କଟକଣା ଜାରି ରହିବ । ସାମ୍ବାଦିକଙ୍କୁ ସୂଚନା ଦେଇ ପୁଲିସ କମିଶନର ଏସ.ଦେବଦତ୍ତ ସିଂହ କହିଛନ୍ତି, ରସୁଲଗଡ଼-ଲିଙ୍ଗିପୁର ଭାୟା ବୋମିଖାଲ ଓ କଳ୍ପନା, ବାଣୀବିହାର-ଶିଶୁଭବନ ଭାୟା ମାଷ୍ଟର କ୍ୟାଣ୍ଟିନ ଓ ରାଜମହଲ, ଆଚାର୍ଯ୍ୟ ବିହାର-କଳିଙ୍ଗ ହସ୍ପିଟାଲ, ଜୟଦେବ ବିହାର-ନନ୍ଦନକାନନ, ଜୟଦେବ ବିହାର-ରାଜଭବନ, ସିଆରପି-ପାୱାର ହାଉସ, ଖଣ୍ଡଗିରି-ପୋଖରୀପୁଟ, ଏନଏଚ୍‌-୧୬ ପାଶ୍ୱର୍ସ୍ଥ ବରମୁଣ୍ଡାରୁ ପଳାଶୁଣୀ ସର୍ଭିସ ରୋଡ ଉପରେ ଏହି କଟକଣା ଜାରି ରହିବ । ଖୋର୍ଦ୍ଧାରୁ କଟକ ଯାଉଥିବା ଭାରୀଯାନଗୁଡିକ ପିତାପଲ୍ଲୀ, ଚନ୍ଦକା, ବାରଙ୍ଗ, ବାଲିକୁଦା ଦେଇ ଚଳାଚଳ କରିବେ । ପୁରୀରୁ ଭୁବନେଶ୍ୱର ବରମୁଣ୍ଡା ବସଷ୍ଟାଣ୍ଡ ଯାଉଥିବା ବସ୍‌ଗୁଡିକ ଲିଙ୍ଗିପୁର, ପାଣ୍ଡରା, ହାଇଟେକ୍ ଦେଇ ଚଳାଚଳ କରିବେ । ମାଷ୍ଟର କ୍ୟାଣ୍ଟିନରୁ ଚଳାଚଳ କରୁଥିବା ବସ୍‌ଗୁଡିକ ରାମମନ୍ଦିର, ହାଉସିଂବୋର୍ଡ ଦେଇ ଆଚାର୍ଯ୍ୟ ବିହାରକୁ ଯିବେ । ଲିଙ୍ଗରାଜ ମନ୍ଦିର ଦେଇ ଚଳାଚଳ କରୁଥିବା ବସ୍‌ଗୁଡିକ ସକାଳ ବେଳା ଗ୍ୟାରେଜ ଛକ ଓ ସାମନ୍ତରାପୁର ଛକ ଦେଇ ଲିଙ୍ଗିପୁର ଯିବେ ।

Powered by Froala Editor