ଭୁବନେଶ୍ୱର : ରାଜ୍ୟରେ ଖରିଫ ବିପଣନ ଋତୁ ୨୦୨୫-୨୬ ପାଇଁ ଭାରତୀୟ ଖାଦ୍ୟ ନିଗମ (ଏଫସିଆଇ) ଦ୍ୱାରା ଚାଉଳ ସଂଗ୍ରହ ପ୍ରକ୍ରିୟା ଧାର୍ଯ୍ୟ ଲକ୍ଷ୍ୟଠାରୁ ବହୁ ପଛରେ ପଡ଼ିଛି। ଚଳିତ ବର୍ଷ ମାର୍ଚ୍ଚରୁ ସେପ୍ଟେମ୍ବର ପର୍ଯ୍ୟନ୍ତ ଏଫ୍‌ସିଆଇକୁ ମୋଟ ୨୨ ଲକ୍ଷ ୧୬ ହଜାର ୦୭୪ ମେଟ୍ରିକ୍ ଟନ୍ ଚାଉଳ ଉଠାଇବାର ଟାର୍ଗେଟ୍ ଦିଆଯାଇଥିଲା। କିନ୍ତୁ, ବିଭାଗୀୟ ତଥ୍ୟ ଅନୁଯାୟୀ, ଏଫ୍‌ସିଆଇ ସେପ୍ଟେମ୍ବର ୧୭ ସୁଦ୍ଧା ମାତ୍ର ୮ ଲକ୍ଷ ୧୫ ହଜାର ୧୭୨ ମେଟ୍ରିକ୍ ଟନ୍ ଚାଉଳ ଉଠାଇବାରେ ସକ୍ଷମ ହୋଇଛି। ଏହା ମୋଟ ଟାର୍ଗେଟ୍‌ର ଅଧା ବି ନୁହେଁ। ଲକ୍ଷ୍ୟ ଏବଂ ବାସ୍ତବ ଉଠାଣ ମଧ୍ୟରେ ଥିବା ଏହି ବିରାଟ ବ୍ୟବଧାନ ବର୍ତ୍ତମାନ ରାଜ୍ୟର ଚାଷୀ ଓ ମିଲରମାନଙ୍କ ସହ ସରକାରଙ୍କ ଚିନ୍ତା ମଧ୍ୟ ବଢ଼ାଇ ଦେଇଛି। ବୁଧବାର ବିଧାନସଭାରେ ବିଜେଡି ବିଧାୟକ ଅନନ୍ତ ନାରାୟଣ ଜେନାଙ୍କ ଏକ ପ୍ରଶ୍ନର ଉତ୍ତରରେ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ଏହି ଚିନ୍ତାଜନକ ତଥ୍ୟ ଉପସ୍ଥାପନ କରିଛନ୍ତି। ମନ୍ତ୍ରୀଙ୍କ ସୂଚନା ମୁତାବକ, ଏଫସିଆଇ ଓଡ଼ିଶାରୁ ମୋଟ ୮.୧୨ ଲକ୍ଷ ମେଟ୍ରିକ ଟନ୍ ଚାଉଳ ଗ୍ରହଣ କରିଛି। ଯେଉଁଥିରେ ୬.୨୩ ଲକ୍ଷ ମେଟ୍ରିକ ଟନ ଉଷୁନା ଚାଉଳ ରହିଥିବା ବେଳେ ୧.୮୯ ଲକ୍ଷ ମେଟ୍ରିକ ଟନ୍‌ ଅରୁଆ ଚାଉଳ ରହିଛି।

ବିଧାନସଭାରେ ମନ୍ତ୍ରୀ ଦେଇଥିବା ତଥ୍ୟ ଅନୁସାରେ, ୨୦୨୬ ମାର୍ଚ୍ଚରେ ୭୨,୦୦୦ ମେଟ୍ରିକ ଟନ୍ ଉଠାଇବା ପାଇଁ ଲକ୍ଷ୍ୟ ଥିବା ବେଳେ ଏଫସିଆଇ ମାତ୍ର ୯,୯୫୮ ଟନ୍ ଚାଉଳ ଉଠାଇଥିଲା। ଏପ୍ରିଲରେ ୩,୬୧,୦୭୪ ଟନ୍ ଟାର୍ଗେଟ୍ ତୁଳନାରେ କେବଳ ୧,୪୪,୦୬୫ ଟନ୍ ସଂଗ୍ରହ ହୋଇପାରିଥିଲା। ସେହିପରି ମେ’ ମାସରେ ୨,୭୦,୦୦୦ ଟନ୍ ଲକ୍ଷ୍ୟ ରଖାଯାଇଥିବା ବେଳେ ମାତ୍ର ୧,୪୬,୩୮୪ ଟନ୍ ଚାଉଳ ଉଠିଥିଲା। ଜୁନ୍‌ରେ ୩ ଲକ୍ଷ ୭୮ ହଜାର ଟନ୍ ଟାର୍ଗେଟ୍ ବିପକ୍ଷରେ ୧,୩୫,୮୩୯ଟନ୍, ଜୁଲାଇରେ ୩ ଲକ୍ଷ ୭୦ହଜାର ଟନ୍ ବିପକ୍ଷରେ ୧,୩୫,୮୮୫ ଟନ୍ ଏବଂ ଅଗଷ୍ଟରେ ମଧ୍ୟ ୩ ଲକ୍ଷ ୭୦ହଜାର ଟନ୍ ଲକ୍ଷ୍ୟ ଥାଇ କେବଳ ୧,୪୮,୧୫୦ ଟନ୍ ଚାଉଳ ଉଠାଯାଇଥିଲା। ସେପ୍ଟେମ୍ବର ୧୭ ତାରିଖ ସୁଦ୍ଧା ୩ ଲକ୍ଷ ୯୫ ହଜାର ଟନ୍ ଓଡ଼ିଶା ଚାଉଳ ନେବାକୁ ଏଫ୍‌ସିଆଇ କୁନ୍ଥକୁନ୍ଥ ଟାର୍ଗେଟ୍ ରହିଥିବା ବେଳେ ମାତ୍ର ୯୪,୮୯୧ ଟନ୍ ଉଠାଣ ହୋଇପାରିଛି।

ଏଫସିଆଇ ଦ୍ୱାରା ଓଡ଼ିଶାରୁ ଧାର୍ଯ୍ୟ ଲକ୍ଷ୍ୟ ଅନୁଯାୟୀ ଚାଉଳ ଉଠାଣ ହେଉ ନଥିବାରୁ ଏହା ଏବେ ରାଜ୍ୟର ସାମଗ୍ରିକ ଧାନକ୍ରୟ ବ୍ୟବସ୍ଥା ପାଇଁ ଏକ ବଡ଼ ସମସ୍ୟା ଭାବେ ଉଭା ହୋଇଛି। ଆଗାମୀ ଖରିଫ ବିପଣନ ଋତୁ ପାଇଁ ରାଜ୍ୟରେ ରେକର୍ଡ ସଂଖ୍ୟକ ଚାଷୀ ପଞ୍ଜୀକରଣ କରିଥିବା ବେଳେ ମିଲ୍‌ଗୁଡ଼ିକରେ ବଳକା ପୁରୁଣା ଚାଉଳ ଜମା ହୋଇ ରହିବା ଉଭୟ ଚାଷୀ ଏବଂ ସରକାରଙ୍କ ମୁଣ୍ଡବିନ୍ଧାର କାରଣ ସାଜିଛି। ଯଦି ଲକ୍ଷ୍ୟ ଅନୁଯାୟୀ ଏଫ୍‌ସିଆଇ ଚାଉଳ ନ ଉଠାଏ, ଚାଷୀଙ୍କ ଉତ୍ପାଦିତ ଧାନ କେଉଁଠି ରଖାଯିବ, ସେନେଇ ଚିନ୍ତା ଘାରିଲାଣି। 

ଏଫସିଆଇର ଏଭଳି ମନ୍ଥର ଚାଉଳ ଉଠାଣ ପ୍ରକ୍ରିୟା ଯୋଗୁଁ ରାଜ୍ୟର ଚାଷୀ, ରାଇସ୍ ମିଲର ଏବଂ ସାମଗ୍ରିକ ଧାନକ୍ରୟ ବ୍ୟବସ୍ଥା ଗଭୀର ଭାବେ ପ୍ରଭାବିତ ହେଉଛି। ମିଲ୍‌ଗୁଡ଼ିକରେ ଚାଉଳ ଜମା ହୋଇ ରହିବା ଫଳରେ ନୂଆ ଧାନ କିଣିବାରେ ବାଧା ସୃଷ୍ଟି ହେବାର ଆଶଙ୍କା ରହିଛି। ଅବଶ୍ୟ ଏହି ସଂଗ୍ରହ ପ୍ରକ୍ରିୟା ଏବେ ମଧ୍ୟ ଜାରି ରହିଛି ବୋଲି ମନ୍ତ୍ରୀ କହିଛନ୍ତି। ସମସ୍ୟାର ସମାଧାନ ପାଇଁ ତଥା ଲକ୍ଷ୍ୟଧାର୍ଯ୍ୟ ହୋଇଥିବା ଚାଉଳକୁ ଶୀଘ୍ର ଉଠାଇବା ନିମନ୍ତେ ରାଜ୍ୟ ସରକାର କେନ୍ଦ୍ର ସରକାରଙ୍କ ସହିତ ନିୟମିତ ବ୍ୟବଧାନରେ ଯୋଗାଯୋଗ କରୁଥିବା ଖାଦ୍ୟ ଯୋଗାଣ ମନ୍ତ୍ରୀ ଗୃହକୁ ଅବଗତ କରାଇଛନ୍ତି।

Powered by Froala Editor